ىستىق ءوتۋ ومىرگە حاۋىپ توندىرە مە؟ شيپاگەر مىناداي ادامداردىڭ كوڭىل ءبولۋىن ەسكەرتەدى
2023.06.19 16:03 كەلۋ قاينارى : حالىق تورابى
 |
سۋرەتتە: شىجياجۋاڭ قالاسىندا كۇن وتۋدەن ساقتاندىراتىن كيىم كيىپ، كۇن قاعارلى شاپكى كيگەن قالا تۇرعىنى شىجىعان ىستىقتا كوشەدە ءجۇر.
|
جۇڭگو اقپارات تورابىنىڭ 6 - ايدىڭ 18 - كۇنى بەرگەن حابارى (ۋەي شياڭحۇي) جۋىردا سولتۇستىكتىڭ كەڭ كولەمدى وڭىرلەرىندە قاتتى ىستىق بولدى، كوپ جەرلەردە تەمپەراتۋرا 40 گرادۋستان استى. وسىنىڭ سالدارىنان ىستىق وتكەن ناۋقاستاردىڭ سانى دا ارتتى، ءتىپتى وسىنىڭ سالدارىنان قازا بولعاندار دا بار. شيپاگەردىڭ ەسكەرتۋىنشە، ىستىق ءوتۋدىڭ بەلگىلەرى بايقالعاندا، جەڭىل دارەجەدە ىستىق وتكەندە، ءسوزسىز، دەر كەزىندە شارا قولدانۋ كەرەك، ويتپەگەندە، اۋرۋ بەلگىلەرى ۇزدىكسىز اسقىنادى، ىستىق ءوتۋ اۋرۋىنا شالدىقتىرۋى، ءتىپتى قازا بولۋعا اپارىپ سوعۋى ىقتيمال.
اۋىر دارەجەدە ىستىق ءوتۋ ادام ومىرىنە حاۋىپ توندىرەدى
اقپارات قۇرالدارىنىڭ حابارلاۋىنشا، 6 - ايدىڭ 16 - كۇنى كەشتە، اۋىر دارەجەدە ەسىنەن تانعان ناۋقاس بەيجيڭ داشۋەسى حالىق ەمحاناسىنىڭ شۇعىل ەمدەۋ بولىمىنە جەتكىزىلدى. ەمدەلۋ بارىسىندا ناۋقاس ەسىنەن تانعان كۇيدە بولدى، دەنە تەمپەراتۋراسى 42 گرادۋستان اسىپ، ىستىق ءوتۋ اۋرۋىنا شالدىققان دەپ دياگنوز قويىلدى. وسىدان سوڭ، ناۋقاستىڭ دەنە مۇشەلەرىنىڭ كوبىنىڭ فۋنكتسياسى السىرەپ، 7 ساعات بويى شۇعىل قۇتقارۋ ءونىم بەرمەي، 6 - ايدىڭ 17 - كۇنى تاڭ سارىدە ومىردەن وزدى.
”ىستىق ءوتۋ اۋرۋى دەگەنىمىز اۋىر دارەجەدە ىستىق ءوتۋدى كورسەتەدى، ەگەر دەر كەزىندە قۇتقارماسا، قازا بولۋ مولشەرى %70 تە %80 تىك جوعارى مولشەرگە جەتەدى، الايدا، ىستىق ءوتۋ اۋرۋى ادەتتە توساتتان تۋىلمايدى“، — دەپ تانىستىردى شيپاگەر، اتالعان ناۋقاس دالادا بالا ويناتىپ ۇيگە قايتقان سوڭ، باسى اينالۋ، دارمەنسىزدەنۋ سىندى ىستىق ءوتۋدىڭ اۋرۋ بەلگىلەرى بايقالعان، الايدا دەر كەزىندە ۇيلەسىمدى شارالاردى قولدانباستان، اۋا تەڭشەگىشى جوق، باتىس باعىتتاعى كۇن نۇرى كوپ تۇسەتىن بولمەدە جاتا بەرگەن، ”ايقايلاسا دا ويانباعان“ كەزدە بارىپ، وتباسىنداعىلار جاعدايدى بايقاپ، ەمحاناعا جەتكىزگەن، اقىرى وسىنىڭ سالدارىنان قازا بولعان.
بەيجيڭ قالاسى چاۋياڭ ەمحاناسى شۇعىل اۋرۋلار ءبولىمىنىڭ ورىنباسار مەڭگەرۋشى شيپاگەرى جاڭ چيڭنىڭ جۇڭگو اقپارات تورابىنا ايتۋىنشا، جۋىردا ىستىق ءوتۋ اۋرۋىنا شالدىققان بىرنەشە ناۋقاستى قابىلداعان. ونىڭ تانىستىرۋىنشا، ىستىق ءوتۋ اۋرۋى دەگەنىمىز ادەتتە ۇنەمى ايتىلاتىن اۋىر دارەجەدەگى ىستىق ءوتۋدى كورسەتەدى، ادام ۇزاق ۋاقىت بويى جوعارى تەمپەراتۋرالى، اسا دىمقىل اۋادا بولعان كەزدە ادام دەنەسىنىڭ تەمپەراتۋراسىنىڭ تەپە - تەڭدىگى بۇزىلىپ، بولىنگەن ىستىقتىڭ تاراتىلعان ىستىقتان كوپ بولىپ، ەسىنەن اداسۋ، قاتتى قىزۋ، تالىقسۋ قاتارلى اۋرۋ بەلگىلەرى تۋىلادى، اۋىر بولعان كەزدە باۋىردىڭ، بۇيرەكتىڭ جانە تىنىس الۋ فۋنكتسيالارىنىڭ قالىپسىز بولۋىنا، ءتىپتى السىرەۋىنە، قان ۇيىتۋعا اپارىپ سوعادى.
ادەتتە قارتتاردا، سابيلەردە جانە سىرتتا جوعارى تەمپەراتۋرادا جۇمىس ىستەيتىندەردە كوپ بايقالادى
جاڭ چيڭنىڭ ايتۋىنشا، ىستىق ءوتۋ اۋرۋى ادەتتە مىناداي بىرنەشە توپتاعى ادامداردا ءجيى كەزدەسەدى: قارتتار جانە سابيلەر، مۇنىڭ سەبەبى دەنە تەمپەراتۋاسىن رەتتەۋدىڭ تەپە - تەڭدىك كۇيىنەن ايرىلۋىنا نەمەسە دەنە تەمپەراتۋراسىن رەتتەۋ ورتالىق نەرۆىنىڭ تولىق جەتىلمەۋىنە بايلانىستى ىستىق ءوتۋ وڭاي تۋىلادى؛ مۇنان سىرت، جوعارى تەمپەراتۋرالى، وتە ىلعال اۋا رايىندا دالادا جۇمىس ىستەيتىندەر، مىسالى، قاتىناس ساقشىلارى، قورشاعان ورتا تازالىقشىلارى قاتارلىلار، سونداي - اق، ەرەكشە قىزمەتپەن شۇعىلداناتىندار، مىسالى، جوعارى تەمپەراتۋرالى اۋا رايىندا جاتتىعۋ جاسايتىن ءورت ءوشىرۋشى قىزمەتكەرلەر جانە سپورتشىلار.
جاڭ چيڭنىڭ قاراۋىنشا، قازىر شۇعىل اۋرۋلار بولىمىندەگى ىستىق ءوتۋ اۋرۋىنا شالدىققان ناۋقاستاردىڭ سانى كوپ ەمەس، ناۋقاستاردىڭ كوبى ىستىق ءوتۋدىڭ العاشقى بەلگىلەرى بايقالعان كەزەڭدە تۇر. ”ىستىق ءوتۋ — ىستىق ءوتۋدىڭ بەلگىلەرى بايقالۋ، جەڭىل دارەجەدە ىستىق ءوتۋ، ورتا دارەجەدە ىستىق ءوتۋ جانە اۋىر دارەجەدە ىستىق ءوتۋ سىندى 4 كەزەڭگە بولىنەدى. ىستىق ءوتۋدىڭ اۋرۋ بەلگىلەرى بايقالعان كەز بەن ىستىق ءوتۋ اۋرۋى اراسىندا ءبىر مەزگىل بارىس بولادى. ەگەر دەر كەزىندە شارا قولدانسا، ىستىق وتكەندەردىڭ كوبىندە ىستىق ءوتۋ اۋرۋىنا شالدىقتىراتىن بەلگى بايقالمايدى.
قانداي جاعدايدا ەمحاناعا جەتكىزۋ كەرەك؟
جاڭ چيڭنىڭ ەسكەرتۋىنشە، ەگەر كوكىرەگى سىعىلۋ، تىنىسى تارىلۋ، دارمەنسىزدەنۋ، باسى اينالۋ قاتارلى اۋرۋ بەلگىلەرى بايقالسا، ىستىق ءوتۋدىڭ العاشقى بەلگىلەرى بايقالعان سانالادى. الدىمەن جوعارى تەمپەراتۋرالى، اسا ىلعال ورىننان دەرەۋ جوتكەلىپ، اۋا الماساتىن جانە سالقىن ورىنعا بارىپ دەمالۋ قاجەت. سونىمەن بىرگە، كيىمدى بارىنشا ازايتىپ، سۋىق سۋسىندىقتاردى ءىشىپ، اۋا الماستىرۋدى ارتتىرۋ كەرەك، مىسالى، جەلدەتكىش قولدانۋ نەمەسە اۋا تەڭشەگىشتى ورىنعا بارۋ قاتارلىلار.
الايدا، ناۋقاستاردىڭ دەنە تەمپەراتۋراسى جوعارىلاپ، وعان قوسا اقىل - ەسىندە وزگەرىس بايقالسا، نەمەسە، سۋسىزدانۋ بەلگىلەرى بايقالسا، مىسالى، ءتۇيسىنۋى السىرەۋ، قۇسۋ جانە ءىشى ءوتۋ قاتارلى جاعدايلار تۋىلسا، دەر كەزىندە ەمحاناعا بارىپ ەمدەلگەنى ءجون، شيپاگەر اۋرۋ بەلگىلەرىنە ساي تەمپەراتۋراسىن تومەندەتۋ، سۇيىقتىق تولىقتاۋ قاتارلى ەمدەۋ تاسىلدەرىن قولدانىپ، ناۋقاستىڭ قىسقا ۋاقىت ىشىندە دەنساۋلىعى قالپىنا كەلۋىنە كەپىلدىك ەتۋىنە بولادى.
كەلۋ قاينارى: حالىق تورابى
 |
سۋرەتتە: بەيجيڭ قالاسى چاۋياڭ ەمحاناسى شۇعىل اۋرۋلار ءبولىمىنىڭ ناۋقاستاردىڭ ەمدەلۋدى كۇتۋ رايونى. ۋەي شياڭحۇي فوتوسى
|
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
