قاشقار بايىرعى قالاسى ”تابيعي فوتو سالونى“
□ انار بۇلت \ شينجياڭ گازەتىنىڭ ءتىلشىسى ءپاريزات ابدۇل
2023.07.12 16:00 كەلۋ قاينارى : شينجياڭ گازەتى
اجارلاندىرۋ، قاريدارلارعا كيىم - كەشەك تاڭداۋ، ءپىشىن اسەمدەۋ... 7 - ايدىڭ 6 - كۇنى ساعات 10دا قاشقار بايىرعى قالاسى ارايار جولىنداعى سانماۋ ساياحاتتىق سۋرەتكە ءتۇسىرۋ دۇكەنى دۋمانعا بولەندى. ”بۇگىن الدىن الا كەلىسكەن 10 قاريدار بار“. دۇكەن قوجايىنى ما جيتيڭ دۇكەنگە كىرگەن قاريدارلارمەن سويلەسە ءجۇرىپ تانىستىردى.
رەڭى كوز تارتاتىن كيىم - كەشەكتەر، ادەمى باس اشەكەيلەرى تۇتاس دۇكەندى ۇلتتىق تۇسكە بولەپ تۇر. دۇكەن كوبىنەسە ۇيعۇر ۇلتىنىڭ كيىم - كەشەگىن نەگىز ەتكەن، قازاق، تاجىك سياقتى ۇلتتاردىڭ كيىم - كەشەكتەرى دە بار. قۇربان ايت مەرەكەسىندەگى ساياحاتشىلاردىڭ شاعىن ورلەۋى ءوتىپ كەتكەنىمەن، ءار كۇنى كوپتەگەن ساياحاتشى دۇكەنگە كەلىپ سۋرەتكە تۇسەدى.
”دۇكەندە 150 ءتۇرلى ەرەكشە كيىم بار، ۇلگىسى كوپ، تۇرلىشە جاستاعى ساياحاتشىلاردىڭ قاجەتىن قاناعاتتاندىرا الادى“، - دەدى ما جيتيڭ تىلشىگە. تارانۋ تۇعىرىنىڭ سورەسىنە ءتۇرلى ادەمى سىرعا، القا، شاش ساندىك بۇيىمدار ساياحاتشىلاردىڭ تاڭداۋىنا ارنايى قويىلعان.
ما جيتيڭ يىنچۋاندىق، ونىڭ بايىرعى قالامەن ەتەنە بولعان حيكاياسىن 2017 - جىلدان باستاۋعا تۋرا كەلەدى.
ۇيلەنۋ تويى فوتوسۋرەت قىزمەتىمەن شۇعىلداناتىن ما جيتيڭ سول جىلى قاشقارعا قىزمەتكە جىبەرىلەدى. ول ءار كۇنى سەرىكتەستىك پەن جاتاقحاناعا بارىپ - قايتقان سايىن، قاشقار بايىرعى قالاسىنىڭ الدىندا بىرنەشە ساياحات اۆتوبۋزىنىڭ توقتاپ تۇرعانىن كورەتىن. ”قاشقار بايىرعى قالاسىنا تۇڭعىش بارعانىمدا، وسىناۋ ’تابيعي فوتو سالونىنا‘ قىزىعىپ قالدىم“. ما جيتيڭ سول كەزدە توي فوتوسۋرەتىنە ءتۇسىرۋ دۇكەنىن بايىرعى قالاعا اكەلۋ ويىنا كەلگەندىگىن ايتتى.
”العاشىندا ءبىز قاشقار بايىرعى قالاسىن توي فوتوسۋرەتىنە تۇسىرۋدەگى سىرتقى كورىنىس ورنىنا پايدالانعانبىز، كەيىن كەلە بايىرعى قالاعا كەلەتىن ساياحاتشىلاردىڭ بارعان سايىن كوبەيگەندىگىن بايقادىم، ءبىز ۇنەمى بارىپ كورىنىس الاتىن ادەتتەگى كوشەلەردە سۋرەتكە تۇسىرگەندە دە كەزەككە تۇرۋ قاجەت بولادى. بايىرعى قالادا دۇكەن اشىپ، ساياحاتشىلاردىڭ ەرەكشە كيىم - كەشەكتەردى كيىپ بايىرعى قالانى ارالاپ، ەڭ تاماشا ساتتەردەن ەستەلىك قالدىرۋىنا مۇمكىندىك جاسايتىن شاق جەتتى دەپ ءبىلدىم“. ما جيتيڭ بىلاي دەدى: 2020 - جىلدىڭ سوڭىندا سانماۋ ساياحاتتىق سۋرەتكە ءتۇسىرۋ سالونى رەسمي تيجارات باستادى.
قازىر ەسىك بەلەتىن المايتىن 5A دارەجەلى كورىنىس ءوڭىرى − قاشقار بايىرعى قالاسىندا ەرەكشە كيىم - كەشەك كيىپ سۋرەتكە ءتۇسۋ كوپتەگەن ساياحاتشىلاردىڭ قاشقارعا كەلگەننەن كەيىن، ءسوزسىز، تاڭدايتىن تۇرىنە اينالدى. قاشقار بايىرعى قالاسىنداعى ساياحاتتىق سۋرەتكە الۋ دۇكەندەرى دە 3 جىلدىڭ الدىنداعى 2 دۇكەننەن دامىپ، قازىر 200 نەشە دۇكەنگە جەتتى، ءار كۇنى ساياحاتتىق سۋرەتكە تۇسەتىن ساياحاتشى 1000 ادام - رەتتەن استى.
قايتكەندە ءوز ەرەكشەلىگىن ايگىلەپ، ءاربىر قاريدارعا ويداعىداي قىزمەت وتەۋگە بولادى؟
ما جيتيڭ ءوز ۇجىمىنداعىلاردى باستاپ، بايىرعى قالاداعى وتباسىلارىن ارالاۋ، كونە سۋرەتتەردى اقتارۋ، ماتەريال كورۋ سياقتى جولدارمەن كيىم - كەشەكتەردى سايكەستىرۋ جانە سۋرەتكە الۋ ۇلگىسىن قاراستىردى، ونان سوڭ بايىرعى قالاداعى تىگىنشىلىك دۇكەنىمەن سەلبەسىپ، ەرەكشە كيىم - كەشەكتەردى جوبالاتىپ تىكتىردى، قىش بۇيىمدار، ۇلتتىق مۋزيكا اسپاپتارى سياقتى سۋرەتكە الۋ جابدىقتارى دا بايىرعى قالادان اكەلىنگەن. ”دۇكەن اشىلعان العاشقى ەكى ايدا بىزدە ەكى پار كيىم - كەشەك، ءبىر تاقيا عانا بار ەدى، قازىر قولدانىلىپ وتىرعان مىنا باس اشەكەيلەردىڭ ءبارىن گريمشىنىڭ ءوزى جوبالاپ جاساعان“، - دەدى ما جيتيڭ ماقتانىشپەن.
ما جيتيڭنىڭ ساياحاتتىق سۋرەتكە ءتۇسىرۋ دۇكەنىنىڭ ەكىنشىسى − شييۇي ساياحاتتىق سۋرەتكە ءتۇسىرۋ دۇكەنى دە اشىلدى. قىزمەت وتەۋ پوزيتسياسى جاقسى، ونىمدەرى ساپالى بولعان سوڭ، دۇكەنگە كەلىپ سۋرەتكە تۇسكەن ساياحاتشىلار دا بارعان سايىن كوبەيدى. ”ءبىز ءار كۇنى ساعات 9دان اسقاندا دۇكەندى ۋاعىمەن اشامىز، ەكى دۇكەنگە بيىل 7 گرۋپپا گريمشى، فوتوشى دايىندادىق، ساۋدا جاقسى كەزدە ءتۇن ورتاسىنا دەيىن قاربالاستىققا تۇسەمىز“، - دەدى ما جيتيڭ.
ساياحاتتىق سۋرەتكە ءتۇسىرۋ كاسىبىن ارناعا ءتۇسىرۋ ءۇشىن، قاشقار بايىرعى قالا كورىنىس ءوڭىرىن باسقارۋ كوميتەتى ساۋداگەرلەردى ۇيىمداستىرىپ، كوركەم فوتوسۋرەت قوعامىن قۇردى. ”قوعام قۇرىلعاننان كەيىن قىزمەت وتەۋ ولشەمىن شىعارىپ، ساۋداگەرلەردى ’باعا ارقىلى باسەكەلەسۋدەن‘’قىزمەت وتەۋ ارقىلى باسەكەلەسۋگە‘ قاراي بۇرىلىس جاساۋعا جەتەكتەپ، ساياحاتتىق سۋرەتكە ءتۇسىرۋ كاسىبىنىڭ اقاۋسىز دامۋىن قامتاماسىز ەتتى“، - دەدى ما جيتيڭ.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
