حيلۇڭجياڭ ولكەلىك حالىق قۇرىلتايى تۇراقتى كوميتەتىنىڭ بۇرىنعى ورىنباسار مەڭگەرۋشىسى سۇڭ شيبيننىڭ پارا الۋ، ۇكىمەت اقشاسىن باسقاعا جۇمساۋ دەلوسىنا ءبىرىنشى سوت اشىلدى
2023.06.25 17:09 كەلۋ قاينارى : حالىق تورابى
2023 – جىلى 6 – ايدىڭ 21 – كۇنى، لياۋنيڭ ولكەسى شىنياڭ قالالىق ورتا دارەجەلى حالىق سوت مەكەمەسى ءبىرىنشى سوتتا حيلۇڭجياڭ ولكەلىك حالىق قۇرىلتايى تۇراقتى كوميتەتى پارتگرۋپپاسىنىڭ بۇرىنعى مۇشەسى، ورىنباسار مەڭگەرۋشىسى سۇڭ شيبيننىڭ پارا الۋ، ۇكىمەت اقشاسىن باسقاعا جۇمساۋ دەلوسىنا اشىق سوت اشتى، شىنياڭ قالالىق حالىق پروكۋراتۋراسى سوتقا ادام جىبەرىپ الەۋمەتتىك ايىپتاۋدى قولدادى. ايىپكەر سۇڭ شيبين جانە ونىڭ اقتاۋشىسى سوتقا كەلىپ ارىز - شاعىمعا قاتىناستى.
شىنياڭ قالالىق حالىق پروكۋراتۋراسى بىلاي دەپ ايىپتادى: 2005 - جىلدان 2021 - جىلعا دەيىن ايىپكەر سۇڭ شيبين ىلگەرىندى - كەيىندى حيلۇڭجياڭ ولكەسى داشيڭانليڭ ايماقتىق پارتكومنىڭ ورىنباسار شۋجيى، اكىمشىلىك مەكەمەسىنىڭ ءۋاليى، ورمان باسقارۋ مەكەمەسىنىڭ باستىعى، داشيڭانليڭ ايماقتىق پارتكومنىڭ شۋجيى، حيلۇڭجياڭ ولكەلىك دامۋ جانە رەفورما كوميتەتىنىڭ مەڭگەرۋشىسى، حاربين قالالىق پارتكومنىڭ ورىنباسار شۋجيى، قالا باستىعى، حيلۇڭجياڭ ولكەلىك حالىق قۇرىلتايى تۇراقتى كوميتەتى پارتگرۋپپاسىنىڭ مۇشەسى، ورىنباسار مەڭگەرۋشىسى، حيلۇڭجياڭ ولكەلىك باس جۇمىسشىلار ۇيىمىنىڭ ءتوراعاسى قاتارلى مىندەتتەردەگى كەزىندە قىزمەت قولايلىلىعى، سونداي - اق ورنى قالىپتاستىرعان قولايلى شارت – جاعدايلاردان پايدالانىپ قاتىستى ورىن جانە جەكەلەردىڭ كاسىپورىن ساۋداسى، جەردى الماستىرۋ، قۇرىلىستى كوتەرەگە الۋ، مىندەتىن ءوسىرۋ قاتارلى ىستەرىنە كومەك كورسەتكەن، باسقالاردىڭ بەرگەن مال - مۇلكىن زاڭسىز قابىلداعان، قابىلداعان اقشاسىنىڭ جالپى سوماسى 35 ميلليون 320 مىڭ يۋاننان اسقان. 2014 - جىلى سۇڭ شيبين حاربين قالالىق پارتكومنىڭ ورىنباسار شۋجيى، قالا باستىعى مىندەتىن وتەگەن كەزىندە قولايلىلىقتان پايدالانىپ، جەكە پايدانى كوزدەپ، جەكە ءوزى مەكەمە اتىنان حاربين قالاسىنىڭ قازىنالىق ارناۋلى قارجىسىنان 50 ميلليون يۋاندى باسقا ورىنداردىڭ پايدا تابۋ قيمىلىنا قارىزعا بەرۋدى ۇيعارعان. پروكۋراتۋرا ورگاندارى پارا الۋ قىلمىسى، ۇكىمەت اقشاسىن باسقاعا جۇمساۋ قىلمىسى بويىنشا سۇڭ شيبيننىڭ قىلمىستىق ىستەر جاۋاپكەرشىلىگىن قۋزاستىرۋدى ۇسىنىس ەتتى.
پروكۋراتۋرا ورگاندارى قاتىستى دالەل - ىسپاتتاردى كورسەتتى، ايىپكەر سۇڭ شيبين مەن ونىڭ اقتاۋشىسى فاكت كورسەتتى، ايىپتاۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتىستى، سۇڭ شيبين ەڭ سوڭعى ءسوزىن سويلەپ، سوت ۇستىندە قىلمىسىن تانىپ، رايىنان قايتقاندىعىن ءبىلدىردى. ەڭ سوڭىندا سوت ءۇزىلىس جاساعانىن، ۇكىمدى ارتىنان شىعاراتىندىعىن جاريالادى. حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن، اقپارات تىلشىلەرىنەن جانە ءار سالاداعى بۇقارادان 30 نەشە ادام سوت تەرگەۋىن سىرتتاي تىڭدادى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
