لي چياڭ گەرمانيانىڭ زۇڭتۇڭى شتاينمايەرمەن كەزدەستى
2023.06.20 16:57 كەلۋ قاينارى : حالىق تورابى
 |
سول جەر ۋاقىتى 6 - ايدىڭ 19 - كۇنى تۇستەن بۇرىن مەملەكەتتىك كەڭەستىڭ زۇڭليى لي چياڭ بەرليندەگى زۇڭتۇڭ سارايىندا گەرمانيانىڭ زۇڭتۇڭى شتاينمايەرمەن كەزدەستى.
سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن
|
«حالىق گازەتى»، 6 - ايدىڭ 19 – كۇنى. بەرلين (تىلشىلەر ليۋ جۇڭحۋا، ۋاڭ دي). سول جەر ۋاقىتى 6 - ايدىڭ 19 - كۇنى تۇستەن بۇرىن مەملەكەتتىك كەڭەستىڭ زۇڭليى لي چياڭ بەرليندەگى زۇڭتۇڭ سارايىندا گەرمانيانىڭ زۇڭتۇڭى شتاينمايەرمەن كەزدەستى.
لي چياڭ الدىمەن ءتوراعا شي جينپيڭنىڭ شتاينماير زۇڭتۇڭعا جولداعان ىقىلاستى سالەمىن جەتكىزدى. لي چياڭ بىلاي دەدى: بىلتىر − جۇڭگو مەن گەرمانيانىڭ ديپلوماتيالىق قارىم - قاتىناس ورناتقانىنىڭ 50 جىلدىعى، ءتوراعا شي جينپيڭ زۇڭتۇڭ مىرزامەن ءوزارا قۇتتىقتاۋ تەلەگرامماسىن جولداپ ءارى تەلەفوندا سويلەسىپ، ەكى جاقتى قارىم - قاتىناستىڭ اقاۋسىز، ورنىقتى دامۋىنا ستراتەگيالىق جەتەكشىلىك ازىرلەدى. جۇڭگو جۇڭگو - گەرمانيا قارىم - قاتىناسىنا باستان - اياق ايرىقشا ءمان بەرىپ كەلەدى. مەنىڭ وسى رەت گەرمانيادا ساپاردا بولۋداعى ءارى زۇڭلي شولتسپەن بىرگە جۇڭگو - گەرمانيا ۇكىمەتىنىڭ 7 - رەتكى كەڭەسىن باسقارۋداعى ماقساتىمىز ەكى ەل مەملەكەت باسشىلارىنىڭ ورتاق تانىمىن تياناقتاندىرىپ، سەنىمدى ۇزدىكسىز ارتتىرىپ، كۇدىك - كۇماننان ارىلتىپ، ەكى جاقتى سەلبەستىكتىڭ جاڭا ورايىن اشىپ، جۇڭگو مەن گەرمانيانىڭ جان - جاقتى ستراتەگيالىق سەرىكتەستىك قارىم - قاتىناسىنىڭ مازمۇنىن بايىتىپ، ەكى ەلدىڭ دامۋى مەن دۇنيە ءجۇزى ەكونوميكاسىنىڭ قالپىنا كەلۋىنە دەم بەرۋ ءۇشىن بولىپ تابىلادى.
لي چياڭ مىنالاردى اتاپ كورسەتتى: جۇڭگو مەن گەرمانيادا ءتۇبىرلى مۇددە قاقتىعىسى جوق، سەلبەستىك نەگىزى بەرىك، دامۋ قوزعاۋشى كۇشى مىعىم. ءبىز جۇڭگو مەن گەرمانيا سەلبەستىگىنىڭ بولاشاعىنا كامىل سەنەمىز. جۇڭگو ەسىك اشۋ سەلبەستىگىن باستان - اياق قولداپ كەلەدى، ەڭ ۇلكەن حاۋىپ - قاتەر سەلبەسپەۋ، ەڭ ۇلكەن حاۋىپسىزدىك كومەسكى قاتەرى دامىماۋ دەپ قارايدى. جۇڭگو گەرمانيامەن بىرگە بەيبىتشىلىكتە، دامۋدا، سەلبەستىكتە تاباندى بولىپ، دۇنيە ءجۇزىنىڭ ورنىقتىلىعى، گۇلدەنۋى ءۇشىن ورەلى رول اتقارۋدى، بىلىقپالىق قاباتتاسقان دۇنيە جۇزىنە اناعۇرلىم كوپ تۇراقتىلىق ازىرلەۋدى قالايدى. جۇڭگونىڭ دامۋى دۇنيە جۇزىنە قوسقان بەلسەندى ۇلەسى، ءار ەلدىڭ ماڭىزدى ورايى بولىپ تابىلادى.
شتاينمايەر لي چياڭعا ءتوراعا شي جينپيڭگە ىقىلاستى سالەمىن جەتكىزۋدى تاپسىرىپ، مىنالاردى ءبىلدىردى: گەرمانيا جۇڭگونىڭ سەنىمدى سەلبەستىك سەرىگى بولۋدى، ساۋدانىڭ ەركىندەنۋىن بىرگە قورعاۋدى، كليمات وزگەرىسى سياقتى سىن - سايىسقا توتەپ بەرۋدى قالايدى. گەرمانيا جاق قول ۇزۋگە، ءارقانداي فورماداعى قارسىلاسۋعا قارسى تۇرادى، جۇڭگومەن قارىم - قاتىناستى كۇشەيتىپ، دۇنيە ءجۇزىنىڭ بەيبىتشىلىگى مەن دامۋىن بىرگە جەبەۋ جولىندا قۇلشىنۋدى قالايدى.
ەكى جاق ۋكراينا داعدارىسى سياقتى ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە پىكىر اۋىستىردى.
ۋ جىڭلۇڭ قاتارلىلار كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
