مەملەكەتتىك كەڭەستىڭ تايۋان ىستەرى كەڭسەسى: ا ق ش – نىڭ جۇڭگونىڭ تايۋان رايونىنا قارۋ – جاراق ساتىپ بەرۋىنە باتىل قارسى تۇرامىز

شينحۋا اگەنتتىگىنىڭ 11 - ايدىڭ 15 – كۇنى بەيجيڭنەن بەرگەن حابارى. ا ق ش قورعانىس مينيسترلىگى جۇڭگونىڭ تايۋان رايونىنا قۇنى 330 ميلليون ا ق ش دوللارىندىق قارۋ - جاراق ساتۋ نىسانىن جاريالادى. دەموكراتيالىق العاباسارلىق پارتياسىنىڭ بيلەۋشىلەرى دەرەۋ العىس ايتتى. بۇل جونىندە مەملەكەتتىك كەڭەستىڭ تايۋان ىستەرى كەڭسەسىنىڭ مالىمدەمەشىسى چىن بينحۋا 11 – ايدىڭ 15 – كۇنى بىلاي دەدى: ءبىز ا ق ش - نىڭ جۇڭگونىڭ تايۋان رايونىنا قارۋ ـ جاراق ساتىپ بەرۋىنە باتىل قارسى تۇرامىز، بۇل تۇرعىمىز دايەكتى، ايقىن. ا ق ش جاقتىڭ بۇل ارەكەتى جۇڭگونىڭ يەلىك ۇقىعى مەن حاۋىپسىزدىك مۇددەسىنە اۋىر زيان جەتكىزىپ، ”تايۋاندى دەربەستەندىرۋدى“ كوزدەيتىن بولشەكتەۋشى كۇشتەرگە اۋىر قاتە سيگنال تاراتتى. ا ق ش – ىن جۇڭگو پرينسيبى مەن جۇڭگو - ا ق ش ءۇش بىرلەسكەن مازمۇنداماسىنا، وتە – موتە، ”17 – تامىز“ بەلگىلەمەسىنە تاباندى بولۋعا، ”تايۋاندى دەربەستەندىرۋدى“ كوزدەيتىن بولشەكتەۋشى كۇشتەردى ىرقىنا جىبەرۋدى، قولداۋدى توقتاتىپ، تايۋان ماسەلەسىن ابايلاپ ءبىر جاقتى ەتۋگە قۋزايمىز.

چىن بينحۋا بىلاي دەپ اتاپ كورسەتتى: ”تايۋاندى دەربەستەندىرۋ“ تايۋان بۇعازىنىڭ بەيبىتشىلىگىمەن وتاسا المايدى. لاي چيڭدى بيلىك باسىنا شىققاننان بەرى، سىرتقا ۇزدىكسىز جارامساقتانىپ، سوعىسقۇمارلىق ىستەپ، تايۋانداعى بۇقارانىڭ قان – تەرىمەن تاپقان اقشاسىن توگىپ - شاشىپ، تايۋاندى ”قارۋ - جاراق كۇبىسىنە“ اينالدىرىپ، تايۋان حالقىنىڭ اماندىعى مەن ىرىسىن قۇربان ەتۋدەن تايىنبادى. لاي چيڭدى بيلەۋشىلەرىنە ”سىرتقا سۇيەنىپ تايۋاندى دەربەستەندىرۋدىڭ“، ”قارۋ ارقىلى دەربەستەندىرۋىڭ“ ءوزىن – ءوزى تۇيىققا تىرەيتىن جول ەكەندىگىن ەسكەرتەمىز. ءبىز بارلىق قاجەتتى شارالاردى قولدانىپ، مەملەكەتتىڭ يەلىك ۇقىعىن، حاۋىپسىزدىگىن جانە تەرريتوريا تۇتاستىعىن باتىل قورعايمىز.

كەلۋ قاينارى: حالىق تورابى