جاراتىلىستىق بايلىق مينيسترلىگى اشىق جاريالادى
ءىشىنارا جەرلەر ”ەگىستىكتى ءبۇلدىرىپ، كورىنىس جاساعان“
2023.04.14 15:52 كەلۋ قاينارى : حالىق تورابى
شينحۋا اگەنتتىگىنىڭ ءتىلشىسى ۋاڭ ليبين 4 – ايدىڭ 13 – كۇنى بەيجيڭنەن حابارلايدى. 2022 – جىلعى ەگىستىك جەردى قورعاۋعا ساياتىن باقىلاۋ – تەكسەرۋ بارىسىندا، ءىشىنارا جەرلەردە بەلگىلەمەنى بىلە تۇرا قايشىلىق جاساپ، ەگىستىك جەردى يەلەپ الىپ، جەردى قازىپ كول جاساپ، كورىنىس قالىپتاستىرۋ، جاسىلداندىرۋ بەلدەۋى مەن جاسىل ءدالىزدى ولشەمنەن ارتىق جاساۋ قاتارلى جاعدايلاردىڭ ءالى دە كورنەكتى ەكەنى بايقالعان.
جاراتىلىستىق بايلىق مينيسترلىگى 2022 – جىلعى ەگىستىك جەردى قورعاۋعا ساياتىن باقىلاۋ – تەكسەرۋ بارىسىندا بايقاعان زاڭ – تۇزىمدەرگە قايشى 67 ءتۇرلى تيپتىك دەلونى 4 – ايدىڭ 13 – كۇنى اشىق جاريالادى. ەگىستىك جەردى يەلەپ الىپ، جەردى قازىپ كول جاساۋ، كورىنىس قالىپتاستىرۋ، جاسىلداندىرۋ بەلدەۋى مەن جاسىل ءدالىزدى ولشەمنەن ارتىق جاساۋ قاتارلى 13 دەلودان سىرت، جەرگىلىكتى ورىنداعى پارتكوم، ۇكىمەت ورىندارىنىڭ جانە قاتىستى تاراۋلاردىڭ جەردى زاڭسىز بەكىتۋى، جەردى زاڭعا قايشى وتكىزىپ الۋى، سونداي – اق، جەردى زاڭسىز يەلەپ الۋدى ىلگەرىلەتۋگە جەتەكشىلىك ەتۋى، پارمەندى تۇردە باقىلاپ – باسقارماۋى قاتارلىلارعا ساياتىن 34 دەلو بار، بۇل دەلولاردىڭ باسىم كوبى ەگىستىك جەردى زاڭسىز يەلەپ الىپ، سۋ ساقتاۋ كولشىگى، توعىسپالى شارۋاشىلىق، كورىنىستىك اۋىل شارۋاشىلىعى الاڭى، دەمالۋ جانە ساياحاتتاۋ ورنى، اۋىل – قىستاق ساياحاتى، ەكولوگيالىق كوريدور، قىزمەتكەرلەردى جاتتىقتىرۋ الاڭى، تاۋلى جەردەگى باقشا، سپورتتىق باقشا، قالا باقشاسى قاتارلى نىسانداردى سالۋعا سايادى، بۇلار دا ”اش قالساق تا، كورىنىس ورىندارىن جاسايىق“ دەيتىن ارەكەتكە جاتادى.
وسى رەت شىعارىلعان حابارلاندىرۋدا تاعى ەگىستىك جەردى تولىقتاۋ مولشەرى شىنايى بولماي، جالعان مالىمەت بەرۋ قاتارلى ماسەلەلەردەن 12 ماسەلە، ماڭگىلىك نەگىزدىك ەگىستىك جەردى استىق ەگۋدەن باسقا ماقساتتا پايدالانۋعا ساياتىن 5 ماسەلە، باقىلاۋ – تەكسەرۋ بارىسىندا بايقالعان ماسەلەلەردى پارمەندى تۇزەتپەي، جالعان مالىمەت بەرۋگە ساياتىن ماسەلەدەن 3 ماسەلە بار.
جاراتىلىستىق بايلىق مينيسترلىگىنىڭ حابارلاندىرۋىندا مىنالار اتاپ كورسەتىلدى: زاڭ – تۇزىمدەرگە قايشى وسىنداي ارەكەتتەر ەگىستىك جەردى قورعاۋ قىزىل سىزىعىنا اۋىر دارەجەدە سوقتىعىپ، مەملەكەتتىڭ استىق حاۋىپسىزدىگىنە زيان جەتكىزەتىن بولىپ، قاتىستى جەرلەردىڭ ەگىستىك جەردى قورعاۋ تانىمىنىڭ كۇشتى ەمەس ەكەنىن، پارتكوم مەن ۇكىمەتتىڭ ەگىستىك جەردى قورعاۋ نەگىزگى تۇلعالىق جاۋاپكەرشىلىگى مەن قاتىستى تاراۋلاردىڭ باقىلاۋ – باسقارۋ جاۋاپكەرشىلىگىن تياناقتاندىرماعانىن، باقىلاۋدىڭ پارمەندى بولماعانىن، زاڭ اتقارۋدىڭ قاتاڭ بولماعانىن كورسەتەدى. جەر – جەر ماسەلەلەردى انىقتاپ ءبىر جاقتى ەتۋدى، تۇزەتۋدى جەدەلدەتىپ، ادامداردى، ىستەردى ۇيلەسىمدى ءبىر جاقتى ەتۋگە كەپىلدىك ەتۋى كەرەك؛ قاتاڭ شارالاردى قولدانىپ، ەگىستىك جەرلەردى اۋىل شارۋاشىلىعىنان باسقا ماقساتتا پايدالانۋ سىندى ءتۇرلى ارەكەتتەردى قاتاڭ تەجەپ، ەگىستىك جەردى استىق ەگۋدەن باسقا ماقساتتا پايدالانۋدان ساقتانىپ، زاڭعا قايشى جاڭادان ارتقان ارەكەتتەردى ”مۇلدە جول بەرمەستەن“ مىقتى باسقارۋدى تالاپ ەتتى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
