شي جينپيڭ ۋرۋگۆايدىڭ زۇڭتۇڭى لاكالەمەن كەڭەس وتكىزدى

2023.11.23 20:06 كەلۋ قاينارى : حالىق تورابى

11 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆايدىڭ زۇڭتۇڭى لاكالەمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا لاكالەنى قارسى الۋ سالتىن وتكىزۋدە. سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن

　　شينحۋا اگەنتتىگى، 11 - ايدىڭ 22 - كۇنى، بەيجيڭ (ءتىلشى ياڭ ي - جۇن)، 11 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆايدىڭ زۇڭتۇڭى لاكالەمەن كەڭەس وتكىزدى. ەكى ەل مەملەكەت باسشىلارى جۇڭگو مەن ۋرۋگۆايدىڭ قارىم - قاتىناسىن جالپى بەتتىك ستراتەگيالىق سەرىكتەستىك قارىم - قاتىناس دەڭگەيىنە كوتەرەتىندەرىن جاريالادى.

　　شي جينپيڭ بىلاي دەپ اتاپ كورسەتتى: 2023 – جىل _ جۇڭگو مەن ۋرۋگۆايدىڭ ديپلوماتيالىق قارىم - قاتىناس ورناتقانىنىڭ 35 جىلدىعى جانە ۋرۋگۆايدىڭ ”ءبىر بەلدەۋ، ءبىر جولدى“ بىرگە قۇرۋ باستاماسىنا قاتىناسقانىنىڭ 5 جىلدىعى. ديپلوماتيالىق قارىم - قاتىناس ورناتقان 35 جىلدان بەرى ەكى ەل ءوزارا قۇرمەت ەتۋدە، تەڭ تۇرعىدا مامىلە جاساۋدا، سەلبەسىپ تەڭ يگىلىككە كەنەلۋدە باستان - اياق تاباندى بولىپ، ءار سالاداعى اۋىس - كۇيىس، سەلبەستىك قارىشتاپ دامىدى. اسىرەسە، جاڭا تيپتى ايدارشا ۆيرۋس وكپە قابىنۋ ىندەتى الدىندا، ەكى ەل ءبىر - بىرىنە قارايلاسىپ، ءبىر نيەتپەن ىندەتكە قارسى اتتانىپ، جۇڭگو مەن ۋرۋگۆايدىڭ ستراتەگيالىق سەرىكتەستىك قارىم - قاتىناسى جوعارى ورەگە كوتەرىلدى. جۇڭگو جاق ۋرۋگۆاي جاقپەن بىرگە جالپى بەتتىك ستراتەگيالىق سەرىكتەستىك قارىم - قاتىناس ورناتۋدى جاڭا باستاما، جاڭا كوورديناتا ەتىپ، ەكى جاقتى قارىم - قاتىناستىڭ دەڭگەيىن جوعارىلاتىپ، ەكى ەل سەلبەستىگىنىڭ مازمۇنىن بايىتىپ، جۇڭگو - ۋرۋگۆاي قارىم - قاتىناسىن تۇرلىشە كولەمدەگى، تۇرلىشە تۇزىمدەگى، تۇرلىشە مادەنيەتتەگى ەلدەردىڭ ىنتىماقتاسا سەلبەسۋىنىڭ ۇلگىسىنە اينالدىرىپ، ءوز ەلدەرىنىڭ دامۋىنا اناعۇرلىم ويداعىداي قىزمەت ەتىپ، ەكى ەل حالىقتارىنىڭ ىرىس – قۇتىن ارتتىرۋدى قالايدى.

　　شي جينپيڭ جۇڭگو ۇلگىسىندەگى وسىزامانداندىرۋدىڭ ىشكى ءمانىن تانىستىرىپ، مىنانى ءبىلدىردى: جۇڭگو ۋرۋگۆايمەن ەل باسقارۋ جونىندە اۋىس - كۇيىس جاساۋدى كۇشەيتىپ، ساياسي سەنىمدىلىكتى ارتتىرىپ، دامۋ ورايىنان بىرگە يگىلىكتەنىپ، ءوز ەلدەرىنىڭ وسىزاماندانۋى مەن دۇنيە ءجۇزىنىڭ وسىزاماندانۋىن جۇزەگە اسىرۋدى ىلگەرىلەتۋدى قالايدى. ەكى جاق زاڭ شىعارۋ قۇرىلىمدارىنىڭ، ساياسي پارتيالاردىڭ، جەرگىلىكتى ورىنداردىڭ دوستىق اۋىس - كۇيىسىن، سەلبەستىگىن جيىلەتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىك جوباسىنا قول قويۋدى وراي ەتىپ، دامۋ ستراتەگياسىن ۇشتاستىرۋدى كۇشەيتىپ، قىزمەت وتەۋ ساۋداسى، سيفرلى ەكونوميكا، تازا ەنەرگيا سياقتى سالالارداعى سەلبەستىكتىڭ جاڭا قوزعاۋشى قۋاتىن جەتىلدىرىپ، جۇڭگو مەن ۋرۋگۆايدىڭ ”ءبىر بەلدەۋ، ءبىر جولدى“ بىرگە قۇرۋىنىڭ ساپالى دامۋدىڭ جاڭا كەزەڭىنە ءوتۋىن ىلگەرىلەتۋى كەرەك. ۋرۋگۆايدىڭ ءتىپتى دە كوپ ساپالى ەگىن، مال شارۋاشىلىق ونىمدەرى مەن ۇستەمە قۇنى جوعارى ونىمدەرىنىڭ جۇڭگو بازارىنا كىرۋىن قارسى الامىز، جۇڭگو كاسىپورىندارىن ۋرۋگۆايعا بارىپ قارجى قوسىپ، شارۋاشىلىقتى گۇلدەندىرۋگە شابىتتاندىرامىز، ۋرۋگۋايدىڭ جۇڭگو كاسىپورىندارىنا ۇزدىكسىز تاماشا ساۋدا ورتاسىن ازىرلەۋىن ءۇمىت ەتەمىز. ەكى جاق مادەنيەت، دەنە تاربيە سياقتى گۋمانيتارلىق اۋىس - كۇيىستى جەبەپ، ەكى ەل ادامدارىنىڭ بارىس - كەلىسىنە اناعۇرلىم كوپ قولايلى شارت - جاعداي جاراتۋى كەرەك، جۇڭگو ۋرۋگۆايعا وقۋ سيلىق اقشاسىن بەرۋ سانىن اناعۇرلىم كوبەيتۋدى قالايدى.

　　شي جينپيڭ بىلاي دەپ اتاپ كورسەتتى: جۇڭگو مەن ۋرۋگۆايدىڭ كوپتەگەن حالىقارالىق جانە وڭىرلىك ماسەلەلەردەگى ۇستانىمى قارايلاس، كەڭ كولەمدى ورتاق تانىمعا جانە ورتاق مۇددەگە يە، ەكى جاقتىڭ بىرلەسكەن مەملەكەتتەر ۇيىمى، دۇنيە جۇزىلىك ساۋدا ۇيىمى سياقتى كوپ جاقتى مەحانيزمدەگى سايكەسۋدى، سەلبەسۋدى اناعۇرلىم كۇشەيتىپ، دۇنيە ءجۇزىنىڭ اناعۇرلىم بەيبىت بولۋىنا، گۇلدەنۋىنە، ءادىل بولۋىنا مۇمكىندىك جاساۋ جولىندا بىرگە قۇلشىنۋىنا بولادى. جۇڭگو جاق جۇڭگو - لاتىن امەريكاسى قارىم - قاتىناسىنىڭ دامۋىنا ايرىقشا ءمان بەرەدى، ۋرۋگۆايدىڭ جۇڭگو مەن لاتىن امەريكاسىنىڭ جالپى تۇلعالىق سەلبەستىگىنە باستان - اياق بەلسەنە ات سالىسقانىن القايدى، وڭتۇستىك جاق ورتاق بازارى سياقتى وڭىرلىك ۇيىمداردىڭ جۇڭگومەن ساياسي تىلدەسۋدى جانە ەكونوميكا - ساۋدا سەلبەستىگىن جيىلەتۋىن قولدايدى، ۋرۋگۆايدىڭ جۇڭگو مەن لاتىن امەريكاسىنىڭ جانە جۇڭگو مەن وڭتۇستىك ەلدەرىنىڭ سەلبەستىگىن بۇرىنعىداي جەبەۋىن ءۇمىت ەتەدى.

　　لاكالە مىنالاردى ءبىلدىردى: ۋرۋگۆاي مەن جۇڭگونىڭ ديپلوماتيالىق قارىم - قاتىناس ورناتقانىنىڭ 35 جىلدىعى قارساڭىندا بيلىك كەڭسەسىنىڭ ماڭىزدى مۇشەلەرى مەن مەن ەكونوميكا – ساۋدا سالاسىنداعىلاردىڭ ۋاكىلدەر ۇيىرمەسىن باستاپ جۇڭگوعا ساپارلاي كەلگەنىمە توتەنشە قۋانىشتامىن. ۋرۋگۆاي مەن جۇڭگو ديپلوماتيالىق قارىم - قاتىناس ورناتقان 35 جىلدان بەرى ەكى ەل قارىم - قاتىناسىن دامىتۋدا باستان - اياق تەڭدىك، قۇرمەت ەتۋ، ءوزارا پايدا جەتكىزۋ، تەڭ يگىلىككە كەنەلۋ پرينسيبىن ۇستانىپ كەلەمىز، ەكى جاقتىڭ ساياسي سەنىمدىلىگى بەرىك، ۋرۋگۆاي - جۇڭگو قارىم - قاتىناسىن ۇزدىكسىز تەرەڭدەتۋ _ ۋرۋگۋايدىڭ ءار سالاسى مەن جالپى حالىقتىڭ كۇشتى ورتاق تانىمى. ۋرۋگۆاي ۇكىمەتى دۇنيە جۇزىندە ءبىر عانا جۇڭگو بار ەكەنىن مويىندايدى، بەيبىت جولمەن بىرلىككە كەلۋ _ جۇڭگونىڭ ىشكى ءىسى، ونى جۇڭگو حالقى ءوزى بەلگىلەۋى كەرەك. ۋرۋگۆاي مەن جۇڭگو كوپ جاقتىلىقتى باتىل قورعاپ، ەركىن ساۋدانى قورعاپ، دۇنيە ءجۇزىنىڭ بەيبىتشىلىگى مەن ورنىقتىلىعىن جەبەۋگە كۇش سالادى. ۋرۋگۆاي - جۇڭگو قارىم - قاتىناسى ەكونوميكا - ساۋدا سالاسىنان اسىپ، كوپ ولشەمدى، جوعارى دەڭگەيدە دامىعان تاماشا جاعداي جارىققا شىقتى. ۋرۋگۆاي ”ءبىر بەلدەۋ، ءبىر جولدى“ بىرگە قۇرۋدى بەلسەنە قولدايدى، ءتوراعا شي جينپيڭ العا قويعان دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن قۇپتايدى، ەكونوميكا - ساۋدا، عىلىم - تەحنيكا، دەنە تاربيە، ساياحات سياقتى سالالارداعى سەلبەستىكتى كۇشەيتۋدى ءۇمىت ەتەدى، ءتىپتى دە كوپ جۇڭگو كاسىپورىندارىنىڭ ۋرۋگۆايعا بارىپ قارجى قوسىپ، شارۋاشىلىقتى گۇلدەندىرۋىن قارسى الادى، ۋرۋگۆايدا ءتىپتى دە كوپ كۇڭزى شۋەيۋانىن قۇرۋدى قولداپ، ەكى ەل ادامدارىنىڭ بارىس - كەلىسى مەن گۋمانيتارلىق اۋىس - كۇيىسىن جەبەيدى. ۋرۋگۆاي جاق جۇڭگو جاقپەن ەركىن ساۋدا سەلبەستىگىن جەدەل ىلگەرىلەتۋدى، سونىمەن بىرگە، وڭتۇستىك ەلدەر ورتاق بازارىنىڭ وسى نىساناعا قاراي قادام تاستاۋىن ىلگەرىلەتۋدى ءۇمىت ەتەدى. ۋرۋگۆاي لاتىن امەريكاسى - جۇڭگو قارىم - قاتىناسىنىڭ دامۋىن جانە لاتىن امەريكاسى - جۇڭگو تالقى مىنبەرى قۇرىلىسىن ىلگەرىلەتۋدە بەلسەندى رول اتقارۋدى قالايدى.

　　كەڭەستەن كەيىن ەكى ەل مەملەكەت باسشىلارى ”ءبىر بەلدەۋ، ءبىر جولدى“ بىرگە قۇرۋ سەلبەستىك جوباسىنا، ساۋداعا قارجى قوسۋ، سيفرلى ەكونوميكا، جاسىل دامۋ، اۋىل شارۋاشىلىعى، دەنساۋلىق ساقتاۋ، وقۋ - اعارتۋ، مادەنيەت، عىلىم - تەحنيكادا جاڭالىق اشۋ جانە كەدەندىك تەكسەرۋ - كارانتيندەۋ سياقتى سالالارداعى كوپ ءتۇرلى ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

　　كەڭەستەن بۇرىن شي جينپيڭ حالىق سارايىنىڭ سولتۇستىك زالىندا لاكالەنى قارسى الۋ سالتىن وتكىزدى.

　　تيان - انمىن الاڭىندا 21 رەت قۇرمەت ساليۋتى اتىلىپ، قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن ۋرۋگۆايدىڭ مەملەكەت اندەرىن ورىندادى. لاكالە شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

　　سول كۇنى كەشتە شي جينپيڭ حالىق سارايىنىڭ التىن ءتۇستى زالىندا لاكالەنى قارسى الۋ قوناعاسىن وتكىزدى.

　　ۋاڭ ي جوعارىداعى قيمىلدارعا قاتىناستى.

　　لاكالە جۇڭگودا ساپاردا بولعان كەزدە ەكى جاق «جۇڭحۋا حالىق رەسپۋبليكاسى مەن ۋرۋگۆاي شىعىس جاعالاۋ رەسپۋبليكاسىنىڭ جالپى بەتتىك ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.

　　كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved