شي جينپيڭ نيدەرلاندتىڭ باس ۋازىرىمەن كەزدەستى
2024.03.28 16:21 كەلۋ قاينارى : حالىق تورابى
3 - ايدىڭ 27 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا قىزمەت ساپارىمەن كەلگەن نيدەرلاندتىڭ باس ءۋازىرى رۋتتەمەن كەزدەستى. سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن
شينحۋا اگەنتتىگى، 3 - ايدىڭ 27 – كۇنى، بەيجيڭ (ءتىلشى جىڭ ميڭدا). 3 - ايدىڭ 27 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا قىزمەت ساپارىمەن كەلگەن نيدەرلاندتىڭ باس ءۋازىرى رۋتتەمەن كەزدەستى.
شي جينپيڭ بىلاي دەپ اتاپ كورسەتتى: تاياۋ جىلداردان بەرى جۇڭگو - نيدەرلاند قارىم - قاتىناسى ورنىقتى، تەز دامىپ، ەكى ەلدىڭ ءار سالاداعى سەلبەستىگى ۇزدىكسىز تەرەڭدەپ، نيدەرلاند اتى زاتىنا ساي جۇڭگو - ەۆروپا سەلبەستىگىنىڭ ”قاقپاسىنا“ اينالدى. جۇڭگو نيدەرلاندپەن ءار دارەجەلى بارىس - كەلىستى ساقتاپ، تىلدەۋدە، پىكىرلەسۋدە، ءوزارا پايدا جەتكىزىپ، تەڭ يگىلىككە كەنەلۋدە تاباندى بولىپ، جۇڭگو مەن نيدەرلاندتىڭ اشىق، ناقتى جالپى بەتىك سەلبەستىك سەرىكتەستىك قارىم - قاتىناسىنىڭ ۇزدىكسىز دامۋىن ىلگەرىلەتۋدى قالايدى. جۇڭگو جاق نيدەرلاندتان ساپالى تاۋار يمپورتىن كەڭەيتۋدى قالايدى، نيدەرلاند كاسىپورىندارىنىڭ جۇڭگوعا كەلىپ قارجى قوسۋىن قارسى الادى، سونداي - اق نيدەرلاندتىڭ جۇڭگو كاسىپورىندارىنا ءادىل، اشىق تيجارات - ساۋدا ورتاسىن جاراتۋىن ءۇمىت ەتەدى. ەكى جاق اۋىل شارۋاشىلىعى، سۋ يگىلىگى، ەنەرگيا سياقتى ءداستۇرلى سەلبەستىكتى بەلسەنە ىلگەرىلەتۋى، سونىمەن بىرگە، جاساندى زەردە، جاسىل تيپكە بۇرىلىس جاساۋ، قارتتارعا قاتىستى ەكونوميكا سياقتى سالالارداعى سەلبەستىكتىڭ كومەسكى كۇشىن اشۋى كەرەك. ەكى جاقتىڭ ادامداردىڭ بارىس - كەلىسىنە قولايلى اناعۇرلىم كوپ شارالاردى ۇزدىكسىز قولدانىپ، وقۋ - اعارتۋ، مادەنيەت جانە حالىقتىق اۋىس - كۇيىسكە دەم بەرۋىن ءۇمىت ەتەمىن. جۇڭگو نيدەرلاندپەن بىرلەسكەن مەملەكەتتەر ۇيىمى، دۇنيە جۇزىلىك ساۋدا ۇيىمى سياقتى كوپ جاقتى قۇرىلىمدارداعى تىلدەسۋدى، سايكەسۋدى كۇشەيتىپ، كليمات وزگەرىسى، ورگانيزمدەردىڭ الۋان تۇرلىلىگى سياقتى دۇنيە جۇزىلىك سىن - سايىسقا بىرگە توتەپ بەرۋدى قالايدى.
شي جينپيڭ بىلاي دەپ دارىپتەدى: ەكونوميكانىڭ جاھاندانۋى قارسىلىقتارعا ۇشىراۋى مۇمكىن، ءبىراق تاريحتىڭ جالپى اۋقىمى وزگەرمەيدى، ”قول ءۇزۋدىڭ، تىزبەكتى ءۇزۋدىڭ“ شىعار جولى جوق، ەسىك اشۋ، سەلبەسۋ − بىردەن - ءبىر تالعام. جۇڭگو جاق باستان - اياق بىلاي دەپ قارايدى: بىرەۋ جەڭىلىپ، بىرەۋ جەڭەتىن، ءسوزسىز دۇرىس نەمەسە بۇرىس دەيتىن ەكى نەگىزدىك قاراما - قارسى وي جەلىسىنىڭ ۋاقىتى الدەقاشان ءوتتى، ناعىز حاۋىپسىز دۇنيە ءوزارا تەرەڭ توعىسقان، ءبىر - بىرىنە سۇيەنىپ ءومىر سۇرەتىن دۇنيە بولۋعا ءتيىس. عىلىم - تەحنيكا قامالىن قولدان جاساپ، كاسىپ تىزبەگى مەن قامداۋ تىزبەگىن ءبولىپ تاستاۋ بولشەكتەنۋگە جانە قاراما - قارسىلىققا اپارىپ سوعادى. جۇڭگو حالقىنىڭ دا ورىندى دامۋ ۇقىعى بار، ءارقانداي كۇش جۇڭگونىڭ عىلىم - تەحنيكاسىنىڭ دامۋ، العا باسۋ اياق الىسىنا بوگەت بولا المايدى. جۇڭگو باستان - اياق تەڭ يگىلىككە كەنەلۋ تانىمىنان جازباي، جوعارى دەڭگەيدەگى سىرتقا ەسىك اشۋدى ۇزدىكسىز كەڭەيتىپ، ءار جاقپەن دامۋدىڭ پايداسىنان بىرگە يگىلىكتەنەدى. جۇڭگونىڭ ەۆروپاعا قاراتقان ساياساتى ءۇرتىس ورنىقتى بولىپ، ەۆروپانى كوپ ۇيەكتى دۇنيە جۇزىندەگى ماڭىزدى ۇيەك جانە سەلبەستىك سەرىگى دەپ قارايدى. نيدەرلاندتىڭ جۇڭگو مەن ەۆروپانىڭ ءوزارا ءتۇسىنىسۋىن ىلگەرىلەتۋدە، سىندارلى قارىم - قاتىناستى دامىتۋدا ۇزدىكسىز بەلسەندى رول اتقارۋىن ءۇمىت ەتەمىن.
رۋتتە مىنالاردى ءبىلدىردى: 2013 - جىلى مەن باس ءۋازىر رەتىندە جۇڭگوعا تۇڭعىش رەت ساپارلاي كەلدىم، اسىرەسە، 2014 - جىلى ءتوراعا شي جينپيڭمەن بىرگە نيدەرلاند پەن جۇڭگونىڭ اشىق، ناقتى جالپى بەتىك سەلبەستىك سەرىكتەستىك قارىم - قاتىناس ورناتقانىن جاريالاعاننان بەرى، ەكى ەل قارىم - قاتىناسى تاماشا دامۋدى ساقتاپ، ساۋدا سوماسى ەكى ەسەلەنىپ، ەكى جاقتى سەلبەستىكتە وراسان زور كومەسكى كۇش جارىققا شىعىپ، جارقىن بولاشاققا بەتالدى. ”قول ءۇزۋ، تىزبەكتى ءۇزۋ“ نيدەرلاند ۇكىمەتىنىڭ ساياساتتىق تالعامى ەمەس، ويتكەنى جۇڭگونىڭ دامۋ مۇددەسىنە زيان جەتكىزەتىن ءارقانداي ارەكەت وزىنە دە زيان جەتكىزەدى. جۇڭگونىڭ نيدەرلاند ازاماتتارىنا جۇڭگوعا 15 كۇندىك ۆيزاسىز بارۋ مامىلەسىن جاساعانىنا العىس ايتامىن. نيدەرلاند جۇڭگومەن دوستىق قارىم - قاتىناسىن قاستەرلەيدى، جۇڭگومەن سەرىكتەستىك قارىم - قاتىناستى ۇزدىكسىز تەرەڭدەتىپ، ادامداردىڭ بارىس - كەلىسىنە قولايلىلىق جاراتىپ، ەكونوميكا - ساۋدا، كومىر قىشقىل گازىن ىعىستىرۋدى ازايتۋ سياقتى سالالارداعى سەلبەستىكتى كۇشەيتىپ، 20 ەل توبى سياقتى كوپ جاقتى ورىنداردا، سونداي - اق حالىقارالىق، وڭىرلىك قولامتالى ماسەلەلەردە پىكىرلەسۋدى، سايكەسۋدى جيىلەتۋدى قالايدى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
