مەملەكەت وڭدەلگەن مۇناي باعاسىنا ۋاقىتتىق تەجەۋ شاراسىن اتقاردى 

حالىق گازەتىنىڭ ءتىلشىسى ليۋ جىچياڭ 3 – ايدىڭ 23 – كۇنى بەيجيڭنەن حابارلايدى. ءتىلشىنىڭ مەملەكەتتىك دامۋ – رەفورما كوميتەتىنەن ۇعىسۋىنشا، 3 – ايدىڭ 9 – كۇنى ەل ىشىندەگى وڭدەلگەن مۇناي باعاسى رەتتەلگەننەن بەرى، ا ق ش – يزرايل – يران قاقتىعىسىنىڭ ۋشىعۋىنىڭ ىقپالىنا ۇشىراعاندىقتان، حالىقارالىق بازاردا شيكىزاتتىق مۇناي باعاسى زور مولشەردە قىمباتتاعان، وتە - موتە، ورتا شىعىس وڭىرىندەگى شيكىزاتتىق مۇناي باعاسى تاريحتاعى ەڭ جوعارى دەڭگەيدى قايتا – قايتا جاڭالاعان. حالىقارالىق مۇناي باعاسىنىڭ قالىپسىز قىمباتتاۋىنان تۋىندايتىن سوققىنى جەڭىلدەتۋ، تومەنگى تىزبەكتەگى پايدالانۋشىلاردىڭ اۋىرتپالىعىن ازايتۋ، ەكونوميكانىڭ ورنىقتى اينالىمى مەن حالىق تۇرمىسىنا كەپىلدىك ەتۋ ءۇشىن، قازىر اتقارىلىپ وتىرعان باعا مەحانيزمى جۇلگەسىن ساقتاۋ نەگىزىندە، ەل ىشىندەگى وڭدەلگەن مۇناي باعاسىنا ۋاقىتتىق تەجەۋ شاراسى اتقارىلادى.

قازىر اتقارىلىپ وتىرعان باعا مەحانيزمى بويىنشا ەسەپتەلگەندە، 3 – ايدىڭ 23 – كۇنى ساعات 24 تەن باستاپ، ەل ىشىندەگى بەنزين مەن ديزەل مايىنىڭ باعاسى (ولشەمدى ءونىم) ءار تونناسىنا جەكە – جەكە 2205 يۋان، 2120 يۋان جوعارىلاتىلۋى قاجەت بولاتىن، تەجەۋ شاراسى اتقارىلعاننان كەيىن ءىس جۇزىندە 1160 يۋان، 1115 يۋان جوعارىلاتىلادى. ليتر بويىنشا ەسەپتەگەندە، وسى رەتكى تەجەۋ شاراسى اتقارىلعاننان كەيىن، ەل ىشىندەگى بەنزين مەن ديزەل مايىنىڭ (ولشەمدى ءونىم) ءار ليترىنىڭ باعاسى جەكە – جەكە 0.87 يۋان اينالاسىندا، 0.95 يۋان اينالاسىندا جوعارىلاتىلادى، تەجەۋ شاراسى اتقارىلماعان جاعدايمەن سالىستىرعاندا، ءار ليترىنىڭ قىمباتتاۋ مولشەرى 0.85 يۋان اينالاسىندا از بولعان.

مەملەكەتتىك دامۋ – رەفورما كوميتەتىنىڭ جاۋاپتىسىنىڭ ايتۋىنشا، وڭدەلگەن مۇناي ءوندىرۋ – ساتۋمەن شۇعىلداناتىن سەرىكتەستىكتەردىڭ وڭدەلگەن مۇنايدى ءوندىرۋ جانە تاسىمالداۋدى ويداعىداي ۇيىمداستىرۋىنا، بازاردى ورنىقتى قامداۋعا كەپىلدىك ەتۋىنە جەتەكشىلىك ەتەدى، سونىمەن بىرگە، قاتىستى تاراۋلارمەن بىرگە بازاردى باقىلاۋ – باسقارۋ تەبىنىن كۇشەيتىپ، مەملەكەتتىڭ باعاعا قاتىستى ساياساتتارىن اتقارماۋ قاتارلى زاڭ – تۇزىمگە قايشى ارەكەتتەردى قاتاڭ تەكسەرىپ ءبىرجاقتى ەتىپ، بازاردىڭ قالىپتى ءتارتىبىن، تۇتىنۋشىلاردىڭ ۇقىق – مۇددەسىن شىنايى قورعايدى.

كەلۋ قاينارى: حالىق تورابى