ەلىمىز اسكەري جانە حالىقتىق ماقساتتا بىردەي قولدانىلاتىن زاتتاردى جاپونياعا ەكسپورت ەتۋدى تەجەۋدى كۇشەيتەدى

شينحۋا اگەنتتىگىنىڭ 1 – ايدىڭ 6 – كۇنى بەيجيڭنەن بەرگەن حابارى. ساۋدا مينيسترلىگى 1 – ايدىڭ 6 – كۇنى ۇقتىرۋ جاريالاپ، اسكەري جانە حالىقتىق ماقساتتا بىردەي قولدانىلاتىن زاتتاردى جاپونياعا ەكسپورت ەتۋدى تەجەۋ شارالارىن كۇشەيتۋدى ۇيعارعان، ۇقتىرۋ جاريالانعان كۇننەن باستاپ رەسمي اتقارىلادى.

ساۋدا مينيسترلىگىنىڭ مالىمدەمەشىسى وسى جونىندە جاۋاپ قايتارعاندا مىنانى بىلدىرگەن: جاپونيا باسشىلارى جۋىردا اشىقتان – اشىق تايۋانعا قاتىستى قاتە سوزدەرى جاريالاپ، تايۋان بۇعازى ىستەرىنە قارۋلى كۇشپەن كيلىگۋ ىقتيمالدىعىنىڭ بار ەكەنىن ەمەكسىتىپ، جۇڭگونىڭ ىشكى ىستەرىنە دورەكىلىكپەن كيلىگىپ، ءبىر جۇڭگو پرينسيبىنە اۋىر دارەجەدە قايشىلىق جاساعان، سيپاتى مەن ىقپالى توتەنشە ناشار بولعان.

مالىمدەمەشى مىنانى اتاپ كورسەتتى: مەملەكەتتىڭ حاۋىپسىزدىگى مەن مۇددەسىن قورعاۋ، كەڭ كولەمدى قىرعىنداعىش قارۋلاردىڭ تارالۋىنان ساقتانۋ قاتارلى حالىقارالىق بورىشىن اتقارۋ ءۇشىن، «جۇڭحۋا حالىق رەسپۋبليكاسىنىڭ ەكسپورتتى باسقارۋ – تەجەۋ زاڭى»، «جۇڭحۋا حالىق رەسپۋبليكاسىنىڭ اسكەري جانە حالىقتىق ماقساتتا بىردەي قولدانىلاتىن زاتتاردى ەكسپورت ەتۋدى باسقارۋ – تەجەۋ ەرەجەسى» قاتارلى زاڭ – ەرەجەلەردەگى قاتىستى بەلگىلەمەلەرگە ساي، جۇڭگو جاق اسكەري جانە حالىقتىق ماقساتتا بىردەي قولدانىلاتىن زاتتاردى جاپونياداعى اسكەري ىستەرمەن شۇعىلداناتىن كليەنتتەرگە جانە اسكەري ماقساتتا پايدالانۋعا، سونداي – اق، باسقا دا ەڭ سوڭعى ماقساتى جاپونيانىڭ اسكەري كۇش – قۋاتىن ارتتىرۋعا ءتيىمدى بولۋ ءۇشىن قولدانۋشىلارعا، قاجەتتىلىكتەرگە بايلانىستى ەكسپورت ەتۋگە تيىم سالادى. ءارقانداي مەملەكەت پەن رايونداعى ءارقانداي ۇيىم مەن جەكە وسى بەلگىلەمەگە قايشىلىق جاساپ، جۇڭحۋا حالىق رەسپۋبليكاسىندا وندىرىلگەن اسكەري جانە حالىقتىق ماقساتتا بىردەي قولدانىلاتىن زاتتاردى جاپونياعا جوتكەسە نەمەسە جاپونياداعى ۇيىمدار مەن جەكەلەردى وسى زاتتارمەن قامداسا، زاڭدىق جاۋاپكەرشىلىگى زاڭ بويىنشا قۋزاستىرىلادى.

كەلۋ قاينارى: حالىق تورابى