شي جينپيڭ ۋكراينانىڭ زۇڭتۇڭى زەلەنسكيمەن تەلەفوندا سويلەستى
2023.04.27 16:52 كەلۋ قاينارى : حالىق تورابى
شينحۋا اگەنتتىگى، 4 - ايدىڭ 26 - كۇنى، بەيجيڭ. 4 - ايدىڭ 26 - كۇنى تۇستەن كەيىن مەملەكەت ءتوراعاسى شي جينپيڭ ۋادە بويىنشا ۋكراينانىڭ زۇڭتۇڭى زەلەنسكيمەن تەلەفوندا سويلەستى. ەكى جاق جۇڭگو - ۋكراينا قارىم - قاتىناسى جانە ۋكراينا داعدارىسى تۋراسىندا پىكىر الماستىردى.
شي جينپيڭ بىلاي دەپ اتاپ كورسەتتى: جۇڭگو - ۋكراينا قارىم - قاتىناسى 31 جىلدىق دامۋ بارىسىن باسىپ ءوتىپ، ستراتەگيالىق سەرىكتەستىك قارىم - قاتىناس دەڭگەيىنە جەتىپ، ەكى ەلدىڭ ءوز - ءوزىنىڭ دامۋىنا، گۇلدەنۋىنە دەم بەردى. مەن زەلەنسكي زۇڭتۇڭنىڭ تالاي رەت جۇڭگو - ۋكراينا قارىم - قاتىناسىن دامىتۋعا جانە جۇڭگومەن سەلبەسۋگە ءمان بەرەتىنىن بىلدىرگەنىن القايمىن، ۋكراينا جاقتىڭ بىلتىر جۇڭگو ازاماتتارىنىڭ وسى ەلدەن شىعىپ كەتۋى ءۇشىن زور كومەك كورسەتكەنىنە العىس ايتامىن. ءبىر - ءبىرىنىڭ يەلىك ۇقىعى مەن تەرريتوريا تۇتاستىعىنا قۇرمەت ەتۋ − جۇڭگو - ۋكراينا قارىم - قاتىناسىنىڭ ساياسي نەگىزى. ەكى جاق بولاشاققا كوز جىبەرىپ، ەكى ەل قارىم - قاتىناسىنا ۇزاق بولاشاقتىق تۇرعىدان قاراۋدا جانە ونى جوسپارلاۋدا تاباندى بولىپ، ەكى جاقتىڭ ءوزارا قۇرمەت ەتۋ، شىنايى مامىلە جاساۋ ءداستۇرىن جالعاستىرىپ، جۇڭگو مەن ۋكراينانىڭ ستراتەگيالىق سەرىكتەستىك قارىم - قاتىناسىنىڭ العا قاراي دامۋىن ىلگەرىلەتۋى كەرەك. جۇڭگو جاقتىڭ جۇڭگو - ۋكراينا قارىم - قاتىناسىن دامىتۋ تىلەگى دايەكتى، ايقىن. حالىقارالىق جاعدايدا مەيلى قانداي وزگەرىس بولسا دا، جۇڭگو جاق ۋكراينا جاقپەن بىرگە ەكى ەلدىڭ ءوزارا ءتيىمدى سەلبەستىگىن ىلگەرىلەتۋدى قالايدى.
شي جينپيڭ بىلاي دەپ اتاپ كورسەتتى: ۋكراينا داعدارىسىنىڭ كۇردەلى وزگەرىسى حالىقارالىق جاعدايعا كەلەلى ىقپال جاسايدى. ۋكراينا داعدارىسى ماسەلەسىندە جۇڭگو باستان - اياق بەيبىتشىلىك جاعىندا تۇرادى، وزەكتى مايدانى − تاتۋلاستىرۋ، كەلىسسوزدى جەبەۋ. مەن ىلگەرىندى - كەيىندى ”ءتورت كەرەكتى“، ”ءتورت بىرگەنى“ جانە ”ءۇش تولعانىستى“ ورتاعا قويدىم. جۇڭگو جاق وسى نەگىزدە «ۋكراينا داعدارىسىن ساياسي جولمەن شەشۋ جونىندەگى جۇڭگو تۇرعىسى» دەگەن قۇجاتتى جاريالادى. جۇڭگو ۋكراينا داعدارىسىن تۋدىرۋشى دا، داعدارىستىڭ قاتىستى جاعى دا ەمەس. بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە جاۋاپكەرلىك ارقالايتىن ءىرى ەل رەتىندە، ءبىز ءارى قىزىقتاپ قاراپ تۇرمايمىز، ءارى وت ۇستىنە ماي قۇيمايمىز، ورايدان پايدالانىپ پايدا تۇسىرۋگە ءتىپتى دە ۇرىنبايمىز. جۇڭگو جاقتىڭ ارەكەتى اشىق، ادىلەتتى بولىپ كەلەدى. كەلىسسوز وتكىزۋ − بىردەن - ءبىر شىعار جول. يادرولىق سوعىستا جەڭىمپاز بولمايدى. يادرو ماسەلەسىنە مامىلە جاساۋدا قاتىستى جاقتار سابىرلى دا ۇستامدى بولىپ، شىن مانىندە ءوزىنىڭ جانە بۇكىل ادامزاتتىڭ بولاشاعى مەن تاعدىرىنا كوز جىبەرىپ، داعدارىستى بىرگە ويداعىداي مەڭگەرۋى كەرەك. قازىر ءار جاقتىڭ اقىلعا سيىمدى وي - تىلەگى كۇشەيۋدە، ورايدى مىقتى يگەرىپ، داعدارىستى ساياسي جولمەن شەشۋگە ءتيىمدى شارت - جاعداي ازىرلەۋ كەرەك. ءار جاقتىڭ ۋكراينا داعدارىسى بارىسىندا تەرەڭ تولعانىپ، تىلدەسۋ ارقىلى ەۆروپانىڭ باياندى تىنىشتىق جولىن بىرگە قاراستىرۋىن ءۇمىت ەتەمىن. جۇڭگو جاق تاتۋلاستىرۋدا، كەلىسسوزدى جەبەۋدە تاباندى بولىپ، سوعىستى توقتاتۋدى، بەيبىتشىلىكتى قالپىنا كەلتىرۋدى تەزدەتۋگە قۇلشىنادى. جۇڭگو جاق جۇڭگو ۇكىمەتىنىڭ ەۆروپا - ازيا ىستەرىندەگى ەرەكشە ۋاكىلىن ۋكراينا قاتارلى ەلدەرگە ساپارلاي بارۋعا جىبەرىپ، ۋكراينا داعدارىسىن ساياسي جولمەن شەشۋ جونىندە ءارقايسى جاقپەن ىشكەرىلەي پىكىر اۋىستىرادى. جۇڭگو جاق ۋكراينا جاققا تالاي رەت ادامگەرشىلىك كومەگىن بەردى، قولىنان كەلگەنىنشە ۇزدىكسىز كومەكتەسۋدى قالايدى.
زەلەنسكي ءتوراعا شي جينپيڭنىڭ تاعى دا سايلانعانىن قۇتتىقتاپ مىنالاردى ءبىلدىردى: جۇڭگونىڭ قول جەتكىزگەن عالامات تابىستارىن القايمىن، ءتوراعا شي جينپيڭنىڭ باسشىلىعىندا جۇڭگونىڭ ءتۇرلى سىن - سايىسقا ءساتتى توتەپ بەرىپ، ۇزدىكسىز العا قاراي داميتىنىنا سەنەمىن. جۇڭگو جاق حالىقارالىق ىستەردە بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىن ۇستانىپ، حالىقارالىق ساحنادا وراسان زور ىقپال كۇشىن ساۋلەلەندىرۋدە. ۋكراينا جاق ءبىر جۇڭگو ساياساتىنان جازبايدى، جۇڭگومەن جاپپاي سەلبەستىك ورىستەتىپ، ۋكراينا - جۇڭگو قارىم - قاتىناسىنىڭ جاڭا پاراعىن اشىپ، دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋ ءۇشىن بىرگە كۇش سالۋدى ءۇمىت ەتەدى. زەلەنسكي قازىرگى ۋكراينا داعدارىسى جونىندەگى كوزقاراسىن تانىستىرىپ، جۇڭگونىڭ ۋكرايناعا ادامگەرشىلىك كومەك كورسەتكەنىنە العىس ايتتى، جۇڭگونىڭ بەيبىتشىلىكتى قالپىنا كەلتىرۋ، داعدارىستى ديپلوماتيالىق ءتاسىل ارقىلى شەشۋ جولىندا ماڭىزدى رول اتقارۋىن قارسى الاتىنىن ءبىلدىردى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
