پيڭلۋ كانالىندا كەمە قاتىناۋ الدىندا تۇر، ”ارناۋلى قاتىناس ەرەجەسى“ 9 - ايدىڭ 15 - كۇنىنەن باستاپ اتقارىلادى 

شينحۋا اگەنتتىگى 9 - ايدىڭ 10 – كۇنى ناننيڭنەن بەرگەن حابارى (ءتىلشى جاۋ حۋان) ءتىلشىنىڭ 9 - ايدىڭ 10 - كۇنى گۋاڭشي جۋاڭزۋ اۆتونوميالى رايوندىق حالىق ۇكىمەتى اقپارات كەڭسەسى وتكىزگەن اقپارات جاريالاۋ ماجىلىسىنەن ۇعىسۋىنشا، ”پيڭلۋ كانالىندا كەمە قاتىناۋ حاۋىپسىزدىگىن باسقارۋ بەلگىلەمەسى“ 9 - ايدىڭ 15 - كۇنىنەن باستاپ اتقارىلىپ، پيڭلۋ كانالىندا كەمەلەردىڭ قاتىناۋىنا ارنالعان حاۋىپسىزدىك باسقارۋ ەرەجەسى ورناتىلادى.

پيڭلۋ كانالىنىڭ جالپى ۇزىندىعى 134.2 كيلومەتر بولىپ، ىشكى وزەندەگى 1 - دارەجەلى ارنا ولشەمى بويىنشا سالىنعان، 5000 توننالىق كەمەلەردىڭ قاتىناۋىنا بولادى. وزەن مەن تەڭىزدى تۇتاستىراتىن جاڭا سۋ ارناسى رەتىندە، كانالدىڭ ءبىر ءبولىم ارناسى وزەن مەن تەڭىز شەكارالاساتىن وڭىرگە ورنالاسقان، ىشكى وزەن مەن تەڭىزدەگى ەكى ءتۇرلى قاتىناس ەرەجەسىن قالاي ۇشتاستىرۋ كەمە قاتىناۋ حاۋىپسىزدىگىن باسقارۋدا ءدوپ كەلگەن جاڭا ماسەلە بولدى.

گۋاڭشي تەڭىز ىستەرى مەكەمەسىنىڭ ورىنباسار باستىعى ۋاڭ رىبين بىلاي دەپ تانىستىردى: وسى ەرەكشەلىككە باعىتتاي وتىرىپ، بەلگىلەمەدە G75 لانجوۋ - حايكوۋ جوعارى قارقىندى تاس جولى چينجياڭ كوپىرىن وزەن مەن تەڭىزدىڭ شەكاراسى ەتىپ انىقتاپ، ىشكى وزەن سۋ ءوڭىرى مەن تەڭىز ايدىنىنىڭ باسقارۋ شەكاراسىن اشىق كورسەتتى؛ سونىمەن بىرگە ىشكى وزەندەگى كەمەلەردىڭ تەڭىز رايونىنا كىرۋىنە، تەڭىزدەگى كەمەلەردىڭ كانالعا كىرۋىنە قاتىستى شارتتاردى انىقتاپ، ارناعا ءبولىپ قاتىناۋعا، كەمەنىڭ ايقاسىپ وتۋىنە جانە ءتۇرلى اعىس شارت - جاعدايىندا كەمەلەردىڭ ءوزارا جول بەرۋىنە قاتىستى بەلگىلەمە شىعاردى.

تانىستىرۋعا قاراعاندا، بەلگىلەمەنى جاساۋ بارىسىندا، قاتىستى تاراۋلار ارنانىڭ بۇرىلىسى، كوپىر، وزەن ساعاسى قاتارلى قاتىناس فاكتورلارىن سول جەرگە بارىپ قايتالاي تەكسەرگەن ءارى كەمە تاسىمالى كاسىپورىندارىنان، كەمەشىلەردىڭ ۋاكىلدەرىنەن جانە قوعامداعى جۇرتشىلىقتان پىكىر العان.

پيڭلۋ كانالى باتىس - وڭتۇستىك قۇرلىق - تەڭىز جاڭا ارناسىنىڭ نەگىزدىك ينجەنەرياسى بولىپ، 9 - ايدىڭ 16 - كۇنى سالىنىپ بولىپ قاتىناۋعا بەرىلەدى. بەلگىلەمەنىڭ اتقارىلۋى كەمەلەردىڭ حاۋىپسىز قاتىناۋىنا، قاتىناس ءتارتىبىن ساقتاۋعا جانە ىشكى وزەن مەن تەڭىز ايدىنى اراسىندا قاتىناۋدىڭ ۇشتاستىرىلۋىنا ەرەجەلىك نەگىز ازىرلەيدى.

كەلۋ قاينارى: حالىق تورابى