6 - كەزەكتى جۇڭگو شينجياڭ حالىقارالىق ۇلتتىق ءبي فەستيۆالى اقپار جاريالاۋ ءماجىلىسى بەيجيڭدە وتكىزىلدى
2023.07.13 16:37 كەلۋ قاينارى : شينجياڭ گازەتى
انار بۇلت \ شينجياڭ گازەتىنىڭ ءتىلشىسى ليۋ مىڭمىڭ 7 - ايدىڭ 11 - كۇنى بەيجيڭنەن حابارلايدى. 7 - ايدىڭ 11 - كۇنى 6 - كەزەكتى جۇڭگو شينجياڭ حالىقارالىق ۇلتتىق ءبي فەستيۆالى اقپار جاريالاۋ ءماجىلىسى بەيجيڭدە وتكىزىلدى. وسى كەزەكتى ءبي فەستيۆالى 7 - ايدىڭ 20 - كۇنىنەن 8 - ايدىڭ 5 - كۇنىنە دەيىن ءۇرىمجى قالاسىندا وتكىزىلەدى، سونداي - اق تۇرپان قالاسىندا، سانجى قالاسىندا بولىمشە الاڭ ورنالاستىرىلىپ، 17 كۇنگە جالعاسادى، رەسەي، قازاقستان، كورەيا، وڭتۇستىك افريكا قاتارلى ەلدەردىڭ جانە ەل ىشىندەگى ءبىر ءبولىم ولكە، قالالار مەن شينجياڭنىڭ جەرگىلىكتى كوركەمونەر ۇيىرمەلەرى 60 مايدان تارتىمدى ءبي نومىرلەرىن ۇسىنادى.
وسى كەزەكتى ءبي فەستيۆالىنىڭ نەگىزگى تاقىرىبى ايقىن، جارقىن تۇيىندەرى ايشىقتى. اۆتونوميالى رايوندىق مادەنيەت جانە ساياحات مەڭگەرمەسى پارتيا باسشىلىق گرۋپپاسىنىڭ شۋجيى شۇي رۇيجۇن تانىستىرىپ بىلاي دەدى: بىرىنشىدەن، نازاردى جىبەك جولى نەگىزگى تاقىرىبىنا شوعىرلاندىرىپ، اۋىس - كۇيىستى، سەلبەستىكتى تەرەڭدەتەمىز. وسى كەزەكتى ءبي فەستيۆالىندا ”بيمەن تەربەلگەن ارمان، بەرەكەلى جىبەك جولىن“ نەگىزگى تاقىرىپ ەتىپ، ازيا، ەۆروپا، افريكاداعى مىڭنان استام كوركەمونەرشىنى شينجياڭدا باس قوسۋعا ۇسىنىس ەتىپ، كوركەمونەر ارقىلى جىبەك جولىنىڭ كوركەم كورىنىسىن بەينەلەپ، وركەنيەتتەردىڭ ءوزارا ۇلگى الۋىن، حالىق تىلەگىن توعىستىرۋدى جەبەيمىز. ەكىنشىدەن، جۇڭگو ەرەكشەلىگىن كورنەكتىلەندىرىپ، جۇڭحۋا مادەنيەتىن ايگىلەيمىز. «جاسىل القاپ − ءبي سىزباسى (مىڭ شاقىرىمدىق جەر - سۋ سۋرەتى)»، «ادەمى ايدىن»، «قىزىل ايەل جاۋىنگەرلەر» سياقتى ەل ىشىندەگى كوپتەگەن جوعارى ساپالى، ۋاكىلدىك سيپات الاتىن تاڭداۋلى كونسەرت ءنومىرىن ۇسىنىس ەتىپ، ءبي كوركەمدىگى ارقىلى جۇڭحۋا مادەنيەتىنىڭ تارتىمدىلىعىن، جۇڭگو سالاۋاتى مەن جۇڭگو رۋحىن ايگىلەيمىز. ۇشىنشىدەن، مادەنيەت ارقىلى حالىققا تيىمدىلىك جاساۋعا تاباندى بولىپ، دامۋ جەتىستىكتەرىنەن بىرگە يگىلىكتەنەمىز. سايكەستى تۇردە ”شۇعىلا شاشقان جىبەك جولى. جاراسىمدىلىقپەن قاتار ءومىر ءسۇرۋ“ زاماندىق كيىم - كەشەك شوۋى، شينجياڭ ”جىبەك جولى“ كوشە ءبيى قويىلىمى، شينجياڭ ءبي جاسامپازدىعى، اۋىس - كۇيىس ءماجىلىسى، ”شينجياڭ ءبيىن بىرگە بيلەۋ“ اتىنداعى الاڭ ءبيى قويىلىمى سياقتى جەلىلەس قيمىلدار وتكىزىپ، جالپى حالىقتىڭ ات سالىسۋىنا، جالپى حالىقتىڭ بىرگە يگىلىكتەنۋىنە مۇمكىندىك جاراتامىز؛ ارزان بەلەت، الەۋمەتتىك يگىلىك ارناۋلى قويىلىمى، مەديادا بەلەت تالاسىپ ساتىپ الۋ سياقتى حالىققا ءتيىمدى، پايدالى شارالاردى العا قويىپ، ءار ۇلت بۇقاراسىنىڭ مادەنيەت جاعىنداعى تابىس سەزىمىن، باقىت سەزىمىن كۇشەيتەمىز.
مادەنيەت جانە ساياحات مينيسترلىگى حالىقارالىق اۋىس - كۇيىس جانە سەلبەستىك مەكەمەسىنىڭ ورىنباسار باستىعى شى زى - ي اقپار جاريالاۋ ماجىلىسىندە بىلاي دەدى: جۇڭگو شينجياڭ حالىقارالىق ۇلتتىق ءبي فەستيۆالى 5 كەزەك تابىستى وتكىزىلىپ، حالىقارالىق ءبي كوركەمونەرى شوعىرلانعان ساحناعا اينالىپ قانا قويماي، شينجياڭنىڭ ادەبيەت - كوركەمونەر جاسامپازدىعىن جەبەيتىن، شينجياڭنىڭ مادەنيەتىنىڭ، كوركەمونەرىنىڭ حالىقاراداعى ىقپال كۇشىن جوعارىلاتاتىن ماڭىزدى تۇعىرعا اينالدى، شينجياڭنىڭ مادەنيەت قۇرىلىسىن جانە گۇلدەنىپ - كوركەيۋىن جەبەۋدە، جۇڭگو مادەنيەتىنىڭ دۇنيە جۇزىنە اناعۇرلىم ويداعىداي بەت الۋىن ىلگەرىلەتۋدە، جۇڭگو مەن شەتەل وركەنيەتتەرىنىڭ اۋىس - كۇيىس جاساۋىن، ءوزارا ۇلگى الۋىن كۇشەيتۋدە ماڭىزدى ءمان الادى.
جۇڭگو شىعىس كوركەمونەر توبى شىعارعان ءبي - ولەڭ تەاترى «جاسىل القاپ − ءبي سىزباسى (مىڭ شاقىرىمدىق جەر - سۋ سۋرەتى)» 7 - ايدىڭ 20 - كۇنىنەن 21 - كۇنىنە دەيىن وسى كەزەكتى ءبي فەستيۆالىندا بوي كورسەتەدى. ”بۇل قويىلىم جۇڭحۋا ۇلتىنىڭ مىڭ شاقىرىمدىق تاۋ، وزەندەرىنىڭ ايبىندى كەلبەتىن جانە تەرەڭ مادەنيەت قوردالانۋىن ايگىلەيدى، 3 دۇركىن ارالاپ كونسەرت قويۋدا 41 قالانى ارالاپ، 332 مايدان كونسەرت قويدىق، وسى كەزەكتى ءبي فەستيۆالى ارقىلى كوركەمونەر سارا تۋىندىلارىمەن دوستىق بايلانىستىڭ كوپىرىن سالىپ، جىبەك جولى مادەنيەت اۋىس - كۇيىسىن جەبەپ، ’مادەنيەت ەلشىسى‘ سالاۋاتىممەن ءبي فەستيۆالىندا دوستىق گۇلىنىڭ اشىلۋىنا ۇلەس قوسۋدى ءۇمىت ەتەمىن“، - دەدى جۇڭگو شىعىس كوركەمونەر توبى پارتكومىنىڭ شۋجيى، القا باستىعى جيڭ شياۋيۇڭ.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
