شي جينپيڭ ا ق ش - نىڭ ونەركاسىپ - ساۋدا سالاسىنداعىلاردىڭ جانە ستراتەگيالىق عىلىم سالاسىنداعىلاردىڭ ۋاكىلدەرىمەن كەزدەستى

2024.03.28 16:18 كەلۋ قاينارى : حالىق تورابى

3 - ايدىڭ 27 - كۇنى مەملەكەت ءتوراعاسى شي جينپيڭ بەيجيڭدەگى حالىق سارايىندا ا ق ش - نىڭ ونەركاسىپ - ساۋدا سالاسىنداعىلاردىڭ جانە ستراتەگيالىق عىلىم سالاسىنداعىلاردىڭ ۋاكىلدەرىمەن توپتىق كەزدەستى. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

　　شينحۋا اگەنتتىگى، 3 - ايدىڭ 27 – كۇنى، بەيجيڭ (ءتىلشى ياڭ ي - جۇن). 3 - ايدىڭ 27 – كۇنى مەملەكەت ءتوراعاسى شي جينپيڭ بەيجيڭدەگى حالىق سارايىندا ا ق ش - نىڭ ونەركاسىپ - ساۋدا سالاسىنداعىلاردىڭ جانە ستراتەگيالىق عىلىم سالاسىنداعىلاردىڭ ۋاكىلدەرىمەن توپتىق كەزدەستى.

　　شي جينپيڭ ا ق ش - نىڭ ونەركاسىپ - ساۋدا سالاسىنداعى جانە ستراتەگيالىق عىلىم سالاسىنداعى قايراتكەرلەردىڭ كوكتەم لەبى ەسكەن كەزدە جۇڭگوعا ساپارلاي كەلگەنىن قارسى الاتىنىن ءبىلدىردى. شي جينپيڭ بىلاي دەپ اتاپ كورسەتتى: جۇڭگو - ا ق ش قارىم - قاتىناسى − دۇنيە جۇزىندەگى ەڭ ماڭىزدى ەكى جاقتى قارىم - قاتىناستىڭ ءبىرى. جۇڭگو مەن ا ق ش سەلبەستىك جاساي ما، الدە قارسىلاسا ما، بۇل ەكى ەل حالىقتارىنىڭ باقىتى مەن ادامزاتتىڭ بولاشاق تاعدىرىنا سايادى. جۇڭگو مەن ا ق ش - نىڭ ءارقايسىسىنىڭ تابىسقا جەتۋى ءبىر - بىرىنە وراي ەسەپتەلەدى. ەكى جاق ءبىر - ءبىرىن سەرىك دەپ قاراپ، ءبىرىن - ءبىرى قۇرمەتتەپ، بەيبىت قاتار تۇرىپ، سەلبەسىپ بىرگە يگىلىكتەنسە بولعانى، جۇڭگو - ا ق ش قارىم - قاتىناسى جاقسارادى. بيىل − جۇڭگو مەن ا ق ش - نىڭ ديپلوماتيالىق قارىم - قاتىناس ورناتقانىنىڭ 45 جىلدىعى. جۇڭگو - ا ق ش قارىم - قاتىناسى تاريحى − ەكى ەل حالىقتارىنىڭ دوستىق بارىس - كەلىس تاريحى. بۇل تاريحتى بۇرىن حالىق جازعان، بولاشاقتا دا حالىق جازادى. جۇڭگودا جاقسىلىق ىستەگەن مۇراتقا جەتەر، جاماندىق ىستەگەن ءوزىن قۇرتار دەگەن ءسوز بار. ەكى ەلدىڭ ءار سالا قايراتكەرلەرىنىڭ كوبىرەك بارىس - كەلىس، كوبىرەك اۋىس - كۇيىس جاساپ، ۇزدىكسىز ورتاق تانىم قالىپتاستىرىپ، سەنىمدى ارتتىرىپ، ءتۇرلى كەدەرگىلەردى الاستاپ، ءوزارا ءتيىمدى سەلبەستىكتى تەرەڭدەتىپ، ەكى ەل حالىقتارىنا اناعۇرلىم كوپ ناقتى ىرىس - قۇت جاراتىپ، دۇنيە جۇزىنە اناعۇرلىم كوپ ورنىقتىلىق ۇستەۋىن ءۇمىت ەتەمىن.

　　شي جينپيڭ ا ق ش جاقتىڭ ۋاكىلدەرىنىڭ ءسوزىن مۇقيات تىڭدادى ءارى ولار كوڭىل ءبولىپ وتىرعان ماسەلەلەرگە ءبىر - بىرلەپ جاۋاپ قايتاردى.

　　شي جينپيڭ بىلاي دەپ اتاپ كورسەتتى: جۇڭگو ەكونوميكاسى اقاۋسىز، باياندى بولۋدا. بىلتىر جۇڭگو ەكونوميكاسىنىڭ ارتۋ قارقىنى دۇنيە جۇزىندەگى نەگىزگى ەكونوميكالىق تۇلعالاردىڭ ىشىندە الدىڭعى قاتاردا بولىپ، دۇنيە ءجۇزى ەكونوميكاسىنىڭ ارتۋىنا قوسقان ۇلەسى ۇزدىكسىز %30 تەن استى، مۇنى جۇڭگو حالقى ءوز قولىمەن ىستەدى، سونداي - اق مۇنى حالىقارالىق سەلبەستىكتەن بولە قاراۋعا بولمايدى. جۇڭگونىڭ دامۋى ءتۇرلى قيىنشىلىقتار مەن سىن - سايىستى باستان كەشىرىپ بۇگىنگى كۇنگە جەتتى، بۇرىن ”جۇڭگو كۇيرەيدى نازارياسىندا“ ايتىلعانداي كۇيرەگەن جوق، قازىر دە ”جۇڭگو بيلەپ – توستەيدى نازارياسىندا“ ايتىلعانداي وزگەلەردى بيلەپ - توستەمەيدى. ءبىز ساپالى دامۋدى ۇزدىكسىز ىلگەرىلەتىپ، جۇڭگو ۇلگىسىندەگى وسىزامانداندىرۋدى ۇزدىكسىز جەبەپ، جۇڭگو حالقىن ۇزدىكسىز اناعۇرلىم جاقسى تۇرمىسقا كەنەلتۋمەن بىرگە، دۇنيە ءجۇزىنىڭ باياندى دامۋىنا اناعۇرلىم زور ۇلەس قوسامىز. جۇڭگونىڭ دامۋ بولاشاعى نۇرلى، بىزدە وسىنداي جىگەر جانە سەنىم بار.

　　شي جينپيڭ بىلاي دەپ اتاپ كورسەتتى: مەن رەفورما جاساپ، ەسىك اشۋ − زامانىمىزداعى جۇڭگونىڭ ارشىندى قاداممەن داۋىرمەن جارىسا العا باسۋىنىڭ ماڭىزدى اسىلى، − دەپ تالاي رەت ايتقان ەدىم. جۇڭگونىڭ رەفورماسى توقتامايدى، ەسىك اشۋى توقتامايدى. ءبىز رەفورمانى جاپپاي تەرەڭدەتۋ جونىندە ءبىرقىدىرۋ كەلەلى شارالاردى جوبالاپ جانە اتقارىپ، بازارلانعان، زاڭمەن باسقارىلاتىن، حالىقارالانعان بىرەگەي ساۋدا ورتاسىن ۇزدىكسىز جاراتىپ، ا ق ش كاسىپورىندارىن قامتىعان ءار ەل كاسىپورىندارىنا اناعۇرلىم كەڭ دامۋ اياسىن اشۋعا قۇلشىنۋدامىز. جۇڭگو مەن ا ق ش - نىڭ ەكونوميكا - ساۋدا قارىم - قاتىناسىندا تاياۋ جىلداردان بەرى جارىققا شىققان جاڭا جاعداي، جاڭا وزگەرىستەر جونىندە، ەكى جاق ءوزارا قۇرمەت ەتۋدە، ءوزارا تيىمدىلىك جاساۋدا، تەڭ تۇرعىدا كەڭەسۋدە تاباندى بولىپ، ەكونوميكالىق زاڭدىلىق جانە بازار ەرەجەسى بويىنشا ءىس ىستەپ، ەكونوميكا - ساۋداداعى ءوزارا ءتيىمدى سەلبەستىكتى كەڭەيتىپ جانە تەرەڭدەتىپ، ءبىر - ءبىرىنىڭ دامۋ ۇقىعىنا قۇرمەت ەتىپ، جۇڭگو مەن ا ق ش - نىڭ بىرگە يگىلىككە كەنەلۋىنە جانە دۇنيە ءجۇزىنىڭ بىرگە يگىلىككە كەنەلۋىنە تالپىنۋى كەرەك. ا ق ش كاسىپورىندارىنىڭ ”ءبىر بەلدەۋ، ءبىر جولدى“ بىرگە قۇرۋ، جۇڭگو حالىقارالىق يمپورت كورمەسى سياقتى ءىرى ەكونوميكا - ساۋدا قيمىلدارىنا كوبىرەك قاتىناسۋىن، جۇڭگوعا ۇزدىكسىز قارجى قوسۋىن، جۇڭگوعا تامىر تارتىپ، جۇڭگودا تابىسقا جەتۋىن قارسى الامىز.

　　شي جينپيڭ بىلاي دەپ دارىپتەدى: وسى بىرنەشە جىلدا جۇڭگو مەن ا ق ش قارىم - قاتىناسى كوپتەگەن بۇراڭدىقتاردى باستان كەشىردى، سونداي - اق قاتاڭ سىن - سايىسقا دا تاپ بولدى، بۇدان ساباق الۋ كەرەك. جۇڭگو - ا ق ش قارىم - قاتىناسى وتكەن كۇنگە قايتا ورالمايدى، ءبىراق اناعۇرلىم جاقسى بولاشاققا يە بولا الادى. بىلتىر بايدەن زۇڭتۇڭمەن سان - فرانسيسكودا كەزدەسكەندەگى ەڭ ۇلكەن ورتاق تانىمىمىز جۇڭگو – ا ق ش قارىم - قاتىناسىن ورنىقتىرۋ، جاقسارتۋ بولدى. وتكەن بىرنەشە ايدا ەكى جاقتىڭ ۇيىرمەلەرى بايدەن زۇڭتۇڭ ەكەۋىمىز كەلىسكەن ورتاق تانىمدى توڭىرەكتەي وتىرىپ، ساياسي - ديپلوماتيا، ەكونوميكا - ساۋدا، قازىنا - فينانس، زاڭ اتقارۋ، ەسىرتكىگە تيىم سالۋ، كليمات وزگەرىسى، گۋمانيتارلىق اۋىس - كۇيىس سياقتى سالالاردا تىعىز قارىم - قاتىناستى ساقتاپ، ىلگەرىلەۋشىلىككە قول جەتكىزدى. قازىرگى جاعدايدا جۇڭگو مەن ا ق ش - نىڭ ورتاق مۇددەسى ازايمايدى، قايتا ءتىپتى دە كوبەيەدى. مەيلى ەكونوميكا - ساۋدا، اۋىل شارۋاشىلىعى سياقتى ءداستۇرلى سالالاردا بولسىن، الدە كليمات وزگەرىسى، جاساندى زەردە سياقتى جاڭادان گۇلدەنگەن سالالاردا بولسىن، جۇڭگو مەن ا ق ش ءبىر - ءبىرىنىڭ دامۋىنا دەم بەرۋى، ءبىر - بىرىنە كەدەرگى بولماۋى كەرەك. دۇنيە ءجۇزى ەكونوميكاسىنىڭ قالپىنا كەلۋىن ىلگەرىلەتۋ، حالىقارالىق جانە وڭىرلىك قولامتالى ماسەلەلەردى شەشۋ جۇڭگو مەن ا ق ش - نىڭ سايكەسە سەلبەسۋىن، ءىرى ەلدىك دارقاندىقتى ايگىلەپ، ءىرى ەلدىك جاۋاپكەرلىك ارقالاۋىن قاجەت ەتەدى. ا ق ش جاق جۇڭگومەن ءبىر باعتتا العا باسىپ، دۇرىس ستراتەگيالىق تانىم ورناتىپ، سەزىمتال ماسەلەلەردى ۇيلەسىمدى ءبىر جاقتى ەتىپ، جۇڭگو - ا ق ش قارىم - قاتىناسىنىڭ سۋىنۋىن توقتاتىپ، ورنىقتى بولۋ جاعدايىن ساقتاپ، بەيبىت قاتار تۇرۋ جولىن بەلسەنە قاراستىرىپ، جۇڭگو - ا ق ش قارىم - قاتىناسىنىڭ باياندى، ورنىقتى، اقاۋسىز دامۋىن ىلگەرىلەتۋى كەرەك.

　　ا ق ش - جۇڭگو قارىم - قاتىناسى مەملەكەتتىك كوميتەتى القالار كەڭەسىنىڭ ءتوراعاسى گرينبەرگ، حيشى توبىنىڭ باس القاسى، باس اتقارۋشىسى سۋ شىمين، گاۋتۇڭ سەرىكتەستىگىنىڭ باس القاسى، باس اتقارۋشىسى ەممون، حارۆارد داشۋەسى كەننەدي ۇكىمەت شۋەيۋانىنىڭ نەگىزىن قالاۋشى اليسون، ا ق ش - جۇڭگو ساۋداسى مەملەكەتتىك كوميتەتىنىڭ باستىعى اللەن قاتارلى ا ق ش جاق ۋاكىلدەرى سوزدەرىندە ءتوراعا شي جينپيڭنىڭ ۋاقىت شىعارىپ كەزدەسكەنىنە العىس ايتتى. ولار مىنالاردى ءبىلدىردى: وتكەن ونداعان جىلدان بەرى جۇڭگو ەرەكشە ەكونوميكالىق ارتۋ مەن بۇرىلىس جاساۋدى جۇزەگە اسىرىپ، قۇدىرەتتى سەرپىمدىلىك پەن ومىرشەڭدىك كۇشتى ايگىلەدى. ءتوراعا شي جينپيڭنىڭ ەرەن باسشىلىعىندا، جۇڭگو جاڭا ساپالى وندىرگىش كۇشتەردى دامىتۋعا، اناعۇرلىم باياندى ساپالى دامۋدى جۇزەگە اسىرۋعا كۇش سالۋدا. جۇڭگو حالقىنىڭ دامۋ ۇقىعى قۇرمەتتەلۋگە ءتيىس. جۇڭگونىڭ وزىندىك دامۋ نىساناسىن جۇزەگە اسىرىپ، دۇنيە ءجۇزى ەكونوميكاسىنىڭ دامۋى مەن توعىسۋىن جەبەيتىنىنە سەنەمىز. قۇدىرەتتى، كوركەيگەن جۇڭگو − دۇنيە ءجۇزىنىڭ وڭ ەنەرگياسى. ا ق ش مەن جۇڭگونىڭ ەكونوميكالىق قارىم - قاتىناسى ءبىر - بىرىنە تىعىز سۇيەنەدى، ەكى ەل بەيبىت قاتار تۇرعاندا عانا، وزدەرىنىڭ دامۋىن، كوركەيۋىن جۇزەگە اسىرا الادى. ”سۋسيديس“ تۇزاعىنىڭ ىسكە اسا قويۋى ناعايبىل. ا ق ش كاسىپورىندارى جۇڭگو جاقتىڭ تاياۋدا شىعارعان رەفورما جاساپ، ەسىك اشۋ جونىندەگى ءبىرقىدىرۋ ماڭىزدى شاراسىن القايدى، جۇڭگو ەكونوميكاسىنىڭ دامۋ بولاشاعىنا ۇمىتپەن قارايدى، جۇڭگودا تاباندىلىقپەن تامىر تارتىپ، جۇڭگومەن ۇزاق ۋاقىت تىعىز سەلبەستىك قارىم - قاتىناسىن دامىتادى. ءتوراعا شي جينپيڭ بايدەن زۇڭتۇڭمەن بىلتىر 11 - ايدا سان فرانسيسكودا ءساتتى كەڭەس وتكىزىپ، ا ق ش - نىڭ ءار سالاسى مەن دۇنيە ءجۇزىنىڭ ا ق ش - جۇڭگو قارىم - قاتىناسىنىڭ بولاشاعى جونىندەگى مەجەسى مەن سەنىمىن سەرپىلتتى. ا ق ش - نىڭ ونەركاسىپ - ساۋدا سالاسى مەن ستراتەگيالىق عىلىم سالاسى ا ق ش، جۇڭگو ەكى جاقتىڭ ءار دارەجەلى بارىس - كەلىستى، اۋىس - كۇيىستى كۇشەيتۋىن قولدايدى، ءوزارا ءتۇسىنىسۋدى، سەنىمدىلىكتى جانە سەلبەستىكتى كۇشەيتىپ، دۇنيە جۇزىلىك سىن - سايىسقا قول ۇستاسا توتەپ بەرىپ، ورنىقتى، باياندى، ءونىمدى جۇڭگو - ا ق ش قارىم - قاتىناسىن ورناتۋدى ىلگەرىلەتۋگە كۇش قوسۋدى قالايدى.

　　ۋاڭ ي كەزدەسۋدە بىرگە بولدى.

　　كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved