كاسىپورىندارعا ساياتىن ينفورماتسيالاردى جات نيەتپەن اسىرا جاريالاۋدى جونگە سالدى   
مەملەكەتتىك ينتەرنەت حاۋىپسىزدىگى جانە ينفورماتسيالاندىرۋ كەڭسەسى زاڭعا، بەلگىلەمەگە قايشى ءبىر توپ تىركەلگىنى قاتاڭ ءبىر جاقتى ەتتى

شينحۋا اگەنتتىگىنىڭ 9 - ايدىڭ 19 – كۇنى بەيجيڭنەن بەرگەن حابارى. ءتىلشىنىڭ 9 - ايدىڭ 19 - كۇنى ۇعىسۋىنشا، تاياۋدا مەملەكەتتىك ينتەرنەت حاۋىپسىزدىگى جانە ينفورماتسيالاندىرۋ كەڭسەسى ”چيڭلاڭ . تيجارات - ساۋدا توراپ ورتاسىن ساپالىلاندىرۋ، كاسىپورىندارعا ساياتىن ينفورماتسيالاردى جات نيەتپەن اسىرا جاريالاۋدى جونگە سالۋ“ ارناۋلى قيمىلىن ورىستەتىپ، كاسىپورىندارعا جات نيەتپەن جالا جابۋ، كاسىپورىندارعا ساياتىن ۇنامسىز ينفورماتسيالاردى جيناۋ، اسىرا جاريالاۋ، باقىلاۋ دەگەن اتپەن زاڭسىز پايدا تابۋ قاتارلى ماسەلەلەردى شوعىرلى جونگە سالدى. سونىمەن بىرگە، كاسىپورىنداردىڭ ”ءوزارا قاراتالاسۋ تۇرىندەگى“ باسەكەسىن باعىتتامالى جونگە سالىپ، كاسىپورىندارعا ساياتىن شىندىققا جاناسپايتىن ينفورماتسيالاردى تاراتاتىن، تۇتىنۋشىلار شوعىرىن قاراما - قارسى قويۋعا جەلىكتىرەتىن ءبىر توپ اسىرا جاريالاعان تىركەلگىنى ءبىر جاقتى ەتتى. ارناۋلى قيمىل كەزىندە ءار دارەجەلى ينتەرنەت حاۋىپسىزدىگى جانە ينفورماتسيالاندىرۋ تاراۋلارى مەن ءتۇيىندى ساۋدا توراپ تەكشەلەرى كاسىپورىندارعا ساياتىن ءبىر ميلليون 560 مىڭنان استام ۇقىققا قول سۇعۋ ينفورماتسياسىن اداقتاپ، زاڭعا، بەلگىلەمەگە قايشى 26 مىڭنان استام تىركەلگىنى ءبىر جاقتى ەتتى.

مەملەكەتتىك ينتەرنەت حاۋىپسىزدىگى جانە ينفورماتسيالاندىرۋ كەڭسەسى ءبىر ءبولىم تيپتىك دەلولاردى حابارلاندىردى، ساياتىن جاعدايلار مىنالاردى قامتيدى: كاسىپورىندارعا ساياتىن ۇنامسىز جالعان ينفورماتسيالاردى جاريالاپ، زاڭسىز پايدا تابۋ؛ كاسىپورىنداردى كەمسىتەتىن ينفورماتسيانى ۇزدىكسىز تاراتىپ، تۇتىنۋشىلار شوعىرىن قاراما - قارسى قويۋ؛ جالعان، وتىرىك ينفورماتسيالاردى جاريالاپ، كاسىپورىنداردىڭ ساۋدا سەنىمدىلىگىنە كۇيە جاعىپ، جالا جابۋ؛ كاسىپورىنداردىڭ ۇنامسىز ينفورماتسيالارىن جات نيەتپەن جيناپ، كاسىپورىنداردىڭ كونە حابارلارىن، كونە ىستەرىن قايتادان اسىرا جاريالاۋ.

كەلۋ قاينارى: حالىق تورابى