توقتاربەك دۇنيە جۇزىلىك جۇلدەلى جارىستا كۇمىس مەدالدى قانجىعالادى
جۇڭگو ەرلەر بوكس تاريحىنداعى ەكىنشى ادامعا اينالدى
2023.05.17 09:19 كەلۋ قاينارى : حالىق تورابى
شينجياڭ گازەتىنىڭ 5 – ايدىڭ 15 – كۇنى ۇرىمجىدەن بەرگەن حابارى (دۇڭ لياڭ). ءتىلشىنىڭ شينجياڭ ۇيعۇر اۆتونوميالى رايوندىق دەنە تاربيە مەكەمەسى بوكس سپورتىن باسقارۋ ورتالىعىنان ۇعىسۋىنشا، 5 ـ ايدىڭ 14 ـ كۇنى كەشتە 2023 ـ جىلعى IBA حالىقارالىق بوكس بىرلەستىگى ەرلەر بوكس دۇنيە جۇزىلىك جۇلدەلى جارىسىنىڭ 80 كيلوگرام سالماق دارەجەسىندەگىلەردىڭ شەشۋشى جارىسىندا، جۇڭگولىق بوكسشى توقتاربەك تاڭاتقان ۇلى قىمباتتى كۇمىس مەدالدى قانجىعالادى. بۇل ناتيجەمەن ول زوۋ شىميڭنان كەيىنگى دۇنيە جۇزىلىك بوكس جۇلدەلى جارىسىندا شەشۋشى جارىسقا وتكەن ءارى كۇمىس مەدال قانجىعالاعان جۇڭگولىق ەكىنشى ادامعا اينالدى.
وسى رەتكى دۇنيە جۇزىلىك جۇلدەلى جارىس 4 – ايدىڭ 30 – كۇنىنەن 5 – ايدىڭ 14 –كۇنىنە دەيىن وزبەكستاننىڭ استاناسى تاشكەنتتە وتكىزىلدى، 107 مەملەكەتتەن كەلگەن 539 سپورتشى جارىسقا قاتىناستى. جۇڭگونىڭ ەرلەر بوكس كومانداسى وسى رەت جالپى 10 بوكسشى جىبەرىپ، 13 دارەجەنىڭ ىشىندە 10 دارەجە بويىنشا جارىسقا قاتىناستىردى، مۇنىڭ ىشىندە شينجياڭدىق 2 سپورتشى بار، ولار 80 كيلوگرام دارەجەسىندەگى توقتاربەك تاڭاتقان ۇلى مەن 92 كيلوگرامنان جوعارى سالماق دارەجەسىندەگى بايقونىس دانابەك ۇلى.
80 كيلوگرام سالماق دارەجەسى بويىنشا توقتاربەك ارمەنيا مەن ماروككو بوكسشىسىن جەڭىپ 16 مىقتىعا كىردى، سەگىز مىقتىنىڭ قاتارىنا كىرەر جارىستا توكيو وليمپياداسىنا قاتىناسقان ەگيپەت كومانداسىنىڭ بوكسشىسى سالاحتى جەڭدى، ءتورت مىقتىنىڭ قاتارىنا كىرەردە جەڭىلىپ قالۋ قاتەرى وتە باسىم بولعان توكيو وليمپياسىندا 81 كيلوگرام سالماق دارەجەسى بويىنشا اعا جۇلدەگەر بولعان ءبىرىنشى ءنومىرلى ۇمىتكەر كۋبا بوكسشىسى لوپەستى جەڭدى، جارتىلاي شەشۋشى جارىستا ەكىنشى ءنومىرلى ۇمىتكەر يسپانيا بوكسشىسى حاليدۆتى جەڭدى، باستان - اياق تاماشا ناتيجەمەن شەشۋشى جارىسقا كىردى، ءارمايدان جارىستىڭ دەڭگەيى ەرەكشە جوعارى دەۋگە بولادى.
شەشۋشى جارىستا توقتاربەك قازاقستاندىق بوكسشى نۇربەك ورالبايمەن كەزدەستى، ەكەۋى وتكەن جىلعى قازاقستاندا وتكىزىلگەن حالىقارالىق شاقىرۋ جارىسىندا بەلدەسكەن بولاتىن. جارىس باستالا قالعاندا توقتاربەكتىڭ بابىنا كەلۋى باياۋ بولىپ، شابۋىلداۋدا ازىراق ءارى – سارىلىك بايقاتىپ، قارسىلاسىنا شابۋىلداۋ ورايىن بەرىپ قويعاندىقتان، قارسىلاسى بىرىككەن قايتارما سوققى بەرەدى، ءبىر مەزەت ىرىقسىز كۇيگە ءتۇستى، بۇل جولعى كەزدەسۋدە 5 تورەشىنىڭ ىشىندەگى 4 تورەشى ورالبايدى جەڭدى دەپ قارادى. ەكىنشى رەتكى كەزدەسۋدە توقتاربەك تاماشا جاعدايعا ءوتىپ، ىرىقتى تۇردە قارسىلاسىنا تالاي رەت ءساتتى شابۋىل جاسادى، ال، قارسى جاق جاقىن ارالىقتا شابۋىلداۋ، قورعانۋ بارىسىندا بەلگىلى باسىمدىلىقتى بايقاتتى، ەكى جاق تا وسال تۇسپەدى. ەڭ سوڭعى كەزدەسۋدە، جالپى ۇپاي بويىنشا ءالى دە ارتتا قالعان توقتاربەك شابۋىلدى ۇزدىكسىز كۇشەيتتى، ورالباي بەتپە - بەت توتەپ بەرە الماي، امالسىزدان شەگىنىس جاساپ قايتارما سوققى بەرۋ جانە قۇشاقتاۋ تاكتيكاسىن قولدانىپ توتەپ بەردى، 4 تورەشى توقتاربەك وسى رەتكى شايقاستا ۇستەم ورىنعا شىقتى دەپ كەسىم جاسادى. ەڭ سوڭىندا، 3 رەتكى كەزدەسۋدەگى ۇپاي جيناۋ بويىنشا تورەشىلەر 1: 4 ۇپايمەن توقتاربەكتى جەڭىلدى دەپ قارادى.
وسىلاي بولا تۇرسا دا، دۇنيە جۇزىلىك جۇلدەلى جارىسقا ەكىنشى رەت قاتىناسقان توقتاربەك ءوزىنىڭ حالىقارالىق جارىستاعى ەڭ جاقسى ناتيجەسىن جاراتتى، ەرلەردىڭ 80 كيلوگرامدىق سالماق دارەجەسى بويىنشا دۇنيە جۇزىندەگى ماڭداي الدى سپورتشىلاردىڭ قاتارىنان ورىن الدى. مەملەكەتتىك كومانداداعى ناتيجەسى دە ونىڭ ارىپتەس اعاسى زوۋ شىميڭنان كەيىنگى ورىندى الدى. زوۋ شىميڭ 2003 - جىلى تۇڭعىش رەت دۇنيە جۇزىلىك جۇلدەلى جارىستىڭ شەشۋشى جارىسىنا قاتىناسىپ، جۇلدەگەر بولىپ، جۇڭگو ەرلەر بوكس كومانداسىنا تۇڭعىش رەت دۇنيە جۇزىلىك جۇلدەلى جارىس مەدالىن الىپ بەرگەن. وسىدان كەيىن 2005 - جىلى، 2007 - جىلى جانە 2011 – جىلى دۇنيە جۇزىلىك جۇلدەلى جارىستىڭ التىن مەدالىن 3 رەت قانجىعالاعان.
”جۇرتتىڭ مەنى ارىپتەس اعام زوۋ شىميڭمەن بىرگە اۋىزعا العاندىعىن ماقتانىش سەزىنەمىن، بۇل دا مەنىڭ سوڭعى جىلداردان بەرگى تالماي قۇلشىنۋىمنىڭ ناتيجەسى. مەن وسىمەن توقتاپ قالمايمىن، پاريجدا تىڭ بيىكتى باعىندىرسام دەگەن ويدامىن“دەدى توقتاربەك.
بۇدان سىرت، بايقونىس دانابەك ۇلى ەرلەردىڭ 92 كيلوگرام سالماق دارەجەسىنەن جوعارى دارەجە بويىنشا الدىڭعى ءۇش مايدان جارىستا ارت – ارتىنان جەڭدى، مۇندا اتالعان سالماقتىڭ ءبىرىنشى ءنومىرلى ۇمىتكەرى بولعان ارمەنيا بوكسشىسى بار. ول سەگىز مىقتىنىڭ جارىسىندا كۋبا بوكسىشىسىنان جەڭىلىپ، سوڭىندا بەسىنشى بولدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
