جۇڭگو جاق ۋكراينادا بەيبىتشىلىكتى قالپىنا كەلتىرۋدىڭ ءتۇبىرلى جولى كەڭەسۋ مەن كەلىسسوز وتكىزۋ ەكەنىن باسا دارىپتەدى
2023.09.13 15:59 كەلۋ قاينارى : حالىق تورابى
شينحۋا اگەنتتىگىنىڭ 9 - ايدىڭ 12 - كۇنى بىرلەسكەن مەملەكەتتەر ۇيىمىنان بەرگەن حابارى. جۇڭگونىڭ بىرلەسكەن مەملەكەتتەر ۇيىمىنداعى تۇراقتى ورىنباسار ۋاكىلى گىڭ شۋاڭ 9 - ايدىڭ 12 - كۇنى حاۋىپسىزدىك القالار كەڭەسى ۋكراينانى قارۋ - جاراقپەن قامداۋ ماسەلەسىن تالقىلاعان كەزدە ۋكراينادا بەيبىتشىلىكتى قالپىنا كەلتىرۋدىڭ ءتۇبىرلى جولى كەڭەسۋ مەن كەلىسسوز وتكىزۋ ەكەنىن اتاپ كورسەتتى.
گىڭ شۋاڭ بىلاي دەدى: ۋكراينا داعدارىسى قازىرگە دەيىن سوزىلدى، حالىقارالىق قوعام سوعىستى ەرتەرەك توقتاتۋدى جاپپاي ءۇمىت ەتىپ وتىر، ماسەلەنى بەيبىت جولمەن شەشىم ەتۋدى دارىپتەگەن مەملەكەتتەردىڭ سانى بارعان سايىن كوبەيۋدە، الايدا، ءالى دە سوعىس مايدانىنا كوپ مولشەردەگى قارۋ - جاراق جەتكىزىلۋدە، ونىڭ ۇستىنە، ءتۇرى مەن سانى بارعان سايىن كوبەيىپ، جويىمپازدىعى بارعان سايىن كۇشەيۋدە، وسىنىڭ سالدارىنان جەر بەتىندەگى شايقاس ۇلعايۋدا، ۋشىعۋدا، جاي بۇقارانىڭ جارالانۋى، قازا بولۋى كۇن سايىن ارتۋدا، جاعداي قاتەرلى اينالىم كۇيىنە ءوتتى. وسىنىڭ الدىندا حاۋىپسىزدىك القالار كەڭەسىنىڭ تالقىسىندا جۇڭگو جاق ۋايىمدايتىنىن جانە الاڭدايتىنىن تالاي رەت بىلدىرگەن بولاتىن.
گىڭ شۋاڭ مىنانى ءبىلدىردى: اسكەري تەكە - تىرەس ۋكراينانى داعدارىستان قۇتىلدىراتىن جول ەمەس، كەڭەسۋ مەن كەلىسسوز عانا بەيبىتشىلىكتى قالپىنا كەلتىرۋدىڭ ءتۇبىرلى جولى. جۇڭگو جاق قاتىستى جاقتاردىڭ حالىقارالىق قوعامنىڭ ءۇمىتى مەن ۇندەۋىنە بەلسەندى جاۋاپ قاتۋىن، ۇستامدى، سابىرلى بولۋىن، بەرەكەگە كەلۋىن، ورتاق تانىمعا كەلۋگە قۇلشىنۋىن، جاعدايدى ۋشىقتىرۋدان ساقتانۋىن ءۇمىت ەتەدى. حاۋىپسىزدىك القالار كەڭەسىنىڭ الاۋىزدىقتى ۇلعايتۋدان ساقتانۋىن، دۇرىس باعىتتاعى ءوزارا ىقپالداستىقتى اناعۇرلىم جەبەپ، حالىقارالىق كوللەكتيۆتىك حاۋىپسىزدىك مەحانيزمىنىڭ وزەكتى رولىن شىنايى ساۋلەلەندىرۋىن، «بىرلەسكەن مەملەكەتتەر ۇيىمىنىڭ ۋستاۆى» مىندەتتەگەن داۋ - شاردى بەيبىت جولمەن شەشۋ قۇرالىن ويداعىداي پايدالانىپ، بەيبىتشىلىك جونىندەگى ءتۇرلى ۇندەۋلەردىڭ تياناقتاندىرىلۋىن ىلگەرىلەتۋىن، جاعدايدىڭ بىرتىندەپ بەيبىت، ورنىقتى باعىتقا قاراي دامۋىن ىلگەرىلەتۋىن ءۇمىت ەتەدى.
گىڭ شۋاڭ: جۇڭگو جاق ءارقايسى جاقتارمەن بىرگە كەڭەس وتكىزۋدى ۇزدىكسىز كۇشەيتىپ، ۋكراينا داعدارىسىن ساياسي جولمەن شەشىم ەتۋدى ىلگەرىلەتۋ جاعىندا ناتيجەلى قىزمەت ىستەۋ رولىن ساۋلەلەندىرۋدى قالايدى، — دەدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
