دەلوعا قاتىستى سوما 14 ميلليون يۋاننان اسادى! ينتەرنەت ساقشىلارى ازاماتتاردىڭ جەكەلىك ينفورماتسياسىنا قول سۇعۋ قىلمىسىن وتكىزگەن ءبىر ۇيىمدى تالقاندادى 

”تومەن ءوسىمدى قارىز بەرەمىز“، ”قارىز الماقشى بولساڭىز دەرەۋ ماقۇلدانادى ءارى بەرىلەدى“ دەگەن مازمۇنداعى كەلتە حاتتى تاپسىرىپ العان با ەدىڭىز؟ قاراماققا جاي كورىنگەن بۇل قارىز بەرۋگە قاتىستى ينفورماتسياسىنىڭ استارىنان ازاماتتاردىڭ جەكەلىك ينفورماتسيالارىنا سۇعاناقتىق جاسايتىن زاڭسىز كاسىپ تىزبەگى بايقالعان، الدا – جالدا جالعانىمدى باسساڭىز نەمەسە تەلەفون سوعىپ كەڭەس سۇراساڭىز، قارىز بەرۋ ”تۇزاعىنا“ وتە وڭاي ءتۇسىپ، مال – مۇلىكىڭىزدى زيانعا ۇشىراتىپ الۋىڭىز مۇمكىن.

جۋىردا جياڭشي ولكەسى ي – چۇن قالالىق قوعام حاۋىپسىزدىگى مەكەمەسى ينتەرنەت حاۋىپسىزدىگى تاراۋلارى كۇش سالا سوققى بەرىپ، كەڭسەلىك عيماراتقا جاسىرىنىپ، ازاماتتاردىڭ جەكەلىك ينفورماتسيالارىنا قول سۇعۋ قىلمىسىن وتكىزگەن توپقا شوعىرلى تۇردە ءبىرتۇتاس تور جايۋ ارەكەتىن ورىستەتىپ، لو X يۇي قاتارلىلار اتاماندىعىنداعى قىلمىستىق ۇيىمدى ءبىر جولدا تالقانداپ، دەلوعا قاتىستى 23 ادامدى سول جەردە ۇستاعان، دەلوعا قاتىستى كومپيۋتەر، قولفون قاتارلى ەلەكتروندىق اسپاپتاردان 70 نەشەسىن تەكسەرىپ ۇستاپ قالعان.

تەكسەرۋگە قاراعاندا، بۇل توپ كوپ مولشەردەگى ازاماتتاردىڭ جەكەلىك ينفورماتسياسىنا زاڭسىز قول جەتكىزىپ، كەلتە حات ارناسى ارقىلى بانكەنىڭ قارىز بەرۋىنە قاتىستى جالعان مازمۇنداعى كەلتە حاتتاردى تاراتىپ، قول استىنداعى بەلگىلەمەگە قايشى قارىز بەرۋ قۇرىلىمدارىنا كليەنت شاقىرىپ، وسى ارقىلى زاڭسىز پايداعا كەنەلگەن، دەلوعا قاتىستى سوما 14 ميلليون يۋاننان اسقان.

قازىر دەلوعا قاتىستى 23 ادامنىڭ بارلىعىنا زاڭ بويىنشا قىلمىستىق ىستەرگە ساي ماجبۇرلەۋ شارالارى اتقارىلعان، دەلو ىشكەرىلەي تەكسەرىلۋدە.

حالىق ساقشىلارى مىنانى ەسكەرتەدى

قارىز اقشا بەرىلەتىنىن ۇگىتتەگەن كەلۋ قاينارى بەلگىسىز كەلتە حاتتاردى تاپسىرىپ الساڭىز، استە، سەنبەڭىز، ونان دا ماڭىزدىسى، جالعانىمدى الباتى اشپاڭىز نەمەسە جاۋاپ قايتارماڭىز؛

جەكەلىك تەلەفون ءنومىرى، ازاماتتىق كۋالىك ءنومىرى قاتارلى ينفورماتسيالاردى ويداعىداي قورعاپ، بەيمالىم تەكشەلەرگە الباتى جازباڭىز؛

ەگەر جەكەلىك ينفورماتسياڭىزدىڭ اشكەرەلەنگەنىن بايقاساڭىز نەمەسە سىزگە مازالاۋ سيپاتتى كەلتە حات، الدامكوستىك مازمۇنىنداعى ينفورماتسيا جولدانعان بولسا، دەر كەزىندە قوعام حاۋىپسىزدىگى ورگاندارىنا مالىمدەڭىز.

(باس ستانسيا ورتالىق تەلەۆيزياسى ءتىلشىسى جاڭ گاڭ)

كەلۋ قاينارى: حالىق تورابى