شي جينپيڭ شريلانكانىڭ زۇڭليى گۋناۆادنەرمەن كەزدەستى
2024.03.28 16:24 كەلۋ قاينارى : حالىق تورابى
3 - ايدىڭ 27 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارلاي كەلگەن شريلانكانىڭ زۇڭليى گۋناۆادنەرمەن كەزدەستى. سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن
شينحۋا اگەنتتىگى، 3 – ايدىڭ 27 – كۇنى، بەيجيڭ (ءتىلشى جىڭميڭدا). 3 - ايدىڭ 27 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارلاي كەلگەن شريلانكانىڭ زۇڭليى گۋناۆادنەرمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن شريلانكانىڭ دوستىعى ارىدان باستاۋ الادى، ەكى ەل حالىقتارى تابيعي جاقىندىق سەزىمگە يە. جۇڭگو – شريلانكا قارىم - قاتىناسىن ويداعىداي بەكەمدەۋ، ويداعىداي دامىتۋ ەكى ەل حالىقتارىنىڭ ءتۇبىرلى مۇددەسى مەن ورتاق تىلەگىنە ۇيلەسەدى. جۇڭگو شريلانكامەن بىرگە ”دەربەس ءوزىن الۋەتتەندىرۋ، ىنتىماقتاسا ءوزارا كومەكتەسۋ“ سىندى «كۇرىش - كاۋچۇك ايىرباس كەلىسىمىنىڭ» رۋحىن ۇزدىكسىز ساۋلەلەندىرىپ، ساياسي سەنىمدىلىكتى بەكەمدەپ، ەل باسقارۋ تاجىريبەلەرىن اۋىستىرۋدى كۇشەيتىپ، ناقتى سەلبەستىكتى كەڭەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، جۇڭگو مەن شريلانكانىڭ شىنايى ءوزارا كومەكتەسەتىن، ۇرپاقتان - ۇرپاققا جالعاسقان دوستىق ستراتەگيالىق سەلبەستىك سەرىكتەستىك قارىم - قاتىناسىن ۇزدىكسىز تەرەڭدەتۋدى قالايدى.
شي جينپيڭ بىلاي دەپ دارىپتەدى: جۇڭگو جاق شريلانكانىڭ مەملەكەتتىڭ يەلىك ۇقىعىن، تاۋەلسىزدىگىن، ۇلتتىڭ ار - نامىسىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن وسىزامانداندىرۋ جولىن قاراستىرۋىن باتىل قولدايدى، شريلانكانىڭ ەكونوميكالىق، قوعامدىق دامۋىنا شاماسىنىڭ كەلىسىنشە ۇزدىكسىز كومەكتەسەدى. ەكى جاق بىرگە قۇلشىنىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ىلگەرىلەتۋ، اسىرەسە، كولومبو پورت قالاسى مەن حانبانتوتا كەشەندى اشۋ نىسانى سىندى 2 ۇلكەن باستاماشى نىساندى ىلگەرىلەتىپ، زات اينالىمى، ەنەرگيا، كاسىپ سالاسى سەلبەستىگىن تەرەڭدەتىپ، سيفرلى ەكونوميكا، جاسىل ەكونوميكا، تازا ەنەرگيا، مادەنيەت ساياحاتى، تەڭىز - مۇحيت ەكونوميكاسى سياقتى سالالارداعى اۋىس - كۇيىس، سەلبەستىكتى كۇشەيتۋى كەرەك. جۇڭگو جاق شريلانكانىڭ ەرەكشە ساپالى ونىمدەرىن يمپورت ەتۋدى ۇزدىكسىز كەڭەيتىپ، جۇڭگو كاسىپورىندارىن شريلانكاعا بارىپ قارجى قوسىپ، شارۋاشىلىقتى گۇلدەندىرۋگە شابىتتاندىرادى، شريلانكانىڭ ءادىل، اشىق تيجارات - ساۋدا ورتاسىن ازىرلەۋىن ءۇمىت ەتەمىن. جۇڭگو شريلانكامەن اۋىل - قىستاقتى كەدەيلىكتەن ارىلتۋ سەلبەستىگىن كۇشەيتىپ، شريلانكانىڭ ەكونوميكانىڭ تيپىن وزگەرتىپ، دارەجەسىن جوعارىلاتۋىنا جانە باياندى دامۋىنا دەم بەرۋدى قالايدى. ەكى جاق بەيبىت قاتار تۇرۋدىڭ بەس پرينسيبىن ساۋلەلەندىرىپ، حالىقارالىق جانە وڭىرلىك ىستەردەگى سەلبەستىكتى كۇشەيتىپ، جۇڭگو مەن شريلانكانىڭ ورتاق مۇددەسى جانە حالىقارالىق ادىلدىك پەن ادىلەتتىلىكتى ويداعىداي قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋى كەرەك.
گۋناۆادنەر مىنالاردى ءبىلدىردى: شريلانكا مەن جۇڭگونىڭ ءداستۇرلى دوستىعى تەرەڭ. شريلانكا ءبىر جۇڭگو پرينسيبىن بۇلجىماي ۇستانادى، سونداي - اق جۇڭگومەن دوستىق سەلبەستىك ساياساتىن ەش ءارى - ءسارى بولماستان باتىل اتقارادى، جۇڭگونى باستان - اياق سىرتقى قارىم - قاتىناستا ماڭداي الدى ورىنعا قويادى. شريلانكا جۇڭگونىڭ قالتىقسىز كومەگىن استە ەستەن شىعارمايدى، شيرلانكا مەن جۇڭگو − قيىن – قىستاۋ ساتتەردى بىرگە وتكەرگەن تاعدىرلاس دوستار. كولومبو پورت قالاسى مەن حانبانتوتا ۋنيۆەرسال اشۋ نىسانى سياقتى نىساندار شريلانكانىڭ ەكونوميكالىق، قوعامدىق دامۋىن بارىنشا سەرپىلتتى ءارى ءوڭىردىڭ جالپى تۇلعالىق دامۋىن پارمەندى جەبەدى. ءتوراعا شي جينپيڭ العا قويعان دۇنيە جۇزىلىك دامۋ باستاماسى، دۇنيە جۇزىلىك حاۋىپسىزدىك باستاماسى، دۇنيە جۇزىلىك وركەنيەت باستاماسى دۇنيە ءجۇزىنىڭ بەيبىتشىلىگى مەن دامۋىنا تىڭ قوزعاۋشى كۇش جانە وڭ ەنەرگيا قوستى، شريلانكا جاق بەلسەنە قولدايدى جانە ات سالىسادى. شريلانكا جاق جۇڭگو جاقپەن بىرگە بەيبىت قاتار تۇرۋدىڭ بەس پرينسيبىن ۇزدىكسىز ساۋلەلەندىرىپ، شريلانكا مەن جۇڭگونىڭ دوستىق قارىم - قاتىناسىن تەرەڭدەتىپ، ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتىپ، ەكونوميكا - ساۋدا، وقۋ - اعارتۋ، ساياحات، كەدەيلىكتەن ارىلتۋ سياقتى سالالارداعى سەلبەستىكتى كەڭەيتىپ، حالىقاراداعى كوپ جاقتى قارىم - قاتىناستى، سەلبەستىكتى جيىلەتىپ، ازيانىڭ تاعدىرلاس ورتاق تۇلعاسىن جانە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
