مەملەكەتتىك بازاردى باقىلاۋ – باسقارۋ باس مەڭگەرمەسى وسىمدىك مايىنا زاڭسىز قوسپا قوسۋ ارەكەتىنە سوققى بەردى 

جۇمىسشىلار گازەتىنىڭ ءتىلشىسى جياڭ حان حابارلايدى. ءتىلشىنىڭ جۋىردا مەملەكەتتىك بازاردى باقىلاۋ – باسقارۋ باس مەڭگەرمەسىنەن ۇعىسۋىنشا، ازىق – تۇلىك حاۋىپسىزدىگى قورعانىس شەبىن بەكەمدەپ، وسىمدىك مايىنا زاڭسىز قوسپا قوسۋ ارەكەتىنە ءونىمدى سوققى بەرۋ ءۇشىن، اتالعان مەڭگەرمە «ازىق – تۇلىككە قاتىستى قوسىمشا تەكسەرۋ ءادىسى: وسىمدىك مايىنداعى ەتيل مالتوفەنولدى انىقتاۋ(BJS202604) » جونىندەگى قۇجاتتى جاريالاعان.

وسىمدىك مايى كوپشىلىكتىڭ كۇندەلىكتى تۇرمىسىندا كەم بولسا بولمايتىن ازىقتىق، ونىڭ ساپالىق حاۋىپسىزدىگى جۇرتشىلىقتىڭ دەنساۋلىعىمەن تىكەلەي قاتىستى. ەتيل مالتوفەنول — جاساندى جولمەن سينتەزدەلگەن ازىق – تۇلىك ءيىستى قوسپاسى، بەلگىلەمەگە قايشى تۇردە قوسىلعان ەتيل مالتوفەنولدى ۇزاق ۋاقىت تۇتىنۋ ازىق – تۇلىك حاۋىپسىزدىگىنە ساياتىن قاتەر تۋدىرادى.

ەلىمىزدىڭ ازىق – تۇلىك قوسپاسىن پايدالانۋ ولشەمىندەگى بەلگىلەمەگە ساي، ەتيل مالتوفەنولدى وسىمدىك مايىنا قوسۋعا قاتاڭ تيىم سالىنادى. الايدا، مول پايدا تابۋدى كوزدەگەن زاڭسىز ساۋداگەرلەر ساپاسىز وسىمدىك مايىنا، ىستەتۋ مەرزىمى وتكەن جاڭعىرتپالى مايعا زاڭسىز تۇردە ەتيل مالتوفەنولدى قوسىپ، ماي قۇرامىنىڭ توتىعىپ وزگەرۋىنەن تۋىنداعان بورسىعان ءيىستى جاسىرىپ، كۇنجىت مايى، جەر جاڭعاق مايى قاتارلى جوعارى دارەجەلى مايلاردىڭ جاعىمدى يىسىنە ۇقساتىپ جالعاننان جاساپ، ساپاسىزىن ساپالى دەپ وتكىزىپ، جالعان ءونىمدى شىن ءونىمنىڭ ورنىندا ساتىپ، وسى ارقىلى زاڭسىزدىقپەن مول كىرىس كىرگىزۋ ماقساتىنا جەتەدى.

جاڭا جاريالانعان قوسىمشا تەكسەرۋ ءادىسى تەكسەرۋ بارىسىن ساپالىلاندىرىپ، سويا بۇرشاق مايى، جەر جاڭعاق مايى، كۇنجىت مايى قاتارلى نەگىزگى وسىمدىك مايى تۇرلەرىنە ۇيلەستىرىلگەن، انىقتاۋ شەگى تومەن، كەدەرگىگە ۇشىراماۋ قۋاتى كۇشتى، ناتيجەسى ورنىقتى، سەنىمدى بولۋ ارتىقشىلىعىنا يە، ول ارقىلى ەتيل مالتوفەنولدى دالمە – ءدال انىقتاۋعا جانە مولشەرلەۋگە بولادى.

كەلۋ قاينارى: حالىق تورابى