دوسبول شينجياڭ ەرلەر مارافون جارىسىنىڭ رەكوردىن جاڭالادى

”وسىلاي بولادى دەپ ويلاعانمىن، جاتتىعۋىما ساي بولدى. ءوزىمدى جالعاستى ىلگەرىلەتەمىن، كەلەر جىلى ءتىپتى دە كۇش سالامىن“ دەدى 11 – ايدىڭ 23 – كۇنى كەشتە دوسبول قابىلجان ۇلى تىلشىگە. سول كۇنى ول چاڭجوۋدا وتكىزىلگەن 2025 جۇڭگو مارافون ساڭلاقتارىن قاتارعا تۇرعىزۋ جارىسىندا اعا جۇلدەگەر بولدى ءارى شينجياڭ ەرلەر مارافون جارىسىنىڭ رەكوردىن بۇزدى.

بۇل رەتكى جارىستا دوسبول 2 ساعات 12 مينۋت 40 سەكۋندتىق تاماشا ناتيجەگە قول جەتكىزدى، سونىمەن بىرگە تىلەۋقابىل تولەگەن ۇلىنىڭ 2023 - جىلى ۋشي مارافون جارىسىندا جاراتقان 2 ساعات 12 مينۋت 46 سەكۋندتىق بۇرىنعى شينجياڭ ەرلەر مارافون جارىسىنىڭ رەكوردىن بۇزىپ، حالىقارالىق دەڭگەيدەگى سپورت ساڭلاعىنىڭ ولشەمىنە جەتكەن شينجياڭدىق ءۇشىنشى مارافون سپورتشىسى بولدى.

22 جاستاعى دوسبول نىلقى اۋدانىنىڭ شاعىن ءبىر قىستاعىندا ءومىر ەسىگىن اشقان. قارشادايىنان تاۋ – تاس كەزىپ، ساحارادا ەرجەتكەندىكتەن، وكپە سيىمدىلىعى جانە جۇگىرۋ قۋاتى ەرەكشە كۇشتى بولادى. 2022 - جىلى دوسبول لياۋنيڭ ولكەلىك ورتا، ۇزاق ارالىققا جۇگىرۋ اترەتىنەن شەگىنىپ شىققان سوڭ، شينجياڭنىڭ مارافون جۇگىرۋشىلەرىمەن بىرگە جاتتىعادى. 2023 – جىلى 10 – ايدا ىلە وزەنى مارافون جارىسىندا 2 ساعات 21 مينۋت 22 سەكۋندتىق ناتيجەمەن ەرلەردىڭ تولىق مارافون جارىسىندا اعا جۇلدەگەر بولادى.

كەلۋ قاينارى: حالىق تورابى