«ءار ۇلت اۋەندەرى. ارمان توعىسقان حوتان» شينجياڭ داشۋەسىندە قويىلدى
2023.04.12 15:44 كەلۋ قاينارى : شينجياڭ گازەتى
انار بۇلت \ شينجياڭ گازەتىنىڭ ءتىلشىسى جيا چۇنشيا 4 - ايدىڭ 10 - كۇنى ۇرىمجىدەن حابارلايدى. 4 - ايدىڭ 10 - كۇنى كەشتە حوتان ايماقتىق شينيۇي ءان - ءبي ۇيىرمەسى ورىنداعان كولەمدى ءان - ءبي ارناۋلى كونسەرتى «ءار ۇلت اۋەندەرى · ارمان توعىسقان حوتان» تۇڭعىش كەزەكتى شينجياڭ مادەنيەت - كوركەمونەر فەستيۆالىندا بوي كورسەتىپ، شينجياڭ داشۋەسىنىڭ بودا مەكتەپ رايونىندا قالىڭ وقىتۋشى - وقۋشىلارمەن جۇزدەستى.
بۇل ارناۋلى كونسەرت حوتاننىڭ تاريحي مادەنيەتىن تاقىرىپ ەتكەن، حوتان ايماعىنىڭ ادەبيەت - كوركەمونەر جاسامپازدىعى تاريحىنداعى تۇڭعىش كولەمدى ءان - ءبي ارناۋلى كونسەرتى، ”ماڭگىلىك قاس تاسى“، ”جىبەك جولى جالعاعان سەزىم “، ”باقىتتى حوتان“، ”ىنتىماق گۇلى اشىلدى“ سىندى 4 بولىمنەن قۇرالعان. كونسەرتتىڭ الدىڭعى بولىمىندەگى ءان - بيلەر جاعىمدى، سالماقتى، تاتىمدى بولىپ، كىسىنى حوتاننىڭ مايەكتى تاريحي مادەنيەتىنىڭ باۋراۋ قۋاتىنا شومدىرسا؛ سوڭعى بولىمىندەگى ءان - بيلەر قىزۋ، ويناقى، شۋاقتى، اسقاق بولىپ، حوتان ايماعىنىڭ ءان - ءبيىنىڭ وزگەشە تارتىمدىلىعىن ايگىلەپ، ادامدى ريتىمگە ىلەسىپ ەرىكسىز بيگە باستىرادى.
كۇنلۇن تاۋىنىڭ ەتەگىندە سىرنايلى وزەن سىلدىراپ اعىپ جاتىر، جوۋ مۋۋاڭ ات ارباعا وتىرىپ شي ۋاڭمۋمەن كەزدەسەدى؛ ۇستىنە كەنەپ كويلەك كيىپ، قۇلاعىنا قۇس قاۋىرسىنىن قاداعان يۇيتياندىقتار يۇرۇڭعاش وزەنىنىڭ جاعاسىنا جينالىپ، ”جىبەك جەتكىزۋشى حانىشانى“ ءان - بيىمەن شىن ىقىلاستى قارسى الدى؛ قالىڭ ورماننىڭ اراسىندا يىعىنا قورجىنىن اسىپ، ەسەگىنە ءمىنىپ بەيجيڭگە بارماقشى بولعان قۇربان تۇلىمدى اۋىلداستارى جاپا - تارماعاي اتتاندىرىپ سالدى؛ شىت جاڭا بەينەگە ەنگەن حوتاندا توڭىرەكتىڭ ءتورت بۇرىشىنان كەلگەن ءبىر توپ ۆەلوسيپەد اۋەسكەرى بۇل اراداعى جاڭا وزگەرىستەرگە ەرىكسىز ءتانتى بولدى... 90 مينۋت ىشىندە اسەرلى دە اسەم ءان اۋەنىنە، تاماشا بيگە مىڭ قۇبىلعان شىراقتار، ادەمى كيىم - كەشەكتەر سايكەسىپ، كورەرمەندەرگە قيال - عاجايىپتاي سەزىلىپ، كورەرمەندەردىڭ كوز مەيىرىن، قۇلاق قۇرىشىن قاندىردى.
شينجياڭ داشۋەسى ارتقى شەپ قىزمەت وتەۋ ورتالىعىنىڭ قىزمەتكەرى ابدۋالي تۇرسۇن بىلاي دەدى: ”بۇل ءان - بيدە ايشىقتى ءتۇس تە، كەسكىن دە، وقيعا جەلىسى دە، حيكايا دا بار ەكەن“.
كونسەرت الاڭى قىزۋ مەرەيگە شومدى، شاپالاق ءۇنى مەن الاقايلاعان داۋىستار اۋىق - اۋىق كوتەرىلدى. كورەرمەندەردىڭ ىنتاسى دا ارتيستەردى تەرەڭ اسەرلەندىردى. ”تۇڭعىش كەزەكتى شينجياڭ مادەنيەت - كوركەمونەر فەستيۆالىنا قاتىناسۋ بىزگە شابىت بولدى. ءبىر ايدان استام ۋاقىتتان بەرى، ارتيستەر ۇستەمەلەپ جۇمىس ىستەپ جاتتىقتى، مەيلى ءبي ارەكەتى، الدە بەينەلەۋ فورماسى بولسىن، ەڭ جاقسى جاعىمىزدى ايگىلەيمىز“، - دەدى ”جىبەك جەتكىزۋشى حانىشا“ رولىنا شىققان شينيۇي ءان - ءبي ۇيىرمەسىنىڭ ارتيسى ءميناۋار مامەتيمىن.
شينيۇي ءان - ءبي ۇيىرمەسى پارتيا ياچەيكاسىنىڭ ورىنباسار شۋجيى تۇرسۇنجان ابدوللا بىلاي دەدى: «ءار ۇلت اۋەندەرى · ارمان توعىسقان حوتاندى» 2019 - جىلى اۆتونوميالى رايونداعى قاتىستى مامانداردى ۇسىنىس ەتىپ 8 ايدان استام ۋاقىتتا جاساعانبىز، وسىدان كەيىن ۇزدىكسىز وڭدەلدى جانە دەڭگەيى جوعارىلاتىلدى، قازىر حوتان ايماعىندا 20 رەتتەي قويىلدى. تۇڭعىش كەزەكتى شينجياڭ مادەنيەت - كوركەمونەر فەستيۆالىنىڭ كورمەلىك قويىلىمىنا قاتىناسقاننان كەيىن، حوتانعا قايتىپ، ۇنەمى قويىپ تۇرامىز.
«ءار ۇلت اۋەندەرى · ارمان توعىسقان حوتان» 4 - ايدىڭ 10 - كۇنىنەن 14 - كۇنىنە دەيىن شينجياڭ داشۋەسىنىڭ بودا مەكتەپ رايونىندا ءۇرتىس 5 رەت قويىلادى.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
