شي جينپيڭ جاڭا زەللانديانىڭ زۇڭليى حيپكينسپەن كەزدەستى
2023.06.28 15:10 كەلۋ قاينارى : حالىق تورابى
6 - ايدىڭ 27 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن جاڭا زەللانديانىڭ زۇڭليى حيپكينسپەن كەزدەستى. سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن
شينحۋا اگەنتتىگى، 6 - ايدىڭ 27 – كۇنى، بەيجيڭ (ءتىلشى ياڭ ي – جۇن). 6 - ايدىڭ 27 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارمەن كەلگەن جاڭا زەللانديانىڭ زۇڭليى حيپكينسپەن كەزدەستى.
شي جينپيڭ بىلاي دەپ اتاپ كورسەتتى: زۇڭلي مىرزا مىندەتكە وتىرعاننان كەيىن جۇڭگو - جاڭا زەللانديا قارىم - قاتىناسىنا ءمان بەرەتىنىن، جۇڭگومەن سەلبەستىكتى ۇزدىكسىز كۇشەيتەتىنىن تالاي رەت ءبىلدىردى، مەن مۇنى توتەنشە قۇپتايمىن. مەن جۇڭگونىڭ جاڭا زەللانديامەن قارىم - قاتىناسىنا اۋەلدەن باسا ءمان بەرىپ كەلەمىن. 2014 - جىلى مەن جاڭا زەللانديادا ساپاردا بولدىم، ەكى جاق جالپى بەتتىك ستراتەگيالىق سەرىكتەستىك قارىم - قاتىناس ورناتقاندارىن جاريالادى. تاياۋداعى 10 جىلدان بەرى جۇڭگو - جاڭا زەللانديا قارىم - قاتىناسى باياندى، اقاۋسىز، ورنىقتى دامىپ، ەكى ەل حالىقتارىنا ناقتى پايدا جەتكىزدى، سونداي - اق ءوڭىردىڭ بەيبىتشىلىگى مەن ورنىقتىلىعىنا، دامۋىنا، كوركەيىپ - گۇلدەنۋىنە دە ءتيىمدى بولدى. جۇڭگو جاڭا زەللانديانى باستان - اياق دوس جانە سەرىك ساناپ كەلەدى، جاڭا زەللانديا جاقپەن بىرگە قۇلشىنىپ، ەكى ەل قارىم - قاتىناسىنىڭ جاڭا 50 جىلدىعىن باستاپ، جۇڭگو مەن جاڭا زەللانديانىڭ جالپى بەتتىك ستراتەگيالىق سەرىكتەستىك قاتىناسىن ورنىقتى، باياندى ىلگەرىلەتۋدى قالايدى.
شي جينپيڭ مىنالاردى دارىپتەدى: قازىر جۇڭگونىڭ وزەكتى مىندەتى − جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋ، مۇندا ساپالى دامۋدى جۇزەگە اسىرۋ − ماڭداي الدى مىندەت، بۇكىل جۇڭگو حالقىنىڭ ورتاق بايۋى − ماندىك تالاپ، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم زور ۇلەس قوسۋ − ماڭىزدى نىسانا. بۇل − بۇرىنعىلار ىستەپ كورمەگەن ءىس، ءبىراق ءبىز ۇزدىكسىز ىزدەنىس جاساپ، ەرلىكپەن العا باسامىز. جۇڭگو وسىنشاما ۇلكەن، حالىق سانى وسىنشاما كوپ، تەك قانا مەملەكەت پەن ۇلتتىڭ دامۋىن ءوز كۇشىنىڭ نەگىزىنە قويۋعا تۋرا كەلەدى. ءبىز توماعا - تۇيىقتىقتى ەمەس، قايتا ەل ءىشى بازارى مەن حالىقارالىق بازاردى اناعۇرلىم ويداعىداي تۇتاستىرۋدى دارىپتەيمىز. تەك اشىق ۇستالعان جۇڭگو عانا وسىزاماندانعان جۇڭگوعا اينالادى. دامۋ − جۇڭگو كوممۋنيستىك پارتياسىنىڭ بيلىك جۇرگىزىپ، مەملەكەتتى كوركەيتۋىندەگى ماڭداي الدى مىندەتى. ءبىز جوعارى دەڭگەيدە سىرتقا ەسىك اشۋدى ۇزدىكسىز زور كۇشپەن ىلگەرىلەتىپ، شەتەل ساۋداگەرلەرىنىڭ قارجى قوسۋ ۇقىق - مۇددەسىن زاڭ بويىنشا اناعۇرلىم ويداعىداي قورعايمىز.
شي جينپيڭ بىلاي دەپ اتاپ كورسەتتى: جۇڭگو - جاڭا زەللانديا قارىم - قاتىناسى ۇزاق ۋاقىت بويى جۇڭگونىڭ دامىعان ەلدەرمەن قارىم – قاتىناسىنىڭ الدىندا ءجۇردى. ەكى جاق العا ۇمتىلۋ رۋحىن ۇزدىكسىز ساۋلەلەندىرىپ، جۇڭگو مەن جاڭا زەللانديانىڭ جالپى بەتتىك ستراتەگيالىق سەرىكتەستىك قارىم - قاتىناسىن ۇزدىكسىز بەكەمدەۋى جانە تەرەڭدەتۋى كەرەك. قارسى جاقتى قارسىلاس ەمەس، قايتا سەرىك دەپ ءبىلۋ، قارسى جاقتى حاۋىپ ەمەس، قايتا وراي دەپ ءبىلۋ، جۇڭگو - جاڭا زەللانديا قارىم - قاتىناسىنىڭ دامۋ نەگىزىن ويداعىداي بەكەمدەۋ كەرەك. ءوزارا قۇرمەت ەتىپ، تەڭ تۇرعىدا مامىلە جاساۋ، اشىق، سيىسىمدى بولۋ، جاراسىمدى ءارى پارىقتى بولۋ، جۇڭگو - جاڭا زەللانديا ەركىن ساۋدا كەلىسىمىنىڭ جاڭارتىلعان نۇسقاسىن جانە «وڭىرلىك جالپى بەتتىك ەكونوميكالىق سەرىكتەستىك قارىم - قاتىناس كەلىسىمىن» ويداعىداي اتقارىپ، ساۋدا مەن قارجى قوسۋدىڭ ەركىن، قولايلى بولۋىن ىلگەرىلەتىپ، قارسى جاق كاسىپورىندارىنىڭ ءوز ەلىندە قارجى قوسىپ تيجارات جۇرگىزۋىنە اناعۇرلىم جاقسى ساۋدا ورتاسىن ازىرلەۋ كەرەك. وقۋ - اعارتۋ، مادەنيەت، ساياحات، جەرگىلىكتى ورىندار، حالىقتار قاتىناسى سياقتى سالالارداعى اۋىس - كۇيىستى، سەلبەستىكتى كۇشەيتىپ، جاڭا داۋىردەگى ”رەۋي اللي“ سياقتى ۇزدىكتەردى كوپتەپ جەتىلدىرىپ، جۇڭگو - جاڭا زەللانديا دوستىق بايتەرەگىنىڭ ءتىپتى دە ماۋەلەپ وسۋىنە مۇمكىندىك جاراتۋ كەرەك. ناعىز كوپ جاقتىلىق پەن ەركىن ساۋدا جۇيەسىن بىرگە دارىپتەۋ، كليمات وزگەرىسى سياقتى دۇنيە جۇزىلىك سىن - سايىسقا تىزە قوسا توتەپ بەرۋ كەرەك. ەكى جاقتىڭ پىكىرلەسۋدى جالعاستىرىپ، تىنىق مۇحيتتاعى ارال ەلدەرىنىڭ دامۋىنا بىرگە كومەكتەسۋىنە بولادى.
حيپكينس مىنالاردى ءبىلدىردى: بىلتىر جاڭا زەللانديا مەن جۇڭگو ديپلوماتيالىق قارىم - قاتىناس ورناتۋدىڭ 50 جىلدىعىن بىرگە قۇتتىقتادى، بۇل ەكى ەل قارىم - قاتىناسىنداعى ماڭىزدى بەلەس سانالادى. جاڭا زەللانديا - جۇڭگو حالقىنىڭ دوستىق بارىس - كەلىس تاريحى ۇزاق، جاڭا زەللانديا - جۇڭگو قارى - قاتىناسىنىڭ دامۋىندا مىعىم بەرىك نەگىز بار. جاڭا زەللانديا جاق جۇڭگومەن قارىم - قاتىناستى دامىتۋعا ايرىقشا ءمان بەرەدى، مەن وسى رەت وتە كولەمدى ەكونوميكا - ساۋدا ۋاكىلدەر ۇيىرمەسىن باستاپ جۇڭگوعا ساپارلاي كەلدىم، مۇنداعى ماقساتىم وسى رەتكى ساپار ارقىلى اناعۇرلىم كوپ سەلبەستىك ورايىن قاراستىرىپ، جاڭا زەللانديا - جۇڭگو قارىم - قاتىناسىن تىڭ دەڭگەيگە كوتەرۋ ءۇشىن بولىپ تابىلادى. جاڭا زەللانديا جاق جۇڭگو جاقپەن بارىس - كەلىستى كۇشەيتىپ، ەكى ەلدىڭ ەكونوميكا - ساۋدا، وقۋ - اعارتۋ، عىلىم - تەحنيكا، گۋمانيتارلىق سياقتى سالالارداعى سەلبەستىگىن ۇزدىكسىز كەڭەيتىپ، تەرەڭدەتىپ، ەكى ەلدىڭ ەركىن ساۋدا كەلىسىمىنىڭ دارەجەسىن جوعارىلاتۋدى قالايدى. جاڭا زەللانديا جاق بىلاي دەپ قارايدى: الاۋىزدىق ەكى جاقتى قارىم - قاتىناسقا انىقتاما بولماۋى كەرەك، ماڭىزدىسى، اۋىس - كۇيىس جاساۋ، ءوزارا قۇرمەت ەتۋ، جاراسىمدى ءارى پارىقتى بولۋ كەرەك. جاڭا زەللانديا جاق جۇڭگو جاقپەن ارال ەلدەرىنىڭ دامۋ ماسەلەسى جونىندە پىكىرلەسىپ وتىرۋدى قالايدى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
