باس شۋجي شي جينپيڭنىڭ مۇگەدەكتەرگە قامقورلىق جاساۋ حيكاياسى
شينحۋا اگەنتتىگىنىڭ تىلشىلەرى
2023.09.18 16:31 كەلۋ قاينارى : حالىق تورابى
باس شۋجي شي جينپيڭنىڭ كوڭىلىندە مۇگەدەكتەر ءىسى كوكتەمنىڭ لەبىندەي ءىس سانالادى.
تەرەڭ سۇيىسپەنشىلىككە تولى سوزدەر، تالاي رەتكى ىقىلاستى شابىتتاندىرۋلار كوكتەم سامالىنداي شۋاقتى جەتكىزدى؛ جۇرەكتەردى جىلىتۋ ارەكەتتەرى، كومەكتەسۋ - سۇيەمەلدەۋ شارالارى كوكتەم جاڭبىرىنداي قالىڭ مۇگەدەكتەردىڭ جۇرەگىن مەيىرگە بولەپ، ءۇمىت ۇشقىنىن مازداتتى.
كوكتەم سامالى ەسىپ تۇرعان ساتتە: ”مۇگەدەكتەرگە ەرەكشە قامقورلىق جاساۋ، ەرەكشە كوڭىل ءبولۋ“ كەرەك دەپ دارىپتەدى
2019 - جىلى 5 - ايدىڭ 16 - كۇنى حالىق سارايىندا 6 - رەتكى مەملەكەتتىك ءوزىن الەۋەتتەندىرۋ ۇلگىلەرىن جانە مۇگەدەكتەرگە كومەكتەسۋ وزاتتارىن ماداقتاۋ - سيلاۋ جينالىسى اشىلدى، باس شۋجي شي جينپيڭ جينالىسقا قاتىناسقان ۋاكىلدەرمەن كەزدەستى ءارى توپىق سۋرەتكە ءتۇستى.
الدىڭعى قاتاردا اسكەري كيىم كيگەن، كوزىن قالىڭ داكىمەن وراپ العان جاس جىگىت تارتقان سىمداي تىپ - تىك تۇر. ونىڭ اتى دۋ فۋگو، 2018 - جىلى 10 - ايدا ءبىر رەتكى مينا تازالاۋ مىندەتىندە باقىتقا قارسى قوس جانارىنان ايرىلعان بولاتىن.
كوزىنىڭ الدىن قاراڭعىلىق تورلاپ تۇرعانىمەن، دۋ فۋگو باس شۋجيدىڭ قاسىنا كەلگەنىن ايقىن سەزىندى.
”ءتوراعا، سالەمەتسىز بە!“ ساڭقىلداي ءۇن قاتىپ، كەم بولىپ قالعان وڭ قولىن سوزىپ ەرەكشە اسكەري قۇرمەت ءبىلدىردى. باس شۋجي سول قولىمەن دۋ فۋگونىڭ شىناشاعىن ۇستاپ، وڭ قولىمەن ونىڭ يىعىن اقىرىن قاقتى.
ىستىق مەيىر كوڭىلدى جىلىتىپ، ۇلى ماحاببات ءۇنسىز بەينەلەندى.
2 ايدان استام ۋاقىتتان كەيىن، دۋ فۋگو ”مينا تازالاۋشى قاھارمان جاۋىنگەر“ داڭقتى اتاعىن الدى. ورتالىق اسكەري ىستەر كوميتەتى وتكىزگەن داڭقتى اتاق بەرۋ سالتىندا باس شۋجي شي جينپيڭ قاھارمان ۇلگى مەدالىن دۋ فۋگونىڭ كەۋدەسىنە بايىپپەن تاقتى ءارى اشەكەيلى باۋدى مۇقيات رەتتەدى. باس شۋجي: ”دەنساۋلىعىڭدى ايالا“ دەپ قاداعالاي تاپسىردى.
وسى ەكى رەتكى كەزدەسۋ دۋ فۋگونىڭ مۇگەدەك بولعانىنا جارىم جىلدان اسپاعان كەز بولاتىن. باس شۋجيدىڭ مەيىر - شاپاعاتى ونىڭ ەڭ قيىن ساتتەردى ەڭسەرۋىنە تىرەك بولدى.
بولماشى ىستەردەن شىنايى سۇيىسپەنشىلىك بايقالادى. مۇنداي شىنايى سۇيىسپەنشىلىك باستان - اياق وزگەرمەي كەلەدى.
سول جىلى لياڭجياحىدا ليڭۋا ەسىمدى بالا بار بولاتىن، زەيىن قۋاتىندا ازداپ كەمىستىك بار بولىپ، كەيدە قىستاق تۇرعىندارىمەن قاقتىعىسىپ قالىپ، باسقالاردىڭ جابىرلەۋىنە ۇشىرايتىن.
ليڭۋانىڭ شەشەسى بالاسىنىڭ پالە شىعارۋىنان الاڭداپ جۇرەتىن. ويلاماعان جەردەن بەيجيڭنەن كەلگەن زيالى جاس شي جينپيڭ ۇدايى ليڭۋاعا جىلى شىراي كورسەتىپ، كۇلىمسىرەي قارايتىن. كەيدە ليڭۋا ونىڭ نارسە – كەرەگىن تارتىپ السا، ول ەشقاشان رەنجىمەيتىن.
”جينپيڭ مۇندا بولسا، ليڭۋا باسقالاردىڭ باسىنۋىنا ۇشىرامايدى، ءماز – مايرام بولىپ قالادى“. اۋىلعا بىرگە بارعان زيالى جاس ەسكە الىپ بىلاي دەدى: شي جينپيڭ جولداس بەيجيڭگە قايتىپ داشۋەدە وقىعاندا، ليڭۋانىڭ اكە - شەشەسى ءوز تۋىسى الىسقا ساپار شەگىپ كەتكەندەي قاتتى قامىقتى.
1993 - جىلى شي جينپيڭ جولداس تۇڭعىش رەت فۋجياننان لياڭجياحىعا بارىپ اۋىلداستارمەن امانداسقاندا ليڭۋانىڭ تۇرمىسىندا قيىنشىلىق بار ەكەنىن ءبىلىپ، ارناۋلى اقشا بەرىپ كەتتى.
شىنايى سۇيىسپەنشىلىك ورنادى.
1975 - جىلى 10 - ايدا شي جينپيڭ جولداس لياڭجياحىدان اتتانعان كۇنى، ءجۇرىس - تۇرىسى قولايسىز مۇگەدەك قىستاق تۇرعىنى شى يۇيبيڭ قوس بالداققا سۇيەنىپ مىدىرلاي باسىپ كەلىپ قوشتاستى. شي جينپيڭ جولداس جۇرت اراسىنان شى يۇيبيڭدى كورە سالىپ دەرەۋ الدىعا ۇمتىلىپ، ونىڭ قولىن ۇستاپ، كوزىنە جاس الدى.
سارى توپىراقتى ۇستىرتتەن شىققان ول مۇگەدەكتەر بۇقاراسىنا ۇزاق ۋاقىت بويى قامقورلىق جاساپ تۇردى.
شي جينپيڭ جولداس فۋجوۋدا قىزمەت ىستەگەن كەزدە، ساڭشان رايونى شاڭدۋ ءمالى باسقارماسىندا لين كۇڭشياڭ ەسىمدى اۋرۋ سەبەبىنەن زەينەتكە شىققان مۇگەدەك جۇمىسشى تۇراتىنىن، ايەلىنىڭ ناۋقاستان مۇگەدەك بولىپ قالعانىن، 18 جاستاعى قىزىنىڭ زەيىن قۋاتى كەدەرگىگە ۇشىراپ، ءبىر ءۇيلى جاننىڭ تۇرمىسى وتە قيىن بولىپ تۇرعانىن ءبىلىپ، رايونداعى قاتىستى جاۋاپتىلارمەن اقىلداسىپ، حالىق ىستەرى تاراۋى ءبىر ساۋدا دۇكەنىن ىڭعايلاپ، لين كۇڭشياڭعا مايعا بەرىپ، وعان ازىق - تۇلىك دۇكەنىن اشتىرادى ءارى قاتىستى قوسىمشا قاراجات بەرگىزەدى.
”وسىنداي ەرەكشە قيىنشىلىعى بار ادامدارعا ۇكىمەت ەرەكشە كوڭىل ءبولۋى، وسى ادامدار قىسىلىپ - قىمتىرىلعاندا كوبىرەك قارايلاسۋى كەرەك“ دەدى شي جينپيڭ جولداس.
مۇنداي ”ەرەكشە قامقورلىق“ پەن ”قىسىلىپ - قىمتىرىلعاندا كوبىرەك قارايلاسۋ“ شي جينپيڭ جولداستىڭ ساياسي كەشىرمەلەرىنەن كوپتەپ كەزدەسەدى.
فۋجوۋدا نەگىزگى باسشى بولىپ ىستەگەن كەزىندە شي جينپيڭ جولداس ”تاباندا ءبىتىرۋ“ قىزمەت ستيلىمەن جۇمىس باسىندا جۇمىس ىستەپ، ارىز - ارمان قابىلداۋ قىزمەتىن جۇمىس باسىندا ىستەپ، كومەك سۇراي كەلگەن 70 جاستاعى ءبىر قارتقا تۇرمىستىق قوسىمشا قاراجات بەرگىزدى ءارى يگىلىك ورنىنا ونىڭ كورۋ قۋاتى ءالسىز ەكى بالاسىن لايىقتى ورنالاستىردى؛
جىجياڭ ولكەلىك پارتكومنىڭ شۋجيى مىندەتىن وتەگەن كەزدە، ءبىر جىلدىڭ كوكتەم مەرەكەسىنىڭ الدىندا، شي جينپيڭ جولداس چۇيجوۋعا بارىپ قيىنشىلىعى بار بۇقارامەن امانداستى، كۇن ءتارتىبى وتە تىعىز، ساپاردى ىقشامداۋعا تۋرا كەلسە دە، ”مۇگەدەكتەر وتباسىلارىن قاعىس قالدىرماۋدى“ ەرەكشە العا قويدى؛
شاڭحايدا قىزمەت ىستەگەندە، شي جينپيڭ جولداس قالالىق بالالار يگىلىك ورنىنا بارىپ، جەتىم، مۇگەدەك بالالارمەن امانداستى، بالالاردىڭ ءجۇرىس - تۇرىسىنىڭ قولايسىز ەكەنىن ءبىلىپ، تالاي رەت جۇرەلەپ وتىرىپ اڭگىمەلەسىپ، بالالاردىڭ سۋرەت سالۋىن، ءان ايتىپ، ءبي بيلەپ، تاق - تۇق دوپ ويناۋىن سابىرلىلىقپەن كوردى؛
پارتيا 18 - قۇرىلتايىنان كەيىن، باس شۋجي شي جينپيڭ قىزمەت تەكسەرۋدە ويلى - قىرلى تاۋ جولىن بويلاپ، سانشيدەگى لۇيلياڭ تاۋىنىڭ قويناۋىنداعى جاۋجياۋا قىستاعىنا بارىپ، مۇگەدەك نەمەرە ۇل - قىزىن جالعىز ءوزى باعىپ – قاعىپ وتىرعان ۋاڭ ساننۇيگە كۇرىش، ۇن، ماي جەتكىزىپ بەردى ءارى جەرگىلىكتى كادرلارعا بالالاردىڭ ارنايى تاربيە الۋىن جاقسى ورنالاستىرۋدى تاپسىردى...
”مۇگەدەكتەر _ ەرەكشە قيىنشىلىعى بار توپ، ەرەكشە قامقورلىققا، ەرەكشە كوڭىل بولۋگە مۇقتاج“. وسى ”ەرەكشە“ سۇيىسپەنشىلىك باس شۋجي شي جينپيڭنىڭ كوكەيىندە توتەنشە ماڭىزدى ورىندا تۇرىپ كەلدى.
كوكتەم جاڭبىرىنداي مەيىر باعىشتادى: ”مۇگەدەكتەردىڭ ار - نامىسىن قورعاۋ، مۇگەدەكتەردىڭ ۇقىق - مۇددەسىن قامتاماسىز ەتۋ، مۇگەدەكتەردىڭ قۇت - ىرىسىن مولايتۋ كەرەك“
30 نەشە جىلدان كەيىن فۋجيان ولكەسى مينچيڭ اۋداندىق مۇگەدەكتەر بىرلەستىگى باس القاسىنىڭ ورىنباسارى حۋاڭ داۋلياڭ شي مەكتەپ مەڭگەرۋشىسىنىڭ وزىنە دەگەن قامقورلىعىن ەسكە العاندا ءالى دە قاتتى اسەرلەنەدى.
حۋاڭ داۋلياڭ بالا كەزىندە ءبىر رەتكى شىرعالاڭدا ەكى قولىنان ايرىلعان، ءبىراق ول قايتا سەرپىلىپ، اياعىمەن جازۋ جازۋدى ۇيرەنىپ، باستاۋىش، ورتالاۋ، ورتا مەكتەپتەردى وقىپ بولادى. ءبىراق قاتارىنان ەكى رەت جوعارى مەكتەپكە ورلەپ وقۋ ەمتيحانىندا ءنومىرى جوعارى تەحنيكۋم شەگىنە جەتكەنىمەن، مەكتەپتەردىڭ ونى قابىلداعىسى كەلمەيدى.
1990 - جىلى حۋاڭ داۋلياڭ 3 - رەت جوعارى مەكتەپ ەمتيحانىنا قاتىناستى. بالاسىنىڭ ءۇمىتىنىڭ تاعى دا سەلگە كەتۋىنەن الاڭداعان اكەسى مينجياڭ كاسىپتىك داشۋەسىنە حات جازىپ، بالاسىنىڭ وقۋعا تالپىنۋ اڭگىمەسىن باياندايدى. سول كەزدە فۋجوۋ قالالىق پارتكومنىڭ شۋجيى شي جينپيڭ قوسىمشا مينجياڭ كاسىپتىك داشۋەسىنىڭ مەكتەپ مەڭگەرۋشىسى بولاتىن. ونىڭ كوڭىل ءبولۋى مەن سايكەستىرۋىندە حۋاڭ داۋلياڭ اقىرى مەكتەپ قاقپاسىنا كىرىپ، فۋجيان ولكەسىندەگى قولى جوق تۇڭعىش ستۋدەنتكە اينالدى.
”مەكتەپتىڭ سول جىلى مەنى قابىلداپ، ماعان شەكسىز قاستەرلى داشۋە تۇرمىسىن سيلاعانىنا، جاڭا ومىرگە قول جەتكىزۋىمە مۇمكىندىك جاراتقانىنا العىس ايتامىن“ دەدى حۋاڭ داۋلياڭ.
العىس سەزىمى نەشە ون جىلدى ءبىر كۇندەي وتكىزىپ كۇرەس جۇرگىزۋگە قامشى بولدى. داشۋەنى بىتىرگەننەن كەيىن، حۋاڭ داۋلياڭ مينچيڭ اۋدانىنا قايتىپ كەلىپ، مۇگەدەكتەر بىرلەستىگىنىڭ قىزمەتكەرى بولىپ، ءبىرىنشى شەپكە بارىپ، وتباسىلاردى ارالاپ، مۇگەدەكتەر ءۇشىن قىزمەت ىستەۋدەن جازباي، بۇكىل قوعامدى مۇگەدەكتەرگە نازار اۋدارۋعا، مۇگەدەكتەرگە كومەكتەسۋگە ۇندەدى.
”مۇگەدەكتەر − قوعام ۇلى شاڭىراعىنىڭ تەرەزەسى تەڭ مۇشەسى“. باس شۋجي شي جينپيڭنىڭ كوڭىلىندە مۇگەدەكتەر ساۋ ادامدار سياقتى ەكونوميكالىق، قوعامدىق دامۋدىڭ جەتىستىكتەرىنەن تولىق يگىلىكتەنىپ، كوگىلدىر اسپان استىندا باقىتتى تۇرمىس كەشىرۋى كەرەك.
كەدەرگىسىز ورتا قۇرىلىسى _ مۇگەدەكتەردىڭ قوعامدىق تۇرمىسقا تەڭ، تولىق، قولايلى ات سالىسۋىنىڭ ماڭىزدى كەپىلى.
2020 - جىلى 9 - ايدىڭ 17 - كۇنى باس شۋجي شي جينپيڭ حۋناننىڭ چاڭشا قالاسىندا نەگىزگى ساتى ۋاكىلدەرىنىڭ اڭگىمە ءماجىلىسىن باسقارىپ اشىپ، نەگىزگى ساتى كادر – جۇرتشىلىعىنىڭ ”14 - بەسجىلدىق“ جوبانى جاساۋ جونىندەگى پىكىرلەرى مەن ۇسىنىستارىن تىڭدادى. ماجىلىستە ياڭ شۋتيڭ يگىلىك جاراتۋشى مۇگەدەكتەردىڭ ۋاكىلى رەتىندە ءسوز سويلەپ، مۇگەدەكتەرگە قىزمەت وتەۋ، قامتاماسىزداندىرۋ جۇيەسىن كەمەلدەندىرۋ سياقتى ۇسىنىستاردى العا قويدى.
ءوزى ءسوز سويلەگەندە باس شۋجي شي جينپيڭنىڭ وتە مۇقيات تىڭداپ، ءالسىن - ءالى داپتەرگە جازىپ وتىرعانىن ياڭ شۋتيڭ كۇنى بۇگىنگە دەيىن ەسىندە انىق ساقتاپ كەلەدى ەكەن. ”ءسىز ايتقان كەدەرگىسىز قۇرىلعى قۇرىلىسى ماسەلەسى _ ءبىر مەملەكەت پەن قوعام وركەنيەتىنىڭ بەلگىسى، ءبىز ايرىقشا ءمان بەرۋىمىز كەرەك“. باس شۋجي شي جينپيڭ ياڭ شۋتيڭگە وسىلاي دەگەن.
وسى جولعى ماجىلىستەن كەيىن ياڭ شۋتيڭ كەدەرگىسىز ورتا قۇرىلىسىنا ءتىپتى دە كوپ نازار اۋداردى. ول اۋىلىنىڭ كەدەرگىسىز قۇرىلعى سىناۋشىسى بولىپ، كەدەرگىسىز قۇرىلعىلاردى جاڭالاۋ، جوعارىلاتۋ، قورعاۋ ءۇشىن ءوزىنىڭ ۇسىنىس - پىكىرىن ورتاعا قويدى.
2023 – جىلى 6 – ايدا ەلىمىز تۇڭعىش رەت كەدەرگىسىز ورتا قۇرىلىسى جونىندە جاساعان ارناۋلى زاڭ − كەدەرگىسىز ورتا قۇرىلىسى زاڭىن مەملەكەتتىك حالىق قۇرىلتايى تۇراقتى كوميتەتى داۋىسقا سالىپ ماقۇلدادى، مەملەكەت ءتوراعاسى شي جينپيڭ ءتوراعا بۇيرىعىنا قول قويىپ جاريالادى.
”بۇل زاڭنىڭ ءاربىر سوزىنە باس شۋجي مەن پارتيا ورتالىق كوميتەتىنىڭ مۇگەدەكتەرگە دەگەن قالتقىسىز قامقورلىعى، ايالاۋى سىڭگەن. مەن كەدەرگىسىز ورتا قۇرىلىسىنىڭ ۇزدىكسىز دامۋىنا ىلەسە، ءتىپتى دە كوپ ادامنىڭ مۇگەدەكتىكتىڭ بۇعاۋىنان قۇتىلىپ، ءتىپتى دە حاۋىپسىز، قولايلى سىرتقا شىعىپ، قوعاممەن توعىسارىنا سەنەمىن“ دەدى ياڭ شۋتيڭ.
مۇگەدەكتەردىڭ رۋحاني مادەنيەت تۇرمىسىن بايىتۋ − مۇگەدەكتەردىڭ ۇقىعىن قامتاماسىزداندىرۋ تاقىرىبىنداعى مازمۇن.
كينونىڭ تۇسىندىرمە نۇسقاسىنىڭ ءبىر بولەگىن جازىپ بولعاندا تۇنگى ساعات 12 دەن استى، دۋ چىڭچىڭ ۇستەلدى جيناپ، ءبىر كۇندىك قىزمەتىنە نۇكتە قويدى.
37 جاستاعى دۋ چىڭچىڭ − ۋحان قالاسى چيڭشان رايونىنىڭ «سوقىرلار كينوسى ارناۋلى الاڭىنىڭ» ءتۇسىندىرۋشىسى ءارى اۋىر دارەجەدەگى مۇگەدەك.
كينو وڭاي - وسپاق ءىس ەمەس. ءبىر كينونىڭ ءتۇسىندىرۋ سوزىنە ادەتتە 1 - 3 اي ۋاقىت كەتەدى. ۇزاق وتىرا المايتىن دۋ چىڭچىڭ ۇنەمى توسەككە جاتىپ جازۋ جازىپ، شارشاعاندا وتىرىسىن وزگەرتەدى، ءبىراق ول ءوز ءىسىن قۋانىش ساناپ، ەشقاشان جالىقپايدى.
2018 - جىلى 4 - ايدا باس شۋجي شي جينپيڭ ۋحان قالاسى چيڭشان رايونى چيڭحىجۇي الەۋمەتتىك اۋماعىندا قىزمەت تەكسەرگەندە دۋ چىڭچىڭمەن كەزدەستى. دوڭگەلەكتى ورىندىقتا وتىرعان دۋ چىڭچىڭدى كورگەندە باس شۋجي الدىعا شىعىپ ەڭكەيىپ، قولىن ىقىلاسپەن ۇستاپ، ونىڭ قىزمەتىن ”وتە ماعىنالى قىزمەت“ دەپ القادى.
”اتتاناردا باس شۋجي تاعى ماعان ’راقىمەت سىزگە‘ دەدى، سول كەزدە كوزىمنەن جاس پارلادى“. دۋ چىڭچىڭ بىلاي دەدى: ”باس شۋجي مەنىڭ قىزمەتىمدى ءماندى دەپ باعالادى، ويتكەنى ول مۇگەدەكتەردىڭ قاجەتىن تەرەڭ تۇسىنەدى“.
”ءتۇرلى قۇرىلىس ىستەرىندە مۇگەدەكتەر ءىسىن ەنگىزىپ، مۇگەدەكتەردىڭ ۇقىق ـ مۇددەسىن قامتاماسىز ەتۋ ءتۇزىمىن ۇزدىكسىز اقاۋسىزداندىرۋ كەرەك“. باس شۋجي شي جينپيڭ اۋەلدەن وسىلاي دەپ دارىپتەپ كەلەدى.
باس شۋجيدىڭ ”بالالارعا، اسىرەسە، جەتىم بالالار مەن مۇگەدەك بالالارعا قاراتا، تۇتاس قوعامدا مەيىرباندىق سۇيىسپەنشىلىك، قامقورلىق سۇيىسپەنشىلىگى بولۋ كەرەك“ دەگەن ۇندەۋىن امالياتتا ايگىلەپ، اناعۇرلىم كوپ ىزگى نيەت پەن سۇيىسپەنشىلىك توعىسىپ، مۇگەدەك بالالاردى قامتىعان ەرەكشە قيىنشىلىعى بار بالالارعا اشىق اسپان سيلادى؛
باس شۋجيدىڭ ”رۋحاني كەمىستىگى بارلارعا كوڭىل ءبولۋ، قامقورلىق جاساۋ“ جونىندەگى نۇسقاۋىن تياناقتاندىرىپ، جەر - جەردەگى رۋحاني كەمىستىكتى الەۋمەتتىك اۋماقتا ساۋىقتىرۋ قىزمەت وتەۋ، توعىستىرۋ ارەكەتى ۇزدىكسىز ورىستەتىلدى؛
باس شۋجيدىڭ جۇڭگونىڭ مۇگەدەكتەر وليمپياداسىنا قاتىناسقان سپورتشىلارىنا دەگەن ماقتاۋىن ەستە بەرىك ساقتاپ، ءتىپتى دە كوپ مۇگەدەك باتىلدىقپەن قامال الىپ، وزدەرىنە سايىس جاريالاپ، سپورتتىڭ شاتتىعىنان تولىق ءلاززاتتاندى...
”مۇگەدەكتەردى قوعامدىق قامتاماسىزداندىرۋ ءتۇزىمى مەن قامقورلىق جاساۋ، قىزمەت وتەۋ جۇيەسىن كەمەلدەندىرىپ، مۇگەدەكتەر ىستەرىنىڭ جاپپاي دامۋىن جەبەۋ كەرەك“. پارتيانىڭ 20 - قۇرىلتايىندا كەسكىندەلگەن جۇڭگو ۇلگىسىندەگى وسىزامانداندىرۋدىڭ باقىت كورىنىسىندە مۇگەدەكتەر ىستەرى دەگەن ءسوز ەرەكشە كوز تارتادى.
كوكتەم شۋاعىنداي ءۇمىت سيلادى: ”ءداۋىردىڭ ءۇمىتىن اقتايتىن تاماشا ءومىر جاراتۋعا قۇلشىنامىز“
”تاۋ ءانىن ايتىپ پارتياعا ارنايمىن، مەن پارتيانى انامداي كورەمىن...“ قول تەلەفونداعى ءان ايتۋ جۇمساق بولشەگىن جاتىق اشقان حىبەي ولكەسى تاڭشان قالالىق سالدانۋشىلاردى ەمدەۋ - كۇتىمدەۋ ورنىندا ەمدەلىپ جاتقان ياۋ سۇيچين ءوزى ەڭ ۇناتاتىن وسى ءاندى تاعى ءبىر رەت شىرقادى.
2016 - جىلى 7 - ايدا باس شۋجي شي جينپيڭ حىبەيدىڭ تاڭشان قالاسىندا قىزمەت تەكسەرگەن كەزدە، تاڭشان قالالىق سالدانۋشىلاردى ەمدەۋ - كۇتىمدەۋ ورنىنا ارنايى كەلدى. ساناتوريانىڭ كۇن ساۋلەسىنە مالىنعان ۇيىندە ىرحۋ مۋزىكاسىنىڭ سۇيەمەلدەۋىندە ياۋ سۇيچين «تاۋ ءانىن پارتياعا ارنايمىن» دەگەن ءاندى شىرقادى. ءان اياقتاعاندا، باس شۋجي باستاماشىلدىقپەن شاپالاق سوقتى.
وسى رەتكى قىزمەت تەكسەرۋدە باس شۋجي شي جينپيڭ تەرەڭ سۇيىسپەنشىلىكپەن بىلاي دەپ شابىتتاندىردى: ”ساۋ دەنەلى ادامدار تاماشا ءومىر سۇرە الادى، مۇگەدەكتەر دە تاماشا ءومىر سۇرە الادى“.
باس شۋجيدىڭ تاپسىرماسىن ەستە بەرىك ساقتاعان ياۋ سۇيچين مەن باسقا دا سالدانعان ەمدەلۋشىلەر بار كۇشىمەن تاماشا تۇرمىس كەشىرۋدە.
كەزىندە باس شۋجيگە ولەڭدى داۋىستاپ وقىعان ياڭ يۇيفاڭ كىلت سوعۋ شەبەرلىگىن وزدىگىنەن ۇيرەنىپ، جاقىن ماڭداعى الەۋمەتتىك اۋماق تۇرعىندارىنا قولايلىلىق تۋدىردى، بوس ۋاقىتتارىندا ولەڭ جاسامپازدىعىمەن شۇعىلدانادى؛ سونداي - اق باس شۋجي شابىتتاندىرعان لي دۇڭمەي سول جاس كەزىندەگى ونەر كورسەتۋ ارمانىنا قايتا تالپىنىپ، حىبەي ولكەلىك مۇگەدەكتەر سپورت جارىسىندا ەرلىكپەن 3 التىن مەدال الادى...
دەنە مۇشەسىندە كەمىستىگى بار ادام بولادى، ءبىراق بۇل ءومىردىڭ مانىنە شەكتەۋ بولمايدى.
بۇل − دۋماندى ءارى تىنىش ساباقحانا:
ىشكى موڭعۇلدىڭ كوكحوت قالاسى ەرەكشە تاربيە مەكتەبىنىڭ ساباق مىنبەسىندە اجارلاندىرۋ، شاش اسەمدەۋ ساباعىنىڭ وقىتۋشىسى ۋاڭ ياني وقۋشىلارعا سابىرلىلىقپەن تۇسىنىك جاساۋدا، وقۋشىلار ءالسىن - ءالى قول كوتەرىپ سۇراۋ قويۋدا. ادەتتەگى ساباقحانالارعا ۇقسامايتىنى، وقىتۋشى - وقۋشىلار اراسىنداعى قارىم - قاتىناس تۇگەلدەي قول يشاراتى ارقىلى جۇرگىزىلەدى.
وقىتۋشى بولۋ − ۋاڭ يانيدىڭ قارشادايىنان ورناتقان ارمانى، بۇل ارمان بىرنەشە جىلدىڭ الدىندا باس شۋجي شي جينپيڭنىڭ ونىمەن كەزدەسۋىنەن كەيىن ىسكە استى.
2014 - جىلى كوكتەم مەرەكەسى قارساڭىندا، باس شۋجي شي جينپيڭ كوكحوت قالاسىنداعى بالالار يگىلىك ورنىنا كەلىپ، وسى ارادا تۇراتىن بالالارمەن امانداستى. ۋاڭ ياني − انە، سولاردىڭ ءبىرى.
باس شۋجي ۋاڭ يانيدى جاقسى ۇيرەنۋگە، ۇيرەنۋدە تابىسقا جەتۋگە شابىتتاندىردى. كىشكەنتاي ياني ەرىكسىزدەن وڭ قولىن كوتەرىپ، باس بارماعىن شىعارىپ، باس شۋجيگە ”راقىمەت“ دەدى. باس شۋجي دە قولىن سوزىپ ۇقساس ارەكەت جاسادى، جۇزىنەن مەيىرلى كۇلكى ەستى.
شي جينپيڭنىڭ شابىتتاندىرۋى ۋاڭ يانيدى تاباندىلىقپەن ۇيرەنۋدىڭ سارقىلماس قوزعاۋشى كۇشىنە يە ەتتى. بۇل كۇندە مىنبەگە شىققان ۋاڭ ياني ءتىپتى دە كوپ مۇگەدەك بالالاردىڭ تاعدىرىن وزگەرتۋىنە كومەكتەسە باستادى. ”قازىر ’جاقسى ۇيرەنسەڭ، كاسىپتە تابىسقا جەتەسىڭ‘ دەگەن ءسوز مەنىڭ وقۋشىلارعا ’ەڭ كوپ ايتقان‘ ءسوزىم سانالادى، شي اتايدىڭ كەزىندەگى ءۇمىتى دە بۇگىنگى قىزمەتىمنىڭ تالپىنىسىنا اينالعان بولاتىن“.
ارمان قۋۋ كۇشىن توپتاپ، ەكپىندەي ىلگەرىلەۋ رۋحىن تاسقىنداتتى.
2022 - جىلى 4 - ايدىڭ 8 - كۇنى بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن قورىتىندىلاۋ، ماداقتاۋ - سيلاۋ جينالىسىندا باس شۋجي شي جينپيڭ وزىنە تەرەڭ اسەر قالدىرعان مىناداي ءبىر اۋىز ءسوزدى ارنايى اۋىزعا الدى: ”كوزى كورمەيتىن سپورتشىنىڭ جارىس الاڭىندا ايتقانىنداي: ’دۇنيەنى انىق كورە المايمىن، ءبىراق دۇنيە جۇزىنە ءوزىمدى كورسەتكىم كەلەدى“.
باس شۋجيدىڭ ءسوزىن ناق مايداندا تىڭداعان جۇڭگونىڭ مۇگەدەكتەر وليمپيادا سپورت جارىسىنىڭ دالا شاڭعىسى مەن قىسقى ەكى تۇردەگى سپورتشىسى ۋاڭ يۋە قاتتى تەبىرەندى. بۇل ءسوزدى ۋاڭ يۋە تىلشىلەردىڭ سۇحباتىن قابىلداعاندا ايتقان بولاتىن.
بەيجيڭ قىسقى مۇگەدەكتەر وليمپيادا سپورت جارىسى اياقتاعاننان كەيىن ۋاڭ يۋە قاراپايىم تىنىعۋ، رەتتەۋ ارقىلى جاڭا كەزەكتى جارىسقا دايىندالا باستادى: ”مەن ءوزىمنىڭ قۇلشىنىسىم ارقىلى باسەكەلىك دەڭگەيىمدى ۇزدىكسىز جوعارىلاتىپ، دۇنيە جۇزىنە جاڭا داۋىردەگى جۇڭگو مۇگەدەكتەرىنىڭ كەلبەتىن ايگىلەيمىن“.
جۇڭگو ارمانى − ۇلت ارمانى، مەملەكەت ارمانى ءارى مۇگەدەكتەردى قامتىعان ءاربىر جۇڭگولىقتىڭ ارمانى.
يۇننان ولكەسى كۇنميڭ قالاسى دۇڭچۋان رايونى ۋلۇڭ قالاشىعى پيڭزى قىستاعىنىڭ تۇرعىنى جاڭ شۇندۇڭ مەن لي گوشيۋ ەرلى - زايىپتى ەكەۋى اياق – قولى كەم مۇگەدەكتەر. ءبىراق ەكەۋى كۇتىپ وتىرماي، يەك سۇيەمەي، ءبىر - بىرىنە دەمەۋشى بولىپ، كەدەيلىك قالپاعىن لاقتىرىپ تاستادى.
”ءبىز ءتان جاعىندا مۇگەدەك بولعانىمىزبەن، رۋحاني جاقتان مۇگەدەك ەمەسپىز، ءبىزدىڭ ميىمىز، قولىمىز بار، ىستەگىمىز كەلەتىن ىستەرىمىز بار“. مەملەكەتتىك كەدەيلىكتەن ارىلتۋدان قامال الۋدى قورىتىندىلاۋ، ماداقتاۋ - سيلاۋ جينالىسىندا باس شۋجي شي جينپيڭ جاڭ شۇندۇڭنىڭ وسى ءسوزىن ەرەكشە اۋىزعا الىپ، كەدەيلىكتەن ارىلعان قالىڭ بۇقارانىڭ ءوز كۇشىنە سۇيەنىپ ءوزىن الۋەتتەندىرۋ سەنىمى مەن باتىلدىعىن القادى.
بۇل كۇندە كەدەيلىكتەن ارىلۋ جولىنداعى وسى كۇرەسكەرلەر اۋىل - قىستاقتى گۇلدەندىرۋدىڭ ”سەركەلەرىنە“ اينالدى. ەرلى - زايىپتى ەكەۋى استىق ەگىپ، باعىمشىلىقپەن شۇعىلدانىپ قانا قويماي، جاڭ شۇندۇڭ قىستاقتاعى مۇگەدەكتەردىڭ بايلانىسشىسى بولىپ، ءاربىر وتباسىنا بارىپ، كوپشىلىك ءۇشىن بايۋ جولىن قاراستىرۋدا.
جاڭ شۇندۇڭ مەن لي گوشيۋدىڭ ۇيىندە ”پارتياعا ماڭگى ىلەسەيىك“ دەگەن جازۋ جازىلعان قىزىل تۋ بار. مۇنى قوس قولى جوق لي گوشيۋ ءبىر اي ۋاقىت جۇمساپ اياعىمەن كەستەلەگەن.
مۇگەدەك ەرلى – زايىپتىلاردىڭ جاپا – ماشاقاتىمەن ازىرلەنگەن كەستە ولاردىڭ باس شۋجي شي جينپيڭگە دەگەن شىنايى جۇرەك ءۇنىن بەينەلەدى، ونان دا ماڭىزدىسى، جاڭا ءداۋىردىڭ جاڭا جورىعىندا ەلىمىزدەگى شامامەن 85 ميلليون مۇگەدەكتىڭ اناعۇرلىم تاماشا تۇرمىسقا دەگەن كوكەي تەستى تىلەگىنە ۋاكىلدىك ەتۋدە.
(شينحۋا اگەنتتىگى، 9 - ايدىڭ 17 – كۇنى، بەيجيڭ. تىلشىلەر جۋ جيچاي، گاۋ لەي، سۇن شاۋلۇڭ، دۇڭ بوتيڭ، يىن سى – يۋان)
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
