شيپاگەرگە كورسەتۋشى: ناۋقاستاردىڭ ويىنداعىداي ”ۋاقىتشا جاقىن جان اشىرى“ بولامىن
− جانىمىزداعى جاڭا كاسىپپەن شۇعىلدانۋشىلار ①
2023.04.13 15:59 كەلۋ قاينارى : شينجياڭ گازەتى
”رەداكتوردان“
ءدال قازىرگى كەز جۇمىس ىزدەۋدىڭ، جۇمىسقا قابىلداۋدىڭ قاۋىرت مەزگىلى، كوپتەگەن جاستار جاڭا كاسىپ كۇيىن، تىڭ تۇتىنۋ سالاسىن كوزدەپ، تىڭ كاسىپتەردى تاڭداپ جۇمىستانۋدى جۇزەگە اسىرۋدا. جاڭا كاسىپتەر − كاسىپ سالاسىنىڭ تيبىن وزگەرتىپ، دارەجەسىن ءوسىرۋدى ۇزدىكسىز ىلگەرىلەتۋدىڭ، قوعامدىق جۇمىس ءبولىسىنىڭ ىشكەرىلەي جىنتىكتەلۋىنىڭ تۋىندىسى، ولار سيفرلى ەكونوميكانىڭ جەدەل دامۋىن ايگىلەيدى نەمەسە حالىقتىڭ تاماشا تۇرمىس تالپىنىسىن ايگىلەيدى. الايدا ءبارى دە ادامدارعا دامۋدىڭ تىڭ ورايىن جانە جۇمىستانۋدىڭ جاڭا تاڭداۋىن ازىرلەپ بەرەدى.
بۇگىننەن باستاپ، انار بۇلت \ شينجياڭ گازەتى ”جانىمىزداعى جاڭا كاسىپپەن شۇعىلدانۋشىلار“ تاقىرىبىندا جەلىلەس حابار ۇسىنادى. مۇندا شيپاگەرگە كورسەتۋشى، ينتەرنەتتە ساتۋشى، قامداۋ تىزبەگىن باسقارۋشى، زەرتتەۋ - ۇيرەنۋ ساياحاتى جەتەكشىسى، حالىقتىق تۇسەلحانا باسقارۋشىسى سياقتى 10 جاڭا كاسىپپەن شۇعىلدانۋشىلاردى تاڭداپ، ولاردىڭ ومىرىنە ارالاسىپ، جاڭا كاسىپتەردى دامىتۋدىڭ ءمان - جايىنا جانە بەتالىسىنا كەيىپكەر حيكاياسى تۇرعىسىنان نازار اۋدارامىز.
□ انار بۇلت \ شينجياڭ گازەتىنىڭ ءتىلشىسى ما بەي
29 جاستاعى فۋ كىشيننىڭ كاسىپپەن اينالىسقانىنا ءبىر ايدان اسقان، 80نەن استام تاپسىرىس قابىلداعان شيپاگەرگە كورسەتۋشى. 3 - ايدىڭ 30 - كۇنى ءتىلشى فۋ كىشينگە ىلەسىپ، ونىڭ ءبىر كۇندىك شيپاگەرگە كورسەتۋشى بولۋ قىزمەتىن ءوز كوزىمەن كوردى.
”سالەمەتسىز بە اپاي، مەن شيپاحانىڭ قاقپاسىندا تۇرمىن، ۇزىنداۋ قوڭىرقاي شاپان كيىپ، سۇرى بوقشا اسىنعام“. 3 - ايدىڭ 30 - كۇنى ساعات 9دا شينجياڭ مەديتسينا داشۋەسىنە قاراستى 5 - شيپاحانانىڭ قاقپاسىنا بارعان فۋ كىشين ۋادەلەسكەن ناۋقاس ياڭ حۋاعا تەلەفون ارقىلى وسىلاي ەسكەرتىپ جاتتى.
ياڭ حۋا بۇراتالا قالاسىنان ءۇرىمجى قالاسىنا كەلىپ شيپاگەرگە قايتالاي تەكسەرىلمەكشى بولعان، قىزى ودان الاڭداپ، كاسىپتىك شيپاگەرگە كورسەتۋشىلەر سەرىكتەستىگىنىڭ شاعىن باعدارلاماسى ارقىلى فۋ كىشينمەن كۇن ىلگەرى كەلىسىپ قويعان ەدى. ناۋقاستى كۇتىپ تۇرعان ارەدىكتە فۋ كىشين تىلشىگە 3 كۇننىڭ الدىندا تەلەفون ارقىلى ياڭ حۋانىڭ ناۋقاس جاعدايىن ابدەن ۇعىسقانىن ءارى ناۋقاس تەكسەرەتىن مامان شيپاگەردىڭ ءنومىرىن الىپ قويعانىن ايتتى.
ياڭ حۋامەن كەزىككەندە فۋ كىشين سومكەسىنەن جاڭا ماسكا الىپ شىعىپ وعان بەردى. ”اپاي تىنىس جولى اۋرۋىنا شالدىققان، دەر كەزىندە ماسكا اۋىستىرىپ تۇرۋ اپايعا پايدالى“، - دەدى فۋ كىشين. ول ياڭ حۋانى امبولاتوريانىڭ 3 - قاباتىنداعى تەكسەرۋدى كۇتۋ اۋماعىنا توتە باستاپ باردى دا، ياڭ حۋانى وتىرعىزىپ قويعاننان كەيىن، قاتارعا تۇرىپ ءنومىر بويىنشا شاقىرۋدى كۇتتى.
كۇتىپ وتىرعان كەزدە فۋ كىشين ءالسىن - ءالى ياڭ حۋانىڭ قاسىنا بارىپ سىبىرلاي سويلەسەدى. ”مىناۋ سەرىكتەستىگىمىزدىڭ جۇمىسقا شىعاردان بۇرىنعى تاربيەلەۋ مازمۇنى. كوپتەگەن ناۋقاستار جالعىز ءوزى شيپاگەرگە كورىنۋگە كەلگەندە ىشتەي قوبالجىپ مازاسىزدانادى. ونداي كەزدە ارامىزداعى يشارات جانە سويلەسۋ ابىرجىعان ناۋقاستىڭ كوڭىل كۇيىن ساباسىنا تۇسىرەدى“، - دەدى فۋ كىشين.
فۋ كىشين وسىنىڭ الدىندا ازىقتانۋ، سالاماتتىق باسقارۋ كاسىبىمەن شۇعىلدانىپ، كوپتەگەن ناۋقاسپەن، اسىرەسە، قارت ناۋقاستارمەن قارىم - قاتىناستا بولعان، ولاردىڭ شيپاحانانىڭ زەردەلىلەنگەن جابدىقتارى مەن تەكسەرۋ تارتىبىنە ءدوپ كەلگەندە داعدارۋى جانە تۇسىنە الماۋى فۋ كىشينگە وي سالادى، سونىمەن شيپاگەرگە كورسەتۋ بويىنشا ارنايى قىزمەت وتەيتىن سەرىكتەستىككە قىزمەتكە تۇرۋدى ءجون كورگەن فۋ كىشين شيپاگەرگە كورسەتۋشىگە اينالدى. سەرىكتەستىك تۇرىندەگى باسقارۋدان فۋ كىشين اناعۇرلىم ماماندانعان باۋلۋعا جانە امالياتتىق ورايعا يە بولدى.
جارتى ساعاتتان كەيىن فۋ كىشين ياڭ حۋانى ەرتىپ شيپاگەردىڭ تەكسەرۋ بولمەسىنە كىرىپ، ءوزىن ناۋقاس وتباسىنىڭ ادامىمىن دەپ تانىستىردى. ول شيپاگەرگە ياڭ حۋانىڭ العاش شيپاحاناعا كەلگەن كەزدەگى ناۋقاس جاعدايى، تەكسەرۋ ناتيجەسى جانە ءدارى - دارمەكپەن ەمدەلۋ جاعدايى سياقتىلاردى ەگجەي - تەگجەيلى، شىنايى ءتۇسىندىردى ءارى قول تەلەفونىن الىپ شىعىپ، شيپاگەردىڭ ناۋقاس جاعدايىنا جاساعان تالداۋى مەن تەكسەرۋ تۇرلەرىن ەستەلىككە الدى.
”مەن اپايدى ەرتىپ بارىپ، CT اسپابىمەن تەكسەرتىپ كەلەيىن، تەكسەرۋ ناتيجەسى شىققاننان كەيىن، شيپاگەرگە تاعى دا كورسەتەمىز، الاڭداما“. تەكسەرۋ بولمەسىنەن شىققان سوڭ فۋ كىشين ياڭ حۋانىڭ قىزىنان كەلگەن تەلەفوندى قابىلداپ، بايىپپەن سويلەپ، ونىڭ كوڭىلىن اۋلادى.
”قانداي ناۋقاس بولسا دا تەكسەرۋ بولمەسىنە بىرگە كىرەسىڭ بە“؟ - دەپ سۇرادى ءتىلشى ودان. ”ارينە. ءار رەتكى تاپسىرىستى قابىلداعاننان كەيىن، مەن ناۋقاستىڭ اۋرۋ جاعدايىن ەگجەي - تەگجەيلى ۇعىسىپ، ناۋقاستىڭ جاعدايىن شيپاگەرگە بايانداعاندا ۇمىت قالدىرعاندارىن تولىقتىرۋعا دايىن تۇرامىن“، - دەدى فۋ كىشين.
بارلىق تۇرلەر بويىنشا تەكسەرتىپ بولعاننان كەيىن، فۋ كىشين تەكسەرۋ مالىمەتىن الىپ، ياڭ حۋامەن بىرگە تاعى دا شيپاگەردىڭ تەكسەرۋ بولمەسىنە كەلدى. شيپاگەر ناۋقاستىڭ اۋرۋ جاعدايىنىڭ كورنەكتى جاقسارىپ قالعاندىعىن ايتىپ، ءدارىنى ۇزبەي ۋاعىندا ءىشۋدى تاپسىردى. فۋ كىشين تاعى دا قول تەلەفونىن الىپ شىعىپ، شيپاگەردىڭ تاپسىرماسىن ەستەلىككە الدى.
”اپاي، تاۋىرلەنىپ كەلەدى ەكەنسىز، ەندى الاڭسىز بولاتىن بولدىڭىز - عوي“. بۇل ءسوزدى ەستىگەن ياڭ حۋانىڭ كوزدەرى جايناپ سالا بەردى.
تاڭەرتەڭنەن تۇسكە دەيىن ناۋقاسقا كومەكتەسىپ قاتارعا تۇرىپ ءنومىر الۋ، شيپاگەرگە كورىنىپ تەكسەرۋ قاعازىن جازدىرىپ الۋ، ناۋقاستىڭ تەكسەرىلىپ شىعۋىن كۇتۋ، تەكسەرۋ مالىمەتىن شىعارىپ الۋ، ءدارى - دارمەكتەردى الىپ كەلۋ دەگەندەرمەن فۋ كىشين ءار قاباتتىڭ اراسىندا توقتاماي جۇگىرىپ ءجۇردى. ”العاش جۇمىسقا شىققان كەزدە مەن دە ارامتەر بولىپ كورگەم. ناۋقاستاردى ءوزىم تانىس ەمەس شيپاحانالارعا اپاراتىن كەزدە، الدىمەن شيپاحانانىڭ امبولاتورياسىنىڭ، شۇعىل قۇتقارۋ ءبولىمىنىڭ ءار قاباتىن تۇگەل ارالاپ شىعۋ ارقىلى قىزمەت وتەۋ ونىمدىلىگىن ارتتىراتىن بولدىم“، - دەدى فۋ كىشين.
شيپاگەرگە كورسەتۋ اياقتاعاندا تۇسكى ساعات بىردەن 30 مينۋت ءوتتى، فۋ كىشين سومكەسىنەن سپيرتپەن دىمدالعان قاعاز قولجاۋلىق الىپ شىعىپ، ياڭ حۋانىڭ قولدارىن زارارسىزداندىرىپ قويدى. ونىڭ سومكەسىنەن قاشاندا كامپيت، پراندىك جانە تازا سۋ سياقتىلار ۇزىلمەيدى، ناۋقاستىڭ اش قارىندا تەكسەرۋ جاساتقاننان كەيىن دەر كەزىندە قاۋجانىپ الۋىنا دايىنداپ قويادى ەكەن.
ياڭ حۋا تىلشىگە: ”مەن شيپاگەرگە كورىنۋ ءۇشىن جالعىز ءوزىم سىرت جەردەن ۇرىمجىگە كەلگەندە، قاسىمدا ادام بولۋىنا ايرىقشا مۇقتاجبىن. شياۋفۋ كاسىپكە ىسىلعان ادام ەكەن، مەنىڭ ۋاقىتىمدى ۇنەمدەپ قانا قويماي، مەنى جالعىزسىراۋ مەن ۋايىمنان ارىلتتى“، - دەدى.
تۇستەن بۇرىنعى شيپاگەرگە كورسەتۋ قاربالاستىعى اياقتاسىمەن - اق تاعى ءبىر ناۋقاس ۋيشيندا حابارلاسىپ: ”شياۋفۋ، ەگەر ۋاقىتىڭ شىعىپ جاتسا، ماعان ءنومىر الىپ، ءدارى جازدىرىپ بەرشى“، - دەدى. مۇنداي كەلتەحاتتار فۋ كىشينگە كۇندە دەرلىك كەلىپ تۇرادى ەكەن.
كەيبىر سوزىلمالى اۋرۋ تاريحى بار ناۋقاستار اي سايىن ءدارى - دارمەك الىپ تۇرۋى قاجەت بولادى، الايدا شالعاي سىرت جەرلەردە بولسا نەمەسە ءجۇرىپ - تۇرۋى قولايسىز بولسا، فۋ كىشينگە شيپاگەردەن ۇعىسىپ بەرۋدى، ءدارى - دارمەك ساتىپ الۋدى، ءدارى جازدىرىپ الۋدى جانە پوچتادان جىبەرىپ بەرۋدى تاپسىرادى ەكەن.
سونداي - اق جالعىز ءوزى تەكسەرىلۋگە كەلەتىن جۇكتى ايەلدەر، زەردەلى جابدىقتاردى قولدانۋدى بىلمەيتىن قارتتار، جاس بالاسىمەن ناۋقاس كورسەتۋگە كەلەتىن انالار دەيسىز بە، شيپاگەرگە كورسەتۋشى بولعان ءبىر ايدان بەرى فۋ كىشيننىڭ قىزمەت كورسەتكەن ناۋقاسى 80 نەشە ادامعا جەتىپتى.
”شيپاگەرگە كورسەتۋشى دەگەنىمىز ناۋقاستىڭ ’ۋاقىتشا جاقىن جان اشىرى‘. ايتسەدە ءبىز قاريدارلارىمىزعا شيپاحانا جانە مامان شيپاگەر تانىستىرمايمىز، ولار كەڭەس سۇراپ جاتسا، پايدالانۋعا جارايتىن پىكىرىمىزدى ايتامىز“. فۋ كىشين ۇنەمى شيپاگەرگە كورسەتۋ قىزمەتىن وسىلاي ءتۇسىندىرىپ، ”جالداپتارمەن“، ”ناۋقاستى شىرعالاۋشىلارمەن“ ءوز شەكاراسىن ايقىن اجىراتىپ وتىرادى.
تۇستەن كەيىن سەرىكتەستىككە قايتىپ بارعان فۋ كىشين تاعى دا قاريدارلارىنا تەلەفون جالعاپ، قايىرا جاعداي ۇعىسۋمەن قاربالاس بولدى: ”سالەمەتسىز بە، ابدۇل (جاناما اتى)، ۇلىڭىز ءدارىسىن ۋاعىندا ءىشىپ جاتىر ما؟ كوزى ءتاۋىر بولىپ قالدى ما“؟ بۇل ونىڭ الدىڭعى اپتادا شيپاگەرگە كورسەتكەن ناۋقاس ادامى ەكەن، قاشقاردان ۇرىمجىگە كەلىپ ەمدەلگەن 6 جاستاعى سول ۇل بالا كوزىنە تۋما اق ءتۇسۋ ناۋقاسىن ۋاعىندا ەمدەتپەگەندىكتەن، ءبىر كوزى كورمەي قالىپتى، فۋ كىشين بۇعان الاڭداۋمەن بولدى.
”بۇل ءوزى ادامدارعا جان اشىرلىعىڭدى وياتىپ وتىراتىن كاسىپ ەكەن، ناۋقاستاردىڭ اۋرۋ جاعدايىنا قاراي كوڭىل كۇيىڭ دە تولقىپ، باسىلىپ تۇرادى“. ءار جولى جۇزدەسە قالعان كەزدە داعدارىپ وتىرعان جانە تۇسىنە الماي وتىرعان ناۋقاستاردىڭ شيپاگەرگە كورسەتۋ اياقتاعان كەزدە العىس جاۋدىرىپ، ريزاشىلىق بىلدىرگەنىن كورگەندە، فۋ كىشين بۇل كاسىپتى ىستەي بەرۋىم كەرەك دەپ ويلايدى ەكەن.
ءبىر ايدان استام جۇمىس ىستەۋ كەشىرمەسىنەن فۋ كىشين شيپاگەرگە كورسەتۋشى سىندى وسى جاڭا كاسىپكە قىزىعىپ قالدى، سونداي - اق شيپاگەرگە كورسەتۋشىلەردىڭ ءبىلىمى شەكتى بولۋ، سەنىمگە يە بولۋى قيىن بولۋ سىندى ماسەلەلەردى دە بايقاپتى. ول شيپاگەرگە كورسەتۋشى بولۋ كاسىبىنە ەرتەرەك كاسىپتىك ولشەم شىعارىلىپ، اناعۇرلىم جۇيەلى باسقارۋدىڭ جۇزەگە اسۋىن، ناۋقاستار مەن كاسىپ ىستەۋشىلەردىڭ قاجەتىن اناعۇرلىم ويداعىداي قاناعاتتاندىرۋعا مۇمكىندىك جاسالۋىن ءۇمىت ەتەدى.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
