جۋ رۇڭجي جولداس قايتىس بولدى

جۋ رۇڭجي جولداستىڭ ءومىرى توڭكەرىستىك ءومىر، جاۋىنگەرلىك ءومىر، شۇعىلالى ءومىر، بۇكىل ىنتا - پەيىلىمەن حالىق ءۇشىن قىزمەت ىستەگەن، كوممۋنيزم ىستەرىنە ءوزىن ارناعان ءومىر.

شينحۋا اگەنتتىگى، 8 - ايدىڭ 12 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى، جۇڭحۋا حالىق رەسپۋبليكاسى مەملەكەتتىك حالىق قۇرىلتايى تۇراقتى كوميتەتى، جۇڭحۋا حالىق رەسپۋبليكاسى مەملەكەتتىك كەڭەسى، جۇڭگو حالىق ساياسي ءماسليحات كەڭەسى مەملەكەتتىك كوميتەتى مىنانى قايعىرا جاريالايدى: جۇڭگو كوممۋنيستىك پارتياسىنىڭ تاڭداۋلى مۇشەسى، ۇزاق سىننان وتكەن ادال كوممۋنيزم جاۋىنگەرى، ۇزدىك پرولەتاريات توڭكەرىسشىسى، ساياساتشى، پارتيا مەن مەملەكەتتىڭ كورنەكتى باسشىسى، جۇڭگو كوممۋنيستىك پارتياسى 14 - ، 15 - كەزەكتى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ بۇرىنعى زۇڭليى جۋ رۇڭجي جولداس اۋىرىپ، ەمدەۋ ءونىم بەرمەي، 2026 - جىلى 8 - ايدىڭ 12 - كۇنى ساعات 11 دەن 6 مينۋت وتكەندە 98 جاسىندا بەيجيڭدە قايتىس بولدى.

جۋ رۇڭجي جولداس 1928 - جىلى 10 - ايدا تۋىلعان، حۋنان ولكەسىنىڭ چاڭشا قالاسىنان. 1948 - جىلى 12 - ايدا توڭكەرىستىك قىزمەتكە قاتىناسقان، 1949 - جىلى 10 - ايدا جۇڭگو كوممۋنيستىك پارتياسىنا مۇشە بولعان. ول جاس ءوسپىرىم كەزىندە وتاندى قىزۋ ءسۇيىپ، قۇلشىنا ۇيرەنىپ، ىزدەنە العا باسىپ، وتان ءۇمىتىن اقتاۋدى مۇرات ەتتى. 1947 - جىلدان 1951 - جىلعا دەيىن چيڭحۋا داشۋەسى ەلەكتر ماشينا جانە ەلەكتر اسپاپتارىن جاساۋ فاكۋلتەتىنىڭ ەلەكتر ماشينا جانە ەلەكتر اسپاپتارىن جاساۋ كاسىبىن وقىدى ءارى ”جاڭا دەموكراتيالىق جاستار وداعىنا“ قاتىناستى. 1951 - جىلدان 1952 - جىلعا دەيىن شىعىس سولتۇستىك ونەركاسىپ مينيسترلىگى جوسپارلاۋ باسقارماسى ءوندىرىس جوسپارلاۋ كەڭسەسى مەڭگەرۋشىسىنىڭ ورىنباسارى بولدى. 1952 - جىلدان 1958 - جىلعا دەيىن مەملەكەتتىك جوسپارلاۋ كوميتەتى جانارزات مەكەمەسىنىڭ، جالپىلىق مەكەمەنىڭ باستىعى، مەملەكەتتىك جوسپارلاۋ كوميتەتى مەڭگەرۋشىلەر كەڭسەسى باسقارما باستىعىنىڭ ورىنباسارى، مەملەكەتتىك جوسپارلاۋ كوميتەتى مەحانيكا مەكەمەسى جالپىلىق باسقارماسى باستىعىنىڭ ورىنباسارى بولدى. 1958 - جىلدان 1969 - جىلعا دەيىن مەملەكەتتىك جوسپارلاۋ كوميتەتى كادرلار كاسىپتەن سىرتقى مەكتەبىنىڭ وقىتۋشىسى، حالىق شارۋاشىلىعى جالپىلىق مەكەمەسىنىڭ ينجەنەرى بولدى. 1970 - جىلدان 1975 - جىلعا دەيىن مەملەكەتتىك جوسپارلاۋ كوميتەتىنىڭ ”7 - مامىر“ كادرلار مەكتەبىنە جىبەرىلدى. 1975 - جىلدان 1979 - جىلعا دەيىن مۇناي ونەركاسىبى مينيسترلىگى قۇبىر جولى مەكەمەسى ەلەكترلى حابارلاسۋ ينجەنەرياسى سەرىكتەستىگى كەڭسەسى مەڭگەرۋشىسىنىڭ ورىنباسارى، ورىنباسار مەڭگەرۋشى ينجەنەرى، جۇڭگو قوعامدىق عىلىمدار اكادەمياسى ونەركاسىپ ەكونوميكاسىن زەرتتەۋ ورنى كەڭسەسىنىڭ مەڭگەرۋشىسى بولدى. 1979 - جىلدان 1983 - جىلعا دەيىن مەملەكەتتىك ەكونوميكا كوميتەتى جانارزات مەكەمەسىنىڭ باستىعى، جالپىلىق ىستەر مەكەمەسى باستىعىنىڭ ورىنباسارى، تەحنيكا وزگەرتۋ مەكەمەسىنىڭ باستىعى، مەملەكەتتىك ەكونوميكا كوميتەتىنىڭ مۇشەسى بولدى. 1983 - جىلدان 1987 - جىلعا دەيىن مەملەكەتتىك ەكونوميكا كوميتەتى مەڭگەرۋشىسىنىڭ ورىنباسارى، پارتيا باسشىلىق گرۋپپاسىنىڭ مۇشەسى، مەملەكەتتىك ەكونوميكا كوميتەتى مەڭگەرۋشىسىنىڭ ورىنباسارى، پارتيا باسشىلىق گرۋپپاسى شۋجيىنىڭ ورىنباسارى بولدى. 1987 - جىلدان 1991 - جىلعا دەيىن شاڭحاي قالالىق پارتكومنىڭ ورىنباسار شۋجيى، قالا باستىعى، قالالىق پارتكومنىڭ شۋجيى بولدى. ول شاڭحاي ونەركاسىپ ءتۇزىلىسىن رەتتەۋدى، جاڭا دامۋ ابزالدىعىن قايتا ۇيىمداستىرۋدى، حالىقارالىق باسەكەلىك قۋاتتى ارتتىرۋدى، سىرتقا بەت العان ەكونوميكانى دامىتۋ جولىندا ءجۇرۋدى العا قويىپ، پۋدۇڭدى اشۋ – كوركەيتۋدىڭ ماندىك باسقىشقا كىرۋىن ىلگەرىلەتىپ، شاڭحايدىڭ ىشكەرىلەي رەفورما جاساپ، ەسىك اشۋىنا جانە دامۋىنا نەگىز قالادى. 1991 - جىلى جۋ رۇڭجي جولداس مەملەكەتتىك كەڭەس زۇڭليىنىڭ ورىنباسارى، قوسىمشا مەملەكەتتىك كەڭەس ءوندىرىس كەڭسەسىنىڭ مەڭگەرۋشىسى، پارتيا باسشىلىق گرۋپپاسىنىڭ شۋجيى، قوسىمشا مەملەكەتتىك كەڭەس ەكونوميكا - ساۋدا كەڭسەسىنىڭ مەڭگەرۋشىسى، پارتيا باسشىلىق گرۋپپاسىنىڭ شۋجيى بولدى، ماشينا - ەلەكتر ەنەرگياسى، تەمىر جول قاتىناسى، مەتاللۋرگيا حيميا ونەركاسىبى، جەڭىل ونەركاسىپ، توقىماشىلىق سياقتى قىزمەتتەرگە جاۋاپتى بولدى. 1992 - جىلى 10 - ايدا جۋ رۇڭجي جولداس جۇڭگو كوممۋنيستىك پارتياسى 14 - كەزەكتى ورتالىق كوميتەتىنىڭ ءبىرىنشى جالپى ماجىلىسىندە ورتالىق كوميتەت ساياسي بيۋروسىنىڭ مۇشەسى، تۇراقتى مۇشەسى بولىپ سايلانىپ، مەملەكەتتىك كەڭەستىڭ ۇنەمىلىك قىزمەتىنە جاۋاپتى بولدى. 1993 - جىلى 6 - ايدا جۇڭگو حالىق بانكەسىنىڭ باستىعى مىندەتىن قوسىمشا اتقاردى. ول دىڭ شياۋپيڭ جولداستىڭ وڭتۇستىكتى كوزدەن كەشىرگەندە سويلەگەن ءسوزىنىڭ رۋحىن بەلسەنە ۇگىتتەپ، دايەكتىلەندىرىپ، پارتيا 14 - قۇرىلتايىنىڭ رۋحىن دايەكتىلەندىرىپ، تياناقتاندىرىپ، رەفورما جاساپ، ەسىك اشۋ جانە وسىزامانداندىرۋ قۇرىلىسىن كۇش سالا ىلگەرىلەتتى. ”ءۇش جاق قارىزىن“ انىقتاۋدى ورىستەتىپ، تۇبەگەيلى تۇزەۋدى تياناق ەتىپ، كاسىپورىنداردىڭ تيجارات قۋاتىن كۇشەيتتى. ماكرولىق تىزگىندەۋدى كۇشەيتۋدىڭ جانە جاقسارتۋدىڭ وي جەلىسى مەن شارالارىن زەرتتەپ بەلگىلەپ، تانىمدى اناعۇرلىم بىرلىككە كەلتىرىپ، ەكونوميكانىڭ سۇراپىل ءوسۋىن جونگە سالۋ، اقشانىڭ قۇنسىزدانۋىن تەجەۋ، ”جەڭىل قونۋدى“ جۇزەگە اسىرۋ جولىندا قىرۋار ءونىمدى قىزمەت ىستەدى. قازىنا – باجى ءتارتىبىن كۇش سالا رەتكە سالىپ، قازىنا - ەكونوميكا ءتارتىبىن قاتايتىپ، باجى الۋ - باسقارۋدى كۇشەيتىپ، قازىنا - باجى رەفورماسىن جەدەلدەتىپ، فينانستى تىزگىندەۋ جۇيەسىن كەمەلدەندىردى. استىق باعاسى مەن الۋ - ساتۋ قۇرىلىمى رەفورماسىن ىلگەرىلەتىپ، سوتسياليستىك بازار شارۋاشىلىعىنىڭ تالابىنا ۇيلەسەتىن استىق ساتىپ الۋ - ساتۋ قۇرىلىمىن ورناتىپ، شارۋالاردىڭ ەركى نەگىزىندە ەگىنشى ءىرى وتباسىلاردىڭ كوتەرمەگە الۋىن اتقارىپ، لايىقتى كولەمدەگى شارۋاشىلىقتى دامىتتى. 1997 - جىلى 9 - ايدا جۋ رۇڭجي جولداس جۇڭگو كوممۋنيستىك پارتياسى ورتالىق كوميتەتىنىڭ 15 - كەزەكتى ءبىرىنشى جالپى ماجىلىسىندە تاعى دا ورتالىق كوميتەت ساياسي بيۋروسىنىڭ مۇشەسى، تۇراقتى مۇشەسى بولىپ سايلاندى. 1998 - جىلى 3 - ايدا 9 - كەزەكتى مەملەكەتتىك حالىق قۇرىلتايىنىڭ 1 - ماجىلىسىندە ول مەملەكەتتىك كەڭەستىڭ زۇڭليلىگىنە تاعايىندالدى، كەيىن مەملەكەتتىك كەڭەس پارتيا باسشىلىق گرۋپپاسىنىڭ شۋجيى بولدى. ازيا فينانس داعدارىسىنىڭ سوققىسى مەن ەل ىشىندەگى ەرەكشە اۋىر تاسقىن اپاتى الدىندا، ول پارتيا ورتالىق كوميتەتىنىڭ ورنالاستىرۋى بويىنشا، لايىقتى تارتا ۇستالاتىن قازىنا، اقشا ساياساتىن اتقارۋدى بەلسەندى قازىنا ساياساتى مەن ورنىقتى اقشا ساياساتىن اتقارۋعا اينالدىرىپ، ىشكى سۇرانىمدى كۇش سالا كەڭەيتىپ، ءتۇيىندى سالالارداعى رەفورمانى تەرەڭدەتىپ، ەكونوميكانىڭ ورنىقتى، تەز ارتۋىن ساقتادى. كاسىپ قۇرىلىمىن، رايون قۇرىلىمىن جانە قالا - قىستاق قۇرىلىمىن جاپپاي رەتتەپ، جوعارى، جاڭا تەحنيكالى كاسىپتەردى، اسىرەسە، ينفورماتسيا كاسىپتەرىن بارىنشا دامىتتى، وسىزاماندانعان قىزمەت وتەۋ كاسىبىنىڭ تەز دامۋىن بەلسەنە قولداپ، ەكونوميكانىڭ ارتۋ ساپاسى جانە ءونىمىن بارىنشا جوعارىلاتتى. اۋىل شارۋاشىلىعى، اۋىل - قىستاق، شارۋالار ماسەلەسىن شەشۋدى كورنەكتى ورىنعا قويىپ، اۋىل شارۋاشىلىق قۇرىلىمىن رەتكە سالۋدى جەرگىلىكتى جاعدايعا قاراي ىلگەرىلەتىپ، اۋىل - قىستاقتى كەدەيلەردى سۇيەمەلدەۋ جولىمەن گۇلدەندىرۋدى كۇشەيتىپ، قالا مەن اۋىلدىڭ سايكەستى دامۋىن جەبەدى. سىرتقا ەسىكتى ايقارا اشاتىن، ەكسپورتقا دەم بەرەتىن ءبىرقىدىرۋ ساياساتتىق شارا قولدانىپ، حالىق اقشاسىن قۇنسىزداندىرماۋعا تاباندى بولىپ، بازاردى كوپ نەگىزدەندىرۋ ستراتەگياسى مەن ساپا ارقىلى جەڭىسكە جەتۋ ستراتەگياسىن اتقارىپ، شەتەل قارجىسىن بەلسەنە باۋراپ، ەل ءىشى جانە حالىقارا سىندى ەكى بازاردان، ەكى ءتۇرلى بايلىقتان اناعۇرلىم ويداعىداي پايدالانىپ، شياڭگاڭ حالىقارالىق فينانس ورتالىعىنىڭ گۇلدەنۋى مەن ورنىقتىلىعىن باتىل قورعادى. ەكولوگيالىق ورتانى قورعاۋ جانە گۇلدەندىرۋ تەبىنىن ارتتىرىپ، جەر، كەن ونىمدەرى سياقتى بايلىقتاردى باسقارۋدى كۇشەيتىپ، ءتۇيىندى اعارلاردىڭ، وڭىرلەردىڭ لاستانۋىن كۇشتى شوعىرلاندىرا وتىرىپ جونگە سالدى. مەملەكەت مەنشىگىندەگى كاسىپورىنداردان جۇمىستان بوساعان جۇمىسشى - قىزمەتكەرلەردىڭ نەگىزگى تۇرمىسىن قامتاماسىزداندىرۋ، جۇمىسسىزداردى قامسىزداندىرۋ، قالا - قالاشىق تۇرعىندارىنىڭ ەڭ تومەنگى تۇرمىسىن قامتاماسىزداندىرۋ ءتۇزىمىن ورناتىپ، جۇمىسشى - قىزمەتكەرلەردىڭ ەڭبەكاقىسىن كەشەۋىلدەتۋ، جۇمىستان بوساعان جۇمىسشى - قىزمەتكەرلەردىڭ قايتا جۇمىستانۋى سياقتى ماسەلەلەردى كۇش سالا شەشتى. ۇكىمەت فۋنكتسياسىنا ۇزدىكسىز بۇرىلىس جاساپ، ۇكىمەت قۇرىلىمى رەفورماسىن ىلگەرىلەتىپ، ۇكىمەتتىڭ وزىندىك قۇرىلىسىن كۇشەيتۋگە كۇش سالدى. مەملەكەتتىك كەڭەستىڭ زۇڭليى بولعاننان كەيىن، جۋ رۇڭجي جولداس ىلگەرىندى - كەيىندى ورتالىق ارناۋلى كوميتەتىنىڭ مەڭگەرۋشىسى، مەملەكەتتىك ەكونوميكالىق ءتۇزىلىس رەفورماسى كوميتەتىنىڭ مەڭگەرۋشىسى، مەملەكەتتىك عىلىم - تەحنيكا، وقۋ - اعارتۋ باسشىلىق گرۋپپاسىنىڭ باستىعى، مەملەكەتتىك كەڭەستىڭ ءۇش قىساڭ ينجەنەريا قۇرىلىسى كوميتەتىنىڭ مەڭگەرۋشىسى، مەملەكەت قورعانىسىنا جۇمىلدىرۋ كوميتەتىنىڭ مەڭگەرۋشىسى، مەملەكەتتىك كەڭەستىڭ باتىس بولەكتى اشۋعا باسشىلىق ەتۋ گرۋپپاسىنىڭ باستىعى سياقتى مىندەتتەردى قوسىمشا وتەپ، ەكونوميكالىق ءتۇزىلىس رەفورماسى، عىلىم - تەحنيكا، وقۋ - اعارتۋ، باتىس بولەكتى قاۋىرت اشۋ، مەملەكەت قورعانىسى ونەركاسىبى سياقتى سالالارعا قىرۋار زەيىن - زەردەسىن جۇمسادى.

جۋ رۇڭجي جولداس مەملەكەتتىك كەڭەس زۇڭليىنىڭ ورىنباسارى جانە مەملەكەتتىك كەڭەستىڭ زۇڭليى بولعان كەزدە، ەلىمىز جوسپارلى شارۋاشىلىق تۇزىلىسىنەن سوتسياليستىك بازار شارۋاشىلىعى تۇزىلىسىنە بۇرىلىس جاساۋدىڭ شەشۋشى كەزەڭىندە تۇردى. جياڭ زىمين جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، ول قازىنا - باجى ءتۇزىلىسى رەفورماسىن باسقارىپ، ءادىل باجى اۋىرتپالىعى مەن باجى ءتۇزىمىن ىقشامداۋدى وزەك ەتكەن كەلەلى باجى ءتۇزىمى رەفورماسىن جاپپاي اتقارىپ، ورتالىق پەن جەرگىلىكتى ورىنداردىڭ ءىس ۇقىعى نەگىزىندە باجى قاراستىلىعىن ايىرۋ قازىنالىق ءتۇزىلىسىن ۇيلەسىمدى اتقارىپ، اۋىل - قىستاق باجى - اقى رەفورماسىن تۇيىندە سىناق ەتتى. ول فينانس ءتۇزىلىسى رەفورماسىن بەلسەنە ىلگەرىلەتىپ، ورتالىق بانكەنىڭ فۋنكتسياسىن ونان ارى ارناعا ءتۇسىرىپ، ساۋدا بانكەسى، شەتەل اقشاسى ءتۇزىمى، باعالى قاعاز، كەسىكتى بۇيىم بازارى سياقتى رەفورمالاردى تەرەڭدەتىپ، بۇكىل ەل بويىنشا ءبىر تۇتاس اشىق ۇستالعان، ءتارتىپتى باسەكەلەسەتىن، قاتاڭ باسقارىلاتىن فينانس بازارى جۇيەسىن ورناتۋدى ىلگەرىلەتتى. ول مەملەكەت مەنشىگىندەگى كاسىپورىندار رەفورماسىن ەكونوميكالىق ءتۇزىلىس رەفورماسىنىڭ وزەكتى بۋىنى ەتىپ، ”مال - مۇلىك ۇقىعى ايقىن، ۇقىق پەن جاۋاپكەرشىلىك ايقىن، ۇكىمەت پەن كاسىپورىن بولىنگەن، باسقارۋى عىلمي“ بولۋ تالابى بويىنشا، وسى زامانعى كاسىپورىن ءتۇزىمى قۇرىلىسىن جەدەلدەتىپ، مەملەكەت مەنشىگىندەگى شارۋاشىلىقتىڭ ورنالاسۋىن ستراتەگيالىق جاقتان رەتكە سالىپ جانە مەملەكەت مەنشىگىندەگى كاسىپورىنداردى قايتا قۇرىپ، جۇمىستان بوساعانداردى، ءسوز جوق، امالدىڭ بارىنشا قايتا جۇمىستاندىرۋدى جەبەپ، قوعامدىق قامتاماسىزداندىرۋ جۇيەسى قۇرىلىسىن كۇشەيتۋدى باسا دارىپتەدى. ول تۇرعىن ءۇي ءتۇزىمى رەفورماسىن ىلگەرىلەتىپ، تۇرعىن ءۇي ءبولىسىن اقشاعا اينالدىرۋدى بىرتىندەپ جۇزەگە اسىرىپ، ارزان دا قولايلى ۇيلەردى نەگىزگى تۇلعا ەتكەن قالا - قالاشىقتاردا تۇرعىن ۇيمەن قامداۋدىڭ كوپ ساتىلى جۇيەسىن ورناتتى جانە كەمەلدەندىردى. ول استىق اينالىمى ءتۇزىلىسى رەفورماسىن ۇزدىكسىز تەرەڭدەتىپ، شارۋالاردىڭ ارتىق استىعىن قورعاۋ باعاسى بويىنشا ەركىن ساتىپ الۋدى، مەملەكەت مەنشىگىندەگى استىق ساتىپ الۋ - ساتۋ كاسىپورىندارىنىڭ وڭ باعا بويىنشا ساتۋىن، استىق ساتىپ الۋ قارجىسىنىڭ جابىق كۇيدە اينالىمعا ءتۇسۋىن جولعا قويىپ، نەگىزگى ساتۋ وڭىرلەرىنىڭ استىق ساتىپ الۋ بازارى مەن باعاسىن بىرتىندەپ ەركىنە قويا بەردى. ول تاعى قوعامدىق قامتاماسىزداندىرۋ ءتۇزىلىسى، ەمدەۋ، ءدارى - دارمەك، دەنساۋلىق ساقتاۋ ءتۇزىلىسى، قارجى قوسۋ، قارجى قۇراۋ ءتۇزىلىسى سياقتى ءبىرسىپىرا كەلەلى رەفورمالاردى اتقارۋدى باسقارىپ، سوتسياليستىك بازار شارۋاشىلىعى ءتۇزىلىسىنىڭ نەگىزگى جۇلگەسىن ورناتۋدى ىلگەرىلەتىپ، ەلىمىزدىڭ دۇنيە جۇزىلىك ساۋدا ۇيىمىنا كىرۋى جونىندەگى جاپالى كەلىسسوزدەردى باسقارىپ ورىنداپ، سىرتقا ەسىك اشۋدىڭ كەڭدىك پەن تەرەڭدىككە قاراي كەڭەيۋىن جەبەدى. جۋ رۇڭجي جولداس حالىق بۇقاراسىنا تەرەڭ سۇيىسپەنشىلىك ورناتىپ، ۇكىمەت قىزمەتكەرلەرى ءوزىنىڭ حالىقتىڭ قىزمەتكەرى ەكەنىن ەستە بەرىك ساقتاپ، شىن سويلەپ، باسقالارعا جاماناتتى بولۋدان قورىقپاي، ەرەكشەلەنبەي، كۇشتى جاۋاپكەرشىلىكپەن، ىرىقتىلىقپەن اۋىر جۇكتى ارقالاپ، قيىن ماسەلەلەردى شەشىپ، حالىق بۇقاراسىنا ناقتى ىستەر ىستەۋدى بار كۇشپەن ىلگەرىلەتۋى كەرەكتىگىن باسا دارىپتەدى.

2003 - جىلى 3 - ايدا جۋ رۇڭجي جولداس مەملەكەتتىك كەڭەستىڭ زۇڭليى مىندەتىن وتەمەيتىن بولدى. باسشىلىق قىزمەت ورنىنان بوساعاننان كەيىن، ول حۋ جينتاۋ جولداس باس شۋجي بولعان پارتيا ورتالىق كوميتەتىن باتىل قولدادى، شي جينپيڭ جولداستى ۇيتقى ەتكەن پارتيا ورتالىق كوميتەتىن باتىل قولدادى، جۇڭگوشا سوتسياليزم ۇلى ىسىنە باستان - اياق كوڭىل ءبولىپ، پارتيا ستيلى، پاكتىك قۇرىلىسىن جانە شىرىكتەسۋگە قارسى تۇرۋ كۇرەسىن تاباندىلىقپەن قولدادى.

جۋ رۇڭجي جولداستىڭ ءومىرى توڭكەرىستىك ءومىر، جاۋىنگەرلىك ءومىر، شۇعىلالى ءومىر، بۇكىل ىنتا - پەيىلىمەن حالىق ءۇشىن قىزمەت ىستەگەن، كوممۋنيزم ىستەرىنە ءوزىن ارناعان ءومىر. ونىڭ قايتىس بولۋى _ پارتيا مەن مەملەكەتتىڭ اۋىر جوعالتۋى. ءبىز قايعىنى قايراتقا اينالدىرىپ، ونىڭ توڭكەرىستىك رۋحىنان، وسكەلەڭ ءمورالىنان جانە تاڭداۋلى ستيلىنەن ۇيرەنىپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، جۇڭگوشا سوتسياليزم ۇلى تۋىن بيىك ۇستاپ، شي جينپيڭ جاڭا ءداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، سەنىمدى بەكەمدەپ، ءبىر نيەت، ءبىر تىلەكتە بولىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋىمىز كەرەك.

جۋ رۇڭجي جولداس ماڭگى جاسايدى!