«شي جينپيڭ ەكونوميكالىق يدەياسى تۋرالى جالپى شولۋ» باسپادان شىعىپ تاراتىلدى

شينحۋا اگەنتتىگى، 11 - ايدىڭ 10 - كۇنى، بەيجيڭ. شي جينپيڭ ەكونوميكالىق يدەياسىنىڭ وقۋلىققا، ساباقحاناعا، وي - ساناعا ەنۋىن ىلگەرىلەتۋ ءۇشىن، ورتالىق كوميتەتتىڭ ۇگىت ءبولىمى، مەملەكەتتىك دامۋ جانە رەفورما كوميتەتى ۇيىمداستىرىپ قۇراستىرعان ماركسيزم نازارياسىن زەرتتەۋ جانە قۇرۋ ينجەنەرياسىنداعى ءتۇيىندى وقۋلىق «شي جينپيڭ ەكونوميكالىق يدەياسى تۋرالى جالپى شولۋ» (تومەندە قىسقاشا «جالپى شولۋ» دەلىنەدى) اتتى كىتاپ جوعارى وقۋ - اعارتۋ باسپاسىنان، حالىق باسپاسىنان باسىلىپ شىقتى.

پارتيا 18 - قۇرىلتايىنان بەرى شي جينپيڭ جولداستى ۇيىتقى ەتكەن پارتيا ورتالىق كوميتەتى جۇڭحۋا ۇلتىنىڭ ۇلى گۇلدەنۋى سىندى ستراتەگيالىق جالپى جاعدايدى جانە دۇنيە جۇزىندە ءجۇز جىلدان بەرى بولماعان زور وزگەرىستى تياناق ەتىپ، جاعدايدىڭ جاڭا وزگەرىسى مەن امالياتتىڭ جاڭا تالابىن تەرەڭ يگەرىپ، ەلىمىزدىڭ ەكونوميكالىق دامۋىنىڭ امالياتتىق تاجىريبەلەرىن جۇيەلى قورىتىندىلاپ، اۋقىمدى باعامداپ، جالپى جاعدايدى كوزدەپ، ناقتى ىستەر ىستەپ، ەكونوميكالىق قىزمەتتىڭ زاڭدىلىعى جونىندەگى تانىمدى ۇزدىكسىز تەرەڭدەتىپ، ءبىرقىدىرۋ جاڭا ۇستانىم، جاڭا يدەيا، جاڭا ستراتەگيالاردى العا قويىپ، ەلىمىز ەكونوميكاسىنىڭ دامۋىندا تاريحي تابىستارعا قول جەتكىزۋگە، تاريحي وزگەرىستەر تۋدىرۋعا جەتەكشىلىك ەتىپ، شي جينپيڭ ەكونوميكالىق يدەياسىن قالىپتاستىردى.

«جالپى شولۋ» كىرىسپە جانە تەكست بولەگىندەگى 15 تاراۋدان قۇرالعان، جالپى 210 مىڭ ارىپتەن تۇرادى، بۇل شي جينپيڭ ەكونوميكالىق يدەياسىنىڭ كەلەلى ءمانى، تاريحي ورنى، ايقىن ەرەكشەلىگى، عىلمي جۇيەسى، نەگىزگى مازمۇنى، امالياتتىق تالابى سياقتىلاردى جۇيەلى بايىمداپ، شي جينپيڭ ەكونوميكالىق يدەياسىنىڭ شي جينپيڭ جاڭا ءداۋىر جۇڭگوشا سوتسياليزم يدەياسىنىڭ ماڭىزدى قۇرامداس بولىگى ەكەندىگىن تولىق بايىمدادى، بۇل − جۇڭگو كوممۋنيستىك پارتياسىنىڭ سوتسياليستىك ەكونوميكالىق دامۋ جولىن قاجىماي - تالماي قاراستىرۋىنان قالىپتاسقان باعالى يدەيالىق جاۋھار، ماركسيزمدىك ساياسي ەكونوميكانىڭ نەگىزگى قاعيدالارىن قولدانىپ، جاڭا داۋىردەگى ەكونوميكالىق دامۋ امالياتىنا جەتەكشىلىك ەتۋدەن قالىپتاسقان كەلەلى نازاريالىق جەتىستىك، جاڭا داۋىردەگى ەلىمىزدىڭ ەكونوميكالىق قىزمەتىنىڭ عىلمي ارەكەت باعدارناماسى. «جالپى شولۋ» ءتۇپ نۇسقاعا ادال بولۋعا تاباندى بولىپ، جۇيەلى، قاعيدالى بولۋدى كورنەكتىلەندىرىپ، وڭاي ۇيرەنۋگە، وڭاي قولدانۋعا باسا ءمان بەردى، بۇل − جوعارى مەكتەپتەردىڭ ەكونوميكا تۇرىندەگى كاسىپتىك وقۋشىلارىنىڭ شي جينپيڭ ەكونوميكالىق يدەياسىن جۇيەلى ۇيرەنۋدەگى، يگەرۋدەگى ءتۇيىندى وقۋلىعى ءارى قالىڭ پارتيا مۇشەلەرىنىڭ، كادرلاردىڭ شي جينپيڭ ەكونوميكالىق يدەياسىن ۇيرەنۋدەگى، تۇسىنۋدەگى ماڭىزدى وقۋلىعى.