شي جينپيڭ سينگاپۋر زۇڭليى حۋاڭ شۇنسايمەن كەزدەستى

6 ـ ايدىڭ 24 ـ كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارلاي كەلگەن سينگاپۋر زۇڭليى حۋاڭ شۇنسايمەن كەزدەستى.

□ سۋرەتتى شينحۋا اگەنتتىگىنىڭ ءتىلشىسى يۋە يۋەۋي تۇسىرگەن

شينحۋا اگەنتتىگىنىڭ 6 ـ ايدىڭ 24 ـ كۇنى بەيجيڭنەن بەرگەن حابارى (ءتىلشى دۇڭ شۋە). 6 ـ ايدىڭ 24 ـ كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارلاي كەلگەن سينگاپۋر زۇڭليى حۋاڭ شۇنسايمەن كەزدەستى.

شي جينپيڭ حۋاڭ شۇنسايدىڭ سايلاۋدا تاعى دا جەڭىپ ۇزدىكسىز مىندەت وتەگەنىن قۇتتىقتادى. شي جينپيڭ بىلاي دەپ اتاپ كورسەتتى: بيىل _ جۇڭگو مەن سينگاپۋردىڭ ديپلوماتيالىق قارىم ـ قاتىناس ورناتقاندىعىنىڭ 35 جىلدىعى، ەكى جاق باستان ـ اياق ءوزارا تۇسىنىسۋگە، ءوزارا قۇرمەت ەتۋگە تاباندى بولىپ، جۇڭگو _ سينگاپۋر قارىم ـ قاتىناسىنىڭ ورنىقتى، اقاۋسىز دامۋىنا بەرىك قامتاماسىزدىق ازىرلەدى. جۇڭگو _ سينگاپۋر سەلبەستىگى جۇڭگونىڭ ءارقايسى كەزەڭدەگى دامۋ بەتالىسى مەن تۇيىنىنە ۇيلەسەدى، سۋجوۋ ونەركاسىپ باقشاسى سياقتى ءبىر قىدىرۋ سۇبەلى سەلبەستىك جەتىستىگىنە قول جەتكىزىپ، ەكى ەلدىڭ وزدەرىنىڭ وسىزامانداندىرۋ قۇرىلىسىنا ماڭىزدى دەمەۋشى كۇش ۇستەدى ءارى وڭىردەگى ەلدەردىڭ سەلبەستىگىنە ۇلگى ورناتتى. ەكى جاق ەكى ەل قارىم ـ قاتىناسىنىڭ دامۋ بارىسىنان تاجىريبە جانە اقىل ـ پاراسات قابىلداپ، تاڭداۋلى داستۇرگە مۇراگەرلىك ەتىپ جانە ونى اسقاقتاتىپ، جۇڭگو _ سينگاپۋر دوستىق اعاشىنىڭ ماۋەلەپ ءوسىپ جەمىس بەرۋىنە مۇمكىندىك جاساۋى كەرەك.

شي جينپيڭ بىلاي دەپ باسا دارىپتەدى: جۇڭگو مەن سينگاپۋر ەكى ەل دوستىعىنىڭ ۇلكەن بەتالىسىن مىقتى يگەرىپ، جۇڭگو _ سينگاپۋر قارىم ـ قاتىناسىنا باستان ـ اياق ستراتەگيالىق دەڭگەيدەن جانە ۇزاق بولاشاقتىق تۇرعىدان مامىلە جاساپ جانە ونى دامىتىپ، باعداردىڭ وزگەرمەۋىنە، قوزعاۋشى كۇشتىڭ ازايماۋىنا شىنايى كەپىلدىك ەتۋى كەرەك. جۇڭگو _ سينگاپۋر دوستىعىنىڭ ساياسي نەگىزىن بەكەمدەپ، ءبىر ـ ءبىرىنىڭ وزەكتى مۇددەسىن جانە ءجىتى قاداعالاپ وتىرعان كەلەلى ىستەرىن قولداپ، اناعۇرلىم جوعارى دەڭگەيدەگى ساياسي ءوزارا سەنىمدىلىك ارقىلى ەكى ەل قارىم ـ قاتىناسىنىڭ دامۋىنا قىزمەت وتەۋ كەرەك. جۇڭگو جاق سينگاپۋر جاقتىڭ جۇڭگونىڭ دامۋىمەن ۇزدىكسىز تەرەڭ توعىسۋىن قارسى الادى، ەكى جاق ”ءبىر بەلدەۋ، ءبىر جولدى“ بىرگە قۇرۋ سەلبەستىگىن ىشكەرىلەي ىلگەرىلەتىپ، سيفرلى ەكونوميكا، جاسىل دامۋ، جاساندى زەردە سياقتى سالالاردا بەلگى سيپاتتى جەتىستىكتەردى تۇلعالاپ، كەلەلى نىسانداردىڭ ساپاسىن جوعارىلاتىپ دەڭگەيىن ءوسىرۋدى ىلگەرىلەتىپ، جوعارى ساپالى سەلبەستىكتىڭ تىڭ تاراۋىن ۇزدىكسىز جازۋى كەرەك. ەكى ەل حالقىن ۇنەمى بارىس ـ كەلىس جاساۋعا شابىتتاندىرىپ، گۋمانيتارلىق اۋىس ـ كۇيىستى، سەلبەستىكتى تەرەڭدەتىپ، جۇڭگو _ سينگاپۋر دوستىعىن جۇرت جۇرەگىنە ءتىپتى دە تەرەڭ ۇيالاتۋ كەرەك. جۇڭگو جاق باستان ـ اياق بىلاي دەپ قارايدى: بەيبىتشىلىك، دامۋ، سەلبەستىك، تەڭ يگىلىكتەنۋ سىندى ءداۋىر اۋقىمى بوگەۋ بەرمەيدى، دۇنيە ءجۇزىنىڭ زورەكەرلىككە قايتا اياق باسۋىنا بولمايدى، ورمان زاڭىنا قايتا قايتۋىنا بولمايدى. جۇڭگو جاق سينگاپۋر جاقپەن بىرگە تاريحتىڭ دۇرىس جاعىندا تۇرىپ، ادىلدىك، تۋراشىلدىق جاعىندا تۇرىپ، تەپە ـ تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، جالپىعا ءتيىمدى، سيىسىمدى ەكونوميكانىڭ جاھاندانۋىن بىرگە دارىپتەپ، دۇنيە ءجۇزىنىڭ بەيبىت، حاۋىپسىز، گۇلدەنگەن، العا باسقان جارقىن بولاشاققا بەت الۋىن جەبەۋدى قالايدى.

حۋاڭ شۇنساي مىنالاردى ءبىلدىردى: سينگاپۋر مەن جۇڭگونىڭ دوستىعى ارىدان باستاۋ العان، ەكى جاق باستان ـ اياق ءوزارا قۇرمەت ەتىپ، ءبىر ـ بىرىنە سەنىم ارتتى، ەكى ەل قارىم ـ قاتىناسى ورنىقتى دامىدى، سەلبەستىگى جيىلەي ءتۇستى. سينگاپۋردىڭ ءار كەزەك باسشىلارى تۇگەلدەي جۇڭگومەن قارىم ـ قاتىناسقا ايرىقشا ءمان بەردى، جۇڭگو مەنىڭ تاعى دا مىندەتكە وتىرعاننان كەيىنگى شىعىس وڭتۇستىك ازيا وداعى ەلدەرىنەن سىرت تۇڭعىش ساپاردا بولعان مەملەكەت. سينگاپۋر ءبىر جۇڭگو ساياساتىنا ۇزدىكسىز تاباندى بولىپ، ”تايۋاندى دەربەستەندىرۋگە“ قارسى تۇرادى. ەكى ەل ديپلوماتيالىق قارىم ـ قاتىناس ورناتقاندىعىنىڭ 35 جىلدىعىن بىرگە قۇتتىقتاۋ ساتىندە، سينگاپۋر جاق جۇڭگونىڭ گۇلدەنىپ ـ دامۋى اكەلگەن ورايدان تولىق پايدالانىپ، ەكى جاقتى ساۋدا، قارجى قوسۋ كولەمىن ۇلعايتىپ، سيفرلى ەكونوميكا، جاساندى زەردە، جاڭا ەنەرگيا سياقتى سالالارداعى سەلبەستىكتى كەڭەيتىپ، گۋمانيتارلىق اۋىس ـ كۇيىستى كۇشەيتىپ، سينگاپۋر _ جۇڭگو قارىم ـ قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى. اۋمالى ـ توكپەلى حالىقارالىق جاعداي الدىندا، سينگاپۋر جاق جۇڭگو جاقپەن وڭىرلىك جانە كوپ جاقتى تۇعىردا سايكەسۋدى، سەلبەسۋدى جيىلەتىپ، كوپ جاقتىلىق پەن حالىقارالىق ءتارتىپتى بىرگە قورعاۋدى قالايدى، جۇڭگونىڭ، ءسوز جوق، دۇنيە ءجۇزىنىڭ بەيبىتشىلىگى ءۇشىن اناعۇرلىم ماڭىزدى رول ساۋلەلەندىرەتىندىگىنە سەنەدى.

ۋاڭ ي كەزدەسۋگە قاتىناستى.