ورتالىق اۋا رايى ستانسياسى بورانعا قاتىستى كوك ءتۇستى ساقتىق دابىلىن جالعاستى قاقتى

حالىق گازەتىنىڭ ءتىلشىسى جياڭ شۋەحۇڭ 11 – ايدىڭ 24 – كۇنى بەيجيڭنەن حابارلايدى. اۋا رايىن باقىلاۋعا قاراعاندا، 11 – ايدىڭ 24 – كۇنى كۇندىز ىشكى موڭعۇل، حەيلۇڭجياڭ قاتارلى جەرلەردە قار جاۋعان، ىشكى موڭعۇل، سولتۇستىك جۇڭگو قاتارلى جەرلەردە بوران سوعىپ، تەمپەراتۋرا تومەندەگەن.

ورتالىق اۋا رايى ستانسياسىنىڭ مەجەلەۋىنشە، 11 – ايدىڭ 24 – كۇنى كەشتەن 11 – ايدىڭ 25 – كۇنىنە دەيىن، ءبىرشاما كۇشتى سۋىق اعىس ەلىمىزدىڭ ورتا – شىعىس بولىگىندەگى وڭىرلەرگە ىقپال جاساپ، تەمپەراتۋرا جاپپاي 4 – 6 گرادۋس تومەندەيدى، سولتۇستىكتەگى وڭىرلەردە تەمپەراتۋرانىڭ تومەندەۋ مولشەرى 8 – 12 گرادۋسقا دەيىن بولادى، چاڭجياڭنىڭ سولتۇستىگىندەگى وڭىرلەردە قيىس سولتۇستىكتەن 4 – 7 بال جەل سوعادى، ءبىر ءبولىم جەرلەردە ۇيتقىمالى جەل كۇشى 8 – 10 بالعا جەتەدى، شىعىس – سولتۇستىكتەگى وڭىرلەردە از مولشەردەن ورتاشا مولشەرگە دەيىن قار جاۋادى. 11 – ايدىڭ 25 – كۇنىنەن 27 – كۇنىنە دەيىن، تاعى ءبىر رەت ءبىرشاما قاتتى سۋىق اعىس سولتۇستىكتەن وڭتۇستىككە قاراي ەلىمىزگە ىقپال جاسايدى، ەلىمىزدىڭ كوپ ءبولىم وڭىرلەرىندە تەمپەراتۋرا 4 – 8 گرادۋس تومەندەيدى، ءبىر ءبولىم وڭىرلەردە تەمپەراتۋرا 10 – 12 گرادۋس تومەندەيدى، وسىعان ىلەسە قيىس سولتۇستىكتەن 4 – 7 بال جەل سوعادى، ءبىر ءبولىم وڭىرلەردە ۇيتقىمالى جەل كۇشى 8 – 10 بال بولادى؛ شينجياڭنىڭ ورتا – سولتۇستىك بولىگىندە، باتىس – سولتۇستىكتەگى وڭىرلەردە، سولتۇستىك جۇڭگونىڭ سولتۇستىك بولىگىندە جانە شىعىس – سولتۇستىكتەگى وڭىرلەردە از مولشەردەن ورتاشا مولشەرگە دەيىن قار جاۋادى نەمەسە قار ارالاس جاڭبىر جاۋادى، مۇنىڭ ىشىندە، شينجياڭداعى تيانشان تاۋلى ءوڭىرى، شىعىس – سولتۇستىكتەگى وڭىرلەردىڭ شىعىس بولىگى قاتارلى جەرلەردىڭ ءبىر ءبولىم وڭىرلەرىندە قالىڭ قار نەمەسە ەرەكشە قالىڭ قار جاۋادى. 11 – ايدىڭ 24 – كۇنى ساعات 18 دە، ورتالىق اۋا رايى ستانسياسى بورانعا قاتىستى كوك ءتۇستى ساقتىق دابىلىن جالعاستى قاقتى.

الداعى ءۇش كۇن ىشىندە، سولتۇستىكتەگى وڭىرلەردە سۋىق اعىس ءجيى تۋىلادى، ىشكى موڭعۇل، گانسۋ، شىعىس – سولتۇستىكتەگى وڭىرلەر، سونداي – اق، شينجياڭنىڭ سولتۇستىك بولىگى، چيڭحاي – شيزاڭ ءۇستىرتىنىڭ شىعىس بولىگى قاتارلى جەرلەردە از مولشەردەن ورتاشا مولشەرگە دەيىن قار جاۋادى، ءبىر ءبولىم جەرلەردە قالىڭ قار نەمەسە ەرەكشە قالىڭ قار جاۋادى، بوران سوعۋ، قۇمدى بوران سوعۋ، تەمپەراتۋرانىڭ تومەندەۋى، جاڭبىر نەمەسە قار جاۋۋ قاتارلى اۋا رايىنا جولىققاندا، اۋا رايىنىڭ ەنەرگيامەن قامداۋ، ادامداردىڭ دەنساۋلىعىن قورعاۋ، قۇرىلعىلاردىڭ حاۋىپسىزدىگى، قالا مەن اۋىلدا ورتتەن ساقتانۋ قاتارلى جاقتارداعى ىقپالىنا نازار اۋدارۋ قاجەت.

كەلۋ قاينارى: حالىق تورابى