ماسا نەلىكتەن ءدال ءسىزدى شاعۋعا اۋەس؟ عىلىمي زەرتتەۋ قىزمەتكەرلەرى اتوم دەڭگەيىندەگى جاۋابىن تاپتى 

شينحۋا اگەنتتىگىنىڭ ءتىلشىسى چىن يۇيشۋان 10 – ايدىڭ 14 – كۇنى شىنجىننەن حابارلايدى. بولمەدە بىرنەشە ادام وتىرسا دا، نەلىكتەن ماسا ءدال ءسىزدىڭ ماڭىڭىزدان كەتپەيدى؟ ەڭ جاڭا زەرتتەۋ ناتيجەسىنە قاراعاندا، عىلىمي زەرتتەۋ قىزمەتكەرلەرى ماسانىڭ ادامنىڭ تەرىسىندەگى كاربوكسيل قىشقىلى تۇرىندەگى ءيىستى مولەكۋلانى قالاي پارىقتايتىنىن ءارى وسى حيميالىق سيگنالدى نەرۆتىك ەلەكترلىك سيگنالعا قالاي اينالدىراتىنىن اتوم دەڭگەيىندە تولىق مەحانيزم بويىنشا تۇسىندىرگەن.

بۇل اقپاراتتى ءتىلشى 10 – ايدىڭ 14 – كۇنى شىنجىن مەديتسينالىق عىلىمدار اكادەمياسىنان ۇعىسقان. بۇل زەرتتەۋدى شىنجىن مەديتسينالىق عىلىمدار اكادەمياسى مەن شىنجىن بۇعازى تاجىريبەحاناسىنداعى عىلىمي زەرتتەۋ قىزمەتكەرلەرى سەلبەسىپ ورىنداعان، قاتىستى زەرتتەۋ ناتيجەسى 10 – ايدىڭ 14 – كۇنى كەشتە حالىقارالىق عىلىمي جۋرنال «تابيعات» جۋرنالىنىڭ تورابىندا جاريالانعان.

وسىدان بۇرىنعى زەرتتەۋلەر نونيل قىشقىلى، اپريل قىشقىلى قاتارلى كاربوكسيل قىشقىلى تەكتەس زاتتاردىڭ ادام دەنەسىندەگى تەر مەن تەرى مايىنىڭ ماڭىزدى قۇرامداس بولىگى ەكەنىن راستاعان، ماسا كاربوكسيل قىشقىلى تەكتەس زاتتاردى قامتىعان ءيىس مولەكۋلالارىن ”يىسكەۋ“ ارقىلى ماڭايىندا ادامنىڭ بار – جوقتىعىن پارىقتاي الادى.

وسى رەتكى زەرتتەۋ بارىسىندا، عىلىمي زەرتتەۋ قىزمەتكەرلەرى توڭازىتىلعان فورمادا ەلەكتروندىق ميكروسكوپپەن باقىلاۋ، ەلەكتروفيزيولوگيا جانە جالقى كلەتكانىڭ تىزىلۋ رەتىن تەكسەرۋ قاتارلى تەحنيكالاردان پايدالانىپ، ماسانىڭ ”جولجەتەك جۇيەسىنىڭ“ ىشكى قۇرىلىمى مەن فۋنكتسياسىن ءساتتى تۇردە ساراپتاعان جانە دالەلدەگەن، ونىڭ ءيىستى پارىقتاۋ، وزگەرىستى كەسكىندەۋ، ارنانى اشۋ جانە سيگنال جەتكىزۋ بارىسىن تولىق انىقتاعان.

عىلىمي زەرتتەۋ قىزمەتكەرلەرىنىڭ ايتۋىنشا، بۇل زەرتتەۋ ماسانىڭ ادامدى تابۋ بارىسىندا ادامنىڭ دەنەسىندەگى كاربوكسيل قىشقىلىنىڭ يىسىنەن قالاي پايدالاناتىنى جونىندە عىلىمي تۇسىنىك بەرۋمەن بىرگە، ماسانى قۋالايتىن، ماسا شىرعالايتىن مولەكۋلالاردى جوبالاۋعا نەگىز ازىرلەيدى. بولاشاقتا، ەگەر وسى تۇيسىك سيگنالىنا باعىتتامالى كيلىگۋ شاراسى قولدانىلاتىن بولسا، ماسادان جۇعىمدالۋدان ساقتانۋ – تىزگىندەۋ جاعىندا اناعۇرلىم جاسىل تيپتى، دالمە - ءدال شارالار ورتاعا قويىلادى.

كەلۋ قاينارى: حالىق تورابى