لي چياڭ ەريتەريانىڭ زۇڭتۇڭى يساياسپەن كەزدەستى
2023.05.16 15:49 كەلۋ قاينارى : حالىق تورابى
شينحۋا اگەنتتىگى، 5 - ايدىڭ 15 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 5 - ايدىڭ 15 - كۇنى تۇستەن بۇرىن حالىق سارايىندا جۇڭگوعا مەملەكەتتىك ساپارمەن كەلگەن ەريتەريانىڭ زۇڭتۇڭى يساياسپەن كەزدەستى.
لي چياڭ مىنالاردى ءبىلدىردى: جۇڭگو مەن ەريتەريا ديپلوماتيالىق قارىم - قاتىناس ورناتقان 30 جىلدان بەرى ەكى ەلدىڭ ساياسي سەنىمدىلىگى بەكەمدەلىپ، سەلبەستىگى كۇن سايىن جيىلەدى. بىلتىر ءتوراعا شي جينپيڭ زۇڭتۇڭ مىرزامەن جۇڭگو – ەريتەريا قارىم - قاتىناسىن ستراتەگيالىق ارىپتەستىك قارىم - قاتىناسقا كوتەرۋدى ۇيعارىپ، ەكى ەلدىڭ ءار سالاداعى سەلبەستىگىن تەرەڭدەتۋىنە تىڭ دا پارمەندى قوزعاۋشى كۇش ۇستەدى. جۇڭگو ەريتەريامەن بىرگە جۇڭگو مەن ەريتەريانىڭ ستراتەگيالىق سەرىكتەستىك قارىم - قاتىناسىنىڭ مازمۇنىن ۇزدىكسىز بايىتىپ، ەكى ەل سەلبەستىگىنىڭ ستراتەگيالىلىعى مەن باياندىلىعىن جوعارىلاتىپ، تەڭ يگىلىككە كەنەلىپ دامۋدى جۇزەگە اسىرۋدى قالايدى.
لي چياڭ مىنالاردى اتاپ كورسەتتى: ەكى جاق وزدەرىنىڭ ەكونوميكالىق، قوعامدىق دامۋ ستراتەگياسىن ىشكەرىلەي ۇشتاستىرىپ، كاسىپ سالاسىن دامىتۋ جوباسىن جاساۋ، سونداي - اق ونەركاسىپ باقشا رايونى قۇرىلىسى، ءتۇيىندى كاسىپتەردىڭ دامۋىن قولداۋ سياقتى جاقتاردا اۋىس - كۇيىستى كۇشەيتۋ كەرەك. نەگىزدىك قۇرىلعى، تەڭىز - مۇحيت بالىق شارۋاشىلىعى، سۋ بايلىعى، ەنەرگيا - كەن اشۋ سياقتى سالالارداعى سەلبەستىكتى تەرەڭدەتىپ، سيفرلى ەكونوميكا، جاسىل ەكونوميكا، كوك ءتۇستى ەكونوميكا سياقتى سەلبەستىكتىڭ جاڭا ارتۋ تۇيىندەرىن جەتىلدىرۋ كەرەك. جۇڭگو ەلتريانىڭ ەكونوميكالىق، قوعامدىق دامۋىنا شاماسىنىڭ جەتىسىنشە ۇزدىكسىز كومەكتەسەدى. ەكى جاق وڭىرلىك جانە حالىقارالىق ىستەردە اناعۇرلىم تىعىز سايكەسىپ، جۇڭگو - افريكا سەلبەستىك تالقى مىنبەرىنىڭ ”توعىز ينجەنەرياسىن“ جانە ”افريكا ءمۇيىسىنىڭ بەيبىت دامۋ وي جەلىسىن“ تياناقتاندىرىپ، ناعىز كوپ جاقتىلىقتا تاباندى بولىپ، وكتەمدىك زورلىق - زومبىلىققا باتىل قارسى تۇرىپ، جۇڭگو مەن ەريتەريانىڭ جانە قالىڭ وركەندەپ كەلە جاتقان ەلدەردىڭ ورتاق مۇددەسىن قورعاپ، دۇنيە ءجۇزىنىڭ بەيبىتشىلىگى مەن دامۋىن جانە حالىقارالىق ادىلدىك پەن تۋراشىلدىقتى قورعاۋى كەرەك.
يساياس مىنالاردى ءبىلدىردى: ەريتەريا جاق جۇڭگو جاقتىڭ ەريتەريانىڭ تاۋەلسىزدىگى مەن دامۋىن جۇزەگە اسىرۋىنا كورسەتكەن باتىل قولداۋىنا العىس ايتادى، جۇڭگو جاقتىڭ دۇنيە ءجۇزىنىڭ بەيبىتشىلىگىن قورعاۋعا، ادامزاتتىڭ وسىزاماندانۋىنىڭ جاڭا جولىن اشۋعا قوسقان ماڭىزدى ۇلەسىن ايرىقشا القايدى. ەريتەريا جاق جۇڭگو جاقپەن دوستىق سەلبەستىكتى كۇشەيتىپ، جۇڭگونىڭ تاجىريبەلەرىنەن ۇلگى الىپ، ەريتەريا مەن جۇڭگونىڭ ستراتەگيالىق سەرىكتەستىك قارىم - قاتىناسىنىڭ ونان ارى دامۋىن ىلگەرىلەتىپ، افريكا مەن جۇڭگو دوستىعىنىڭ جاڭا داستانىن جازىپ، زورەكەرلىككە بىرگە قارسى تۇرىپ، اناعۇرلىم ءادىل، ادىلەتتى حالىقارالىق ءتارتىپتى قول ۇستاسا ورناتۋدى قالايدى.
چين گاڭ قاتارلىلار كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
