شي جينپيڭ ەريتەريانىڭ زۇڭتۇڭى يساياسپەن كەڭەس وتكىزدى

2023.05.16 15:44 كەلۋ قاينارى : حالىق تورابى

　　شينحۋا اگەنتتىگى، 5 - ايدىڭ 15 - كۇنى، بەيجيڭ (ءتىلشى جىڭ ميڭدا). 5 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن ەريتەريانىڭ زۇڭتۇڭى يساياسپەن كەڭەس وتكىزدى.

　　شي جينپيڭ بىلاي دەپ اتاپ كورسەتتى: جۇڭگو مەن ەريتەريانىڭ ءداستۇرلى دوستىعى تەرەڭ. بيىل 5 - ايدىڭ 24 – كۇنى ەكى ەل ديپلوماتيالىق قارىم - قاتىناس ورناتۋدىڭ 30 جىلدىعىن اتاپ ءوتۋ كۇنىن قارسى الادى. 30 جىلدان بەرى جۇڭگو مەن ەريتەريا باستان – اياق ءبىر – بىرىنە سەنىم ارتىپ، ءبىر – ءبىرىن قولداپ كەلدى. جۇڭگو جاق جۇڭگو مەن ەريتەريا قارىم - قاتىناسىنا ستراتەگيالىق بيىكتەن جانە ۇزاق بولاشاقتىق تۇرعىدان مامىلە جاسايدى جانە ونى دامىتادى، ەريتەريا جاقتىڭ سەنىمدى دوسى. قازىرگى ورنىقسىزدىققا تولى حالىقارالىق جاعدايدا جۇڭگو - ەريتەريا قارىم - قاتىناسىن ويداعىداي دامىتۋ ەكى ەلدىڭ ورتاق جانە ۇزاق بولاشاقتىق مۇددەسىنە ۇيلەسىپ قانا قالماستان، ءوڭىردىڭ بەيبىتشىلىگى مەن حالىقارالىق ادىلدىك پەن تۋراشىلدىقتى قورعاۋدا دا ماڭىزدى مانگە يە. جۇڭگو جاق ەريتەريا جاقپەن ەكى ەلدىڭ دوس ۇستىنە جولداستىق سىندى ەتەنە دوستىق قارىم - قاتىناسىن تەرەڭدەتىپ، جۇڭگو مەن ەريتەريانىڭ ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى قالايدى.

　　شي جينپيڭ بىلاي دەپ دارىپتەدى: جۇڭگو جاق ەريتەريا جاقتىڭ ۇزاق ۋاقىتتان بەرى دەربەس، ءوز - وزىنە قوجايىن بولۋ ديپلوماتيالىق ساياساتىندا تاباندى بولعانىن القايدى، ەريتەريانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن قاراستىرۋىن باتىل قولدايدى، ەريتەريا جاقتىڭ ءوزىنىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن باتىل قولدايدى، سىرتقى جاقتىڭ ەريتەريانىڭ ىشكى ىسىنە كيلىگۋىنە، زورلاپ تاڭىپ جازا قولدانۋىنا قارسى تۇرادى. جۇڭگو جاق ەريتەريا جاقپەن ەل باسقارۋ تاجىريبەلەرى جونىندە اۋىس - كۇيىس ورىستەتىپ، ءبىر - ءبىرىن ۇزدىكسىز قولداپ، سىڭار جاقتىلىق جانە زورەكەرلىك ارەكەتتەرگە بىرگە قارسى تۇرىپ، ەكى ەلدىڭ جانە قالىڭ وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى. جۇڭگو جاق ەريتەريا جاقپەن ”ءبىر بەلدەۋ، ءبىر جولدى“ بىرگە قۇرۋ، جۇڭگو - افريكا سەلبەستىك تالقى مىنبەرى، ”افريكا ءمۇيىسىنىڭ بەيبىت دامۋ وي جەلىسى“ سياقتى جۇلگەدەن جانە تۇعىردان پايدالانىپ، ءوزارا ءتيىمدى سەلبەستىكتى ىلگەرىلەتىپ، بىرگە دامۋدى جۇزەگە اسىرۋدى قالايدى. جۇڭگو جاق جۇڭگو قارجى قوسقان كاسىپورىنداردى ەريتەرياعا بارىپ قارجى قوسىپ، كاسىپتى گۇلدەندىرۋگە شابىتتاندىرادى جانە قولدايدى، ەريتەريا جاقپەن نەگىزدىك قۇرىلعى قۇرىلىسى، تەلەگراف، اۋىل شارۋاشىلىعى، كەن شارۋاشىلىعى، بالىق شارۋاشىلىعى سياقتى سالالارداعى سەلبەستىكتى كۇشەيتۋ جونىندە ىزدەنىس جاساپ، ەريتەرياعا كومەك بەرەتىن ەمدەۋ اترەتى، جوعارى دارەجەلى اۋىل شارۋاشىلىق ماماندارى سياقتى نىسانداردى ۇزدىكسىز ويداعىداي اتقارۋدى قالايدى. ەريتەريا جاقتىڭ جۇڭگو جاقتىڭ تاياۋدا سۋدانداعى جۇڭگو ازاماتتارىن شىعارىپ اكەتۋىنە قولداۋ كورسەتكەنىنە جانە كومەكتەسكەنىنە العىس ايتادى، بۇل جۇڭگو مەن ەريتەريا ەكى ەلدىڭ تاۋقىمەتتى بىرگە وتكەرەتىن، ءوزارا كومەكتەسەتىن، قارايلاساتىن تەرەڭ سۇيىسپەنشىلىگىن تاعى ءبىر رەت ايگىلەدى. ەكى جاق اناعۇرلىم كوپ شارا قولدانىپ گۋمانيتارلىق اۋىس - كۇيىستى جانە حالىقتار سۇيىسپەنشىلىگىن قويۋلاتۋى كەرەك.

　　شي جينپيڭ بىلاي دەپ اتاپ كورسەتتى: جاعداي قالاي دامىسا دا، ءوزارا قۇرمەت ەتۋ، ءوزارا ءتۇسىنىسۋ، ءوزارا قولداۋ، ءوزارا كومەكتەسۋ باستان - اياق جۇڭگو - افريكا دوستىعىنىڭ نەگىزى جانە نەگىزگى جەلىسى بولىپ كەلەدى، جۇڭگو - افريكا سەلبەستىگى وڭتۇستىك - وڭتۇستىك سەلبەستىگىندە جانە حالىقارالىق سەلبەستىك بارىسىندا ماڭىزدى جەتەكشىلىك رول اتقارۋدا. افريكا − ۇمىتكە تولى قۇتتى مەكەن. جاڭا جاعدايدا جۇڭگو مەن افريكانىڭ ىنتىماقتى، سەلبەستىكتى كۇشەيتۋى، ۋاقىتتىق قيىندىقتى بىرگە جەڭۋى ءارقانداي كەزدەگىدەن دە قاجەتتى. جۇڭگو جاق افريكا جاقپەن بىرگە ءداستۇرلى دوستىقتى ساۋلەلەندىرىپ، ستراتەگيالىق ءوزارا سەنىمدىلىكتى بەكەمدەپ، جۇڭگونىڭ ساپالى دامۋى مەن جۇڭگو ۇلگىسىندەگى وسىزامانداندىرۋى ارقىلى افريكاعا جاڭا وراي جاراتىپ، جۇڭگو مەن افريكانىڭ ناقتى سەلبەستىگىنىڭ تەرەڭدەۋىن، ناقتىلانۋىن ىلگەرىلەتىپ، اناعۇرلىم كوپ جاڭا تابىستارعا قول جەتكىزىپ، جۇڭگو مەن افريكانىڭ اناعۇرلىم تىعىز تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

　　يساياس ءوزىنىڭ جۇڭگومەن جارتى عاسىردان استام ۋاقىتتان بەرگى ەرەكشە سۇيىسپەنشىلىگىن ىقىلاسپەن ەسكە الىپ، مىنالاردى ءبىلدىردى: ەريتەريا حالقى جۇڭگو حالقىنىڭ ەريتەريانىڭ تاۋەلسىزدىك پەن ازاتتىققا قول جەتكىزۋى ءۇشىن باعالى رۋحاني جانە زاتتىق قولداۋ كورسەتكەنىن ماڭگى ۇمىتپايدى. جۇڭگو − ۇلى مەملەكەت. جاڭا جۇڭگو قۇرىلعاننان بەرى بىرىنشىدەن كەدەي، ەكىنشىدەن اق بولۋدان دۇنيە جۇزىندەگى ءىرى ەلگە اينالىپ، ادامزاتتىڭ بەيبىتشىلىگى مەن دامۋىنا كورنەكتى ۇلەس قوستى. جۇڭگو باستان - اياق ءمورال بيىگىندە تۇرىپ، دۇنيە ءجۇزى ءدوپ كەلىپ وتىرعان سىن - سايىستى شەشۋ ءۇشىن جۇڭگو جوباسىن العا قويىپ، حالىقارادا ادىلدىك پەن ادىلەتتىلىككە جەتەكشىلىك ەتىپ، تاۋەلسىزدىك پەن دامۋعا تالپىناتىن وركەندەپ كەلە جاتقان ەلدەردى جىگەرلەندىردى. جۇڭگونىڭ دامۋىن تەجەيتىن ءارقانداي قاسكۇنەمدىك، ءسوز جوق، جەڭىلىسكە ۇشىرايدى. قازىر حالىقارالىق ءتارتىپتىڭ وزگەرىسى شەشۋشى كەزەڭدە تۇر، افريكا ەلدەرى ءالى دە زورەكەرلىككە جانە ءتۇرلى تەڭسىز، ادىلەتسىز مامىلەگە ءدوپ كەلىپ وتىر، حالىقارالىق قوعام جۇڭگونىڭ ادامزاتتىڭ دامۋى مەن العا باسۋىنا جانە حالىقارالىق ادىلدىك پەن ادىلەتتىلىككە اناعۇرلىم زور ۇلەس قوسۋىن ءتىپتى دە ءۇمىت ەتەدى جانە وعان سەنەدى. ەريتەريا جاق جۇڭگو جاقپەن سەلبەستىكتى كۇشەيتۋدى ءۇمىت ەتەدى، ەريتەريا مەن جۇڭگونىڭ ستراتەگيالىق سەرىكتەستىك قارىم - قاتىناسىنىڭ ەريتەريانىڭ مەملەكەتتىڭ ەكونوميكالىق، قوعامدىق دامۋىن جۇزەگە اسىرۋىنا دەم بەرەتىنىنە سەنەمىن.

　　كەڭەستىڭ الدىندا شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا يساياسقا ارناپ قارسى الۋ سالتىن وتكىزدى.

　　يساياس كەلگەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن ەريتەريانىڭ مەملەكەت اندەرىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. يساياس شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

　　سول كۇنى كەشتە شي جينپيڭ حالىق سارايىنىڭ التىن ءتۇستى زالىندا يساياسقا ارناپ قارسى الۋ قوناعاسىن بەردى.

　　ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.

　　كەلۋ قاينارى: حالىق تورابى

5 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ەريتەريانىڭ زۇڭتۇڭى يساياسپەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا يساياسقا ارناپ قارسى الۋ سالتىن وتكىزۋدە. سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved