دەنە تاربيە باس مەڭگەرمەسى گيمناستيكا ورتالىعىنىڭ مالىمدەمەسى 

8 - ايدىڭ 11 – كۇنى مەملەكەتتىك دەنە تاربيە باس مەكەمەسى گيمناستيكا سپورتىن باسقارۋ ورتالىعى مالىمدەمە جاريالادى. مالىمدەمەنىڭ تولىق مازمۇنى مىناداي:

جۋىردا مەملەكەتتىك دەنە تاربيە باس مەڭگەرمەسى گيمناستيكا سپورتىن باسقارۋ ورتالىعى (تومەندە قىسقارتىلىپ گيمناستيكا ورتالىعى دەلىنەدى) ازيا سپورت جينالىسى مەن دۇنيە جۇزىلىك جۇلدەلى جارىستارعا سپورتشى تاڭداۋ ءادىسى جانە قاتىستى بەلگىلەمەلەردى قاتاڭ اتقارىپ، ادىلدىك، ادىلەتتىلىك، اشىقتىق پرينسيپىن ۇستانىپ، مەملەكەتتىك گيمناستيكا كومانداسىنىڭ ازيا سپورت جينالىسى مەن دۇنيە جۇزىلىك جۇلدەلى جارىستارعا قاتىناساتىن قۇرامىنىڭ مۇشەلەرىن تاڭداۋ قىزمەتىن ءساتتى ورىندادى.

ازيا سپورت جارىسىنا قاتىناساتىنداردىڭ تىزىمدىگى جاريالانعاننان كەيىن، ءىشىنارا جەكەلىك مەديالار مەن توراپتاستار شىندىقپەن ساناسپاي، ”جانكۇيەرلەر شوعىرى“ فورماسىندا وسەك – اياڭ تاراتىپ، شىندىققا جاناسپايتىن ينفورماتسيالاردى تاراتقان ءارى قاساقانا تومەندەتۋ، شابۋىلداۋ قاتارلى تاسىلدەردى قولدانىپ، سارالانعان سپورتشىلار مەن جاتتىقتىرۋشىلار تۋرالى ءجونسىز پىكىر بىلدىرگەن. بۇل ارەكەتتەر مەملەكەتتىك گيمناستيكا كومانداسىنىڭ قالىپتى جاتتىعۋ جاساۋ جانە جارىسقا دايىندالۋ ءتارتىبىن اۋىر دارەجەدە ءبۇلدىرىپ، قاتىستى قىزمەتكەرلەردىڭ قىزمەتىنە، تۇرمىسىنا جانە وتباسىنا ناقتى اۋرەشىلىك تۋدىردى.

ينتەرنەت كەڭىستىگى وركەنيەتتىلىك پەن اقىل – پاراساتتىلىقتى قاجەت ەتەدى. ينتەرنەت كەڭىستىگىندە جانە باسقا دا قوعامدىق الەۋمەتتىك ورىنداردا مەملەكەتتىك گيمناستيكا كومانداسىن جانە ونىڭ مۇشەلەرىن قورلاۋ، ول جايلى وسەك – اياڭ تاراتۋ، اڭىستى بۇرمالاۋ، جات نيەتپەن جورامالداۋ قاتارلى ارەكەتتەرگە گيمناستيكا ورتالىعى ايرىقشا نازار اۋداردى ءارى قوعامداعى ءار سالاعىلاردى وسىنداي ناشار قۇبىلىستاردى بىرگە تيۋعا ۇندەدى. سونىمەن بىرگە، گيمناستيكا ورتالىعى قاتىستى ۇقىق قورعاۋ ءتارتىبىن ىسكە قوسىپ، ۇقىققا قول سۇعۋعا ساياتىن دالەل - ىسپاتتاردى زاڭ بويىنشا جينايدى، تۇراقتاندىرادى ءارى ينتەرنەت حاۋىپسىزدىگى تاراۋلارى، قوعام حاۋىپسىزدىگى تاراۋلارى قاتارلى قاتىستى تاراۋلارمەن بەلسەندى تۇردە سايكەسىپ، قاجەتتى شارالار قولدانىپ، وسى ىسكە قاتىستى تىركەلگىلەردىڭ، قاتىستى ۇيىمدار مەن قىزمەتكەرلەردىڭ زاڭدىق جاۋاپكەرشىلىگىن قۋزاستىرادى.

ءبىز بارشا گيمناستيكا جانكۇيەرلەرىنىڭ وسى سپورت تۇرىنە دەگەن قىزۋ سۇيىسپەنشىلىگىن جانە سپورتشىلارعا جاساعان قولداۋىن تۇسىنەمىز جانە قۇرمەتتەيمىز، سونداي – اق گيمناستيكا جانكۇيەرلەرىنىڭ وزدەرى كوڭىل ءبولىپ وتىرعان ىستەردى بايسالدى، اقاۋسىز تاسىلمەن ءبىلدىرۋىن شىن جۇرەكتەن ءۇمىت ەتەمىز. جۇڭگونىڭ گيمناستيكا ىستەرىنىڭ گۇلدەنىپ - كوركەيۋى قوعامداعى ءار سالاداعىلاردىڭ قامقورلىعى مەن قولداۋىنان قول ۇزە المايدى، گيمناستيكانى شىنايى جاقسى كورەتىن بارشا دوستاردىڭ قولداۋىنان ءتىپتى دە ايرىلا المايدى. گيمناستيكا ورتالىعى كوپشىلىكپەن بىرگە پاك، بەرەكەلى ينتەرنەت ورتاسىن بىرگە قورعاۋدى قالايدى.

گيمناستيكا ورتالىعى مەملەكەتكە داڭق اپەرۋ، جۇڭحۋانىڭ دەنە تاربيە رۋحىن ساۋلەلەندىرۋدى ءوز مىندەتى ەتىپ، باسقارۋدى كۇشەيتىپ، ءوز قابىلەتىن جوعارىلاتىپ، مەملەكەتتىك كوماندانىڭ باسەكەلىك دەڭگەيىن جوعارىلاتىپ، دەنە تاربيەدە قۋاتتى ەل قۇرۋدىڭ جاڭا ساپارى بارىسىندا تيەسەلى ۇلەسىن قوسۋدى جالعاستىرادى.

كەلۋ قاينارى: حالىق تورابى