شينجياڭ جەر - جەرى ساياحاتتىڭ قاۋىرت مەزگىلىندەگى بازار ءتارتىبىن ءتۇرلى شارالارمەن قورعادى
2023.07.11 16:48 كەلۋ قاينارى : شينجياڭ گازەتى
انار بۇلت \ شينجياڭ گازەتىنىڭ ءتىلشىسى ياۋ گاڭ 7 - ايدىڭ 9 - كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋىمىزشا، 3 - جاق ساناق ساندى مالىمەتىندە مىنالار كورسەتىلگەن: 7 - ايدىڭ 1 - كۇنىنەن 6 - كۇنىنە دەيىن تۇتاس رايونداعى A دارەجەلى كورىنىس ءوڭىرى 6 ميلليون 314 مىڭ 800 ساياحاتشى (رەت) قابىلداپ، 6 - ايدىڭ 19 - كۇنىنەن 24 - كۇنىنە دەيىنگىمەن (دۋان - ۋ مەرەكەسىن قامتيدى) سالىستىرعاندا ％21. 5 ارتقان. ساياحاتتىڭ قاۋىرت مەزگىلىندەگى بازار ءتارتىبىن شىنايى قورعاۋ ءۇشىن، بۇكىل شينجياڭداعى ءارقايسى ايماق، وبلىس، قالا كورىنىس وڭىرلەرى، كورىنىس تۇيىندەرى، ساياحاتقا قاتىستى كاسىپورىندار كوپ ءتۇرلى شارانى قاتار قولدانىپ، باعا ارەكەتى مەن تيجارات قيمىلىن جۇيەگە تۇسىرگەن.
7 - ايدىڭ 4 - كۇنىنەن 8 - ايدىڭ 31 - كۇنىنە دەيىن تەكەس اۋدانى بۇكىل اۋدان كولەمىندەگى قوناق ءۇي، مەيمانحانالاردىڭ ادەتتەگى ءبىر كىسىلىك جاتاعىنا، ولشەمدى 2 كىسىلىك جاتاعىنا باعا جاقتان باقىلاۋ جۇرگىزەدى. ”بۇكىل اۋدان كولەمىندەگى 62 مەيمانحانا 5 دارەجەگە بولىنەدى، باعاسى 268 − 968 يۋان ارالىعىندا بولادى“. وسى اۋداننىڭ مادەنيەت، دەنە تاربيە، راديو، تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى ليۋ كى بىلاي دەپ تانىستىردى: بۇل رەتكى باعاعا شەك قويۋ وسىدان ىلگەرى شىعارعان «تەكەس اۋدانىنىڭ قوناق ءۇي، مەيمانحانا قوناق بولمەسىنىڭ باعاسىنا باقىلاۋ جۇرگىزۋ جانە باعا ءوسىرۋ دەڭگەيىن مەڭگەرۋ شارالارى جونىندەگى حابارلاندىرۋ» نەگىزىندە جاتىن ورىننىڭ بازار باعاسىن ونان ارى ولشەمگە ءتۇسىرىپ، ساياحاتشىلاردىڭ ۇقىق - مۇددەسىن قامتاماسىز ەتەدى.
7 - ايدىڭ 5 - كۇنى توعىزتاراۋ اۋدانىنىڭ مەيمانحانا سالاسى قوعامى «توعىزتاراۋ اۋدانىنىڭ قوناق ءۇي، مەيمانحانالاردى دارەجەگە ءبولىپ، باعا تۇراقتاندىرۋ جونىندەگى حابارلاندىرۋىن» تاراتتى. حابارلاندىرۋدا مىنالار ايقىن بەلگىلەندى: توعىزتاراۋ اۋدانىنداعى قوناق ءۇي، مەيمانحانالار 3 دارەجەگە بولىنەدى، ءبىرىنشى دارەجەلى مەيمانحانانىڭ باعاسى 600 يۋاننان، 2 - دارەجەلى مەيمانحانانىڭ باعاسى 400 يۋاننان، 3 - دارەجەلى مەيمانحانانىڭ باعاسى 300 يۋاننان اسپاۋى كەرەك. توعىزتاراۋ اۋداندىق بازار باقىلاۋ - باسقارۋ مەكەمەسى باعانى دۇرمەكپەن قىمباتتاتۋ، استاسىپ باعانى ءوسىرۋ، باعا الدامشىلىعى سياقتى باعاداعى زاڭعا قايشى جايتتەردى تەكسەرىپ ءبىر جاقتى ەتۋ ارقىلى باتىل سوققى بەرەدى، جوعارىدا ايتىلعان زاڭعا قايشى جايتتەردى تەكسەرىپ ءبىر جاقتى ەتكەندە راس ەكەنى انىقتالسا، «جۇڭحۋا حالىق رەسپۋبليكاسىنىڭ باعا زاڭى» بويىنشا دەلو تۇرعىزىلىپ تەكسەرىلىپ ءبىر جاقتى ەتىلەدى.
7 - ايدىڭ 5 - كۇنى كورلا قالالىق بازار باقىلاۋ - باسقارۋ مەكەمەسى حابارلاندىرۋ شىعارىپ، تيجاراتشىلار اشىق باعا بەلگىلەمەسىنە قايشىلىق جاساسا، 5000 يۋاننان تومەن ايىپ سالىنادى دەپ بەلگىلەدى. تيجاراتشىنىڭ زاڭعا قايشىلىق جاساعان كىناسى ءبىرشاما اۋىرلاۋ بولىپ، باعا الدامشىلىعىن قالىپتاستىرسا، ەڭ جوعارى بولعاندا 500 مىڭ يۋان ايىپ سالىنادى؛ باعانى دۇرمەكپەن قىمباتتاتۋ جايتىن قالىپتاستىرسا، ەڭ جوعارى بولعاندا 3 ميلليون يۋان ايىپ سالىنادى؛ ءوزارا استاسۋ، جاتاق باعاسىن شەڭگەلدەۋ ارەكەتىن قالىپتاستىرسا، ەڭ جوعارى بولعاندا 5 ميلليون يۋان ايىپ سالىنادى.
ءۇرىمجى قالالىق بازار باقىلاۋ - باسقارۋ مەكەمەسى «اس - سۋ كاسىبىندەگى باعا ساياساتى بويىنشا ەسكەرتۋ، ساقتاندىرۋ حاتىن» جاريالاپ، اس - سۋ تيجاراتشىلارىنىڭ باعانى اشىق ۇستاۋ ءتۇزىمىن مۇقيات تياناقتاندىرۋىن، باعا كەستەسىنىڭ تولىق بولۋىن، باعا مازمۇنىنىڭ شىن، انىق بولۋىن، جازۋىنىڭ انىق بولۋىن، زات بەلگىسىنىڭ دۇرىس بولۋىن، كورسەتپە بەلگىلەردىڭ كورنەكتى بولۋىن شىنايى ورىنداپ، بەلگىلەنگەن باعا ۇستىنە باعا قوسىپ تاۋار ساتۋعا بولمايتىندىعىن، انىق كورسەتىلمەگەن ءارقانداي اقى الۋعا بولمايتىندىعىن تالاپ ەتتى.
قاشقار قالاسى، تاشقورعان تاجىك اۆتونوميالى اۋدانى، ونسۋ اۋدانى، كەلپىن اۋدانى سياقتى اۋدان، قالالار اۋدان كولەمىندەگى ءارقايسى قوناق ءۇي، مەيمانحانا، ساياحات حالىقتىق تۇسەلحانالارى (مالشىلار شاتتىعى ساياجايى) جاتىن ورىن تيجاراتشىلارىنا ەسكەرتۋ، ساقتاندىرۋ حاتىن جاريالاپ، قوناق ۇيلەردەن، مەيمانحانالاردان، ساياحات حالىقتىق تۇسەلحانالارىنان (مالشىلار شاتتىعى ساياجايى) ەسكەرتۋ، ساقتاندىرۋ تالابىنا تۋرالانىپ، ءوزىن - ءوزى تەكسەرۋدى، رەتتەۋ - تۇزەتۋدى بەلسەنە ورىستەتىپ، وزىندىك باعا ارەكەتىن ىشكەرىلەي جۇيەگە ءتۇسىرۋدى تالاپ ەتتى.
7 - ايدىڭ 8 - كۇنى سايرام كولى كورىنىس ءوڭىرى الدەقاشان قول قويىسقان توقتام جانە حابارلاندىرۋداعى بازار باعاسىنا قاتاڭ بويسۇنىپ، وسى نەگىزدە باعانى استە وسىرمەۋگە ۋادە بەردى. كورىنىس ءوڭىرى تاعى ەسىك بەلەتىنىڭ، حالىقتىق سالت - سانا ويىن نومىرلەرىنىڭ، كوڭىل اشۋدان ءلاززاتتانۋدىڭ، ەرەكشە ءدامدى تاعامداردىڭ باعاسىن تۇگەلدەي وسىرمەۋگە ۋادە بەردى.
7 - ايدىڭ 6 - كۇنى شينجياڭ مادەنيەت - ساياحاتتى دامىتۋ جارنا شەكتى سەرىكتەستىگى سەرىكتەستىكتىڭ بويلۇق، كارىز، نارات، قاناس، قۇمتاع سياقتى ساياحات كورىنىس وڭىرلەرىندەگى تيجاراتقا قاتىناسقان نىساندارىندا الدەقاشان قول قويىسقان سەلبەستىك توقتامىنداعى جانە حابارلاندىرۋداعى بازار باعاسىن اتقاراتىندىعىنا ۋادە بەردى. سەرىكتەستىك تاعى ەسىك بەلەتى، ويىن نومىرلەرى، ساياحات ويىندارىنان ءلاززاتتانۋ، ءدامدى تاعامدار باعاسىنىڭ تۇگەلدەي وسىرىلمەيتىندىگىنە ۋادە بەردى.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
