2026 - جىلعى ۇقىققا قول سۇققان، جالعان – جارامسىز تاۋارلاردى بۇكىل ەلىمىز بويىنشا ءبىرتۇتاس جويۋ ارەكەتى ورىستەتىلدى 

جۇڭگو اقپارات تورابىنىڭ 9 – ايدىڭ 10 – كۇنگى حابارى. مەملەكەتتىك بازاردى باقىلاۋ – باسقارۋ باس مەڭگەرمەسى ۋيشين تەكشەسىنىڭ حابارىنا قاراعاندا، 9 – ايدىڭ 10 – كۇنى مەملەكەتتىك ساپا جاعىندا قۋاتتى ەل قۇرۋدى سايكەستىرىپ ىلگەرىلەتۋ باسشىلىق گرۋپپاسى كەڭسەسى مەن بازاردى باقىلاۋ – باسقارۋ باس مەڭگەرمەسى بىرلەسىپ 2026 – جىلعى ۇقىققا قول سۇققان، جالعان – جارامسىز تاۋارلاردى بۇكىل ەلىمىز بويىنشا ءبىرتۇتاس جويۋ ارەكەتىن ۇيىمداستىرىپ ورىستەتكەن، ەلىمىزدەگى 25 ولكە (اۆتونوميالى رايون، توتە قاراستى قالا) ۇقىققا قول سۇققان، جالعان – جارامسىز تاۋارلاردى جويۋ قىزمەتىن ءبىر ۋاقىتتا ورىستەتكەن، بازاردى باقىلاۋ – باسقارۋ باس مەڭگەرمەسىنىڭ ورىنباسار باستىعى باي چيڭيۋان قيمىلعا قاتىناسقان.

وسى رەتكى ارەكەت بارىسىندا ۇقىققا قول سۇققان، جالعان – جارامسىز ازىق – تۇلىكتەر مەن ءدارى – دارمەكتەر، كيىم – كەشەكتەر مەن اياق كيىم، باس كيىمدەر، تەمەكى جانە اراق، بەزەنۋ بۇيىمدارى، ۇرلاپ باسىلعان باسىلىمدار، گاز وشاعى، اۆتوكولىك بولشەكتەرى، ەلەكتروندىق اسپاپتار، ءورت ءوشىرۋ بۇيىمدارى قاتارلى 200 نەشە ءتۇرلى بۇيىم جويىلعان، مۇنىڭ ىشىندە ەل ءىشى – سىرتىنداعى كوپتەگەن تانىمال ماركالار قامتىلعان، جالپى سالماعى 4938 توننا، زاتتاردىڭ قۇنى شامامەن 858 ميلليون يۋان بولىپ، بارلىعى ورتانى قورعاۋعا ۇيلەسەتىن جاسىل تيپتى تاسىلمەن ءبىر جاقتى ەتىلگەن.

جۋىرداعى جىلداردان بەرى، ءارقايسى وڭىرلەر، ءارقايسى قاتىستى تاراۋلار پارتيا ورتالىق كوميتەتى مەن مەملەكەتتىك كەڭەستىڭ شەشىمدەرى مەن ورنالاستىرۋلارىن ىشكەرىلەي دايەكتىلەندىرىپ، تياناقتاندىرىپ، قوعام نازار اۋدارىپ وتىرعان، حالىق تۇرمىسىنا قاتىستى ماسەلەلەرگە باسا ءمان بەرىپ، ءتۇيىندى سالالاردى، ءتۇيىندى ونىمدەردى، ءتۇيىندى بۋىنداردى جونگە سالۋدى ۇزدىكسىز تەرەڭدەتىپ، زياتكەرلىك ۇقىقتى قورعاۋ جانە ۇقىققا قول سۇعۋعا، جالعان – جارامسىز زاتتار جاساۋعا سوققى بەرۋ قىزمەتىنىڭ تەبىنىن ۇزدىكسىز ارتتىرىپ، ۇقىققا قول سۇققان، جالعان – جارامسىز تاۋارلاردى ءبىرتۇتاس جويۋ ارەكەتىن ءۇرتىس ۇيىمداستىرىپ ورىستەتىپ، تۇتىنۋشىلار مەن ۇقىق يەلەرىنىڭ زاڭدى ۇقىق – مۇددەسىن پارمەندى قورعاپ، ساپا سالاسىندا قۋاتتى ەل مەن زياتكەرلىك ۇقىق سالاسىندا قۋاتتى ەل قۇرۋعا دەم بەرۋ، بازارلانعان، زاڭمەن باسقارىلاتىن، حالىقارادا ماڭداي الدى قاتارداعى ساۋدا ورتاسىن جاراتۋ سياقتى جاقتاردا بەلسەندى رول اتقارعان.

ورتالىق كوميتەتتىڭ ۇگىت ءبولىمى، ەڭ جوعارى حالىق سوتى، ەڭ جوعارى حالىق پروكۋراتۋراسى سىندى تاراۋلارداعى قاتىستى جولداستار، 25 ولكەدەگى (اۆتونوميالى رايون، توتە قاراستى قالا) بازاردى باقىلاۋ – باسقارۋ تاراۋلارى جانە قاتىستى ورىندارداعى جاۋاپتى جولداستار، ەل ءىشى – سىرتىنداعى قاتىستى سالالىق ۇيىمدار، قۇرىلىمدار، ۇقىق يەلەرىنىڭ ۋاكىلدەرى مەن اقپارات قۇرالدارىنىڭ تىلشىلەرى قاتارلىلار بەينە كەسكىن قاتارلى جولدارمەن جويۋ ارەكەتىنە قاتىناسقان.

كەلۋ قاينارى: حالىق تورابى