جۇڭگو ونەركاسىپ - ساۋدا بانكەسى پارتكومىنىڭ بۇرىنعى مۇشەسى، ءتارتىپ تەكسەرۋ كوميتەتىنىڭ شۋجيى ليۋ ليشياننىڭ پارا الۋ دەلوسىنا ءبىرىنشى سوت اشىلدى

شينحۋا اگەنتتىگىنىڭ 9 – ايدىڭ 12 – كۇنى جيناننان بەرگەن حابارى. 9 – ايدىڭ 12 – كۇنى، شاندۇڭ ولكەسى دىجوۋ قالالىق ورتا دارەجەلى حالىق سوت مەكەمەسى جۇڭگو ونەركاسىپ ـ ساۋدا بانكەسى شەكتى جارنا سەرىكتىگى پارتكومىنىڭ بۇرىنعى مۇشەسى، ءتارتىپ تەكسەرۋ كوميتەتىنىڭ شۋجيى ليۋ ليشياننىڭ پارا الۋ دەلوسىن ءبىرىنشى سوتتا اشىق سوت اشىپ قارادى.

شاندۇڭ ولكەسى دىجوۋ قالالىق حالىق پروكۋراتۋراسى ارىز بەرىپ بىلاي دەپ ايىپتادى: 1998 – جىلدان 2022 – جىلعا دەيىن ايىپكەر ليۋ ليشيان ەڭ جوعارى حالىق پروكۋراتۋراسى پروكۋراتۋرا تەحنيكاسى مەكەمەسىنىڭ باستىعى، جۇڭگو حۋارۇڭ مال - مۇلىك باسقارۋ سەرىكتىگى پارتكومىنىڭ مۇشەسى، ءتارتىپ تەكسەرۋ كوميتەتىنىڭ شۋجيى، ورىنباسار باس جوراسى، جۇڭگو ونەركاسىپ - ساۋدا بانكەسى شەكتى جارنا سەرىكتىگى پارتكومىنىڭ مۇشەسى، ءتارتىپ تەكسەرۋ كوميتەتىنىڭ شۋجيى قاتارلى مىندەتىندەگى قولايلىلىقتار جانە قىزمەت ۇقىعى نەمەسە ورنى قالىپتاستىرعان قولايلى جاعدايدان پايدالانىپ، باسقا مەملەكەت قىزمەتكەرلەرىنىڭ مىندەت جاقتاعى ارەكەتى ارقىلى، قاتىستى ورىن جانە جەكەلەردىڭ كاسىپورىن ساۋداسى، دەلولاردى ءبىر جاقتى ەتۋى، مىندەتىن ءوسىرۋ قاتارلى ىستەرىنە كومەك بەرگەن، تىكەلەي نەمەسە باسقالار ارقىلى زاڭسىز قابىلداعان مال - مۇلكى حالىق اقشاسىنا سىندىرعاندا جيىنى 17 ميلليون 760 مىڭ يۋاننان اسقان. پروكۋراتۋرا ورگاندارى پارا الۋ قىلمىسى بويىنشا ليۋ ليشياننىڭ قىلمىستىق ىستەر جاۋاپكەرشىلىگىن قۋزاستىرۋدى ۇسىنىس ەتتى.

پروكۋراتۋرا ورگاندارى قاتىستى دالەل - سىپاتتاردى كورسەتتى، ايىپكەر ليۋ ليشيان جانە ونىڭ اقتاۋشىسى دالەل - سىپات كورسەتتى، شاعىم ايتۋشى مەن اقتاۋشى ەكى جاق سوتتىڭ باسقارۋىندا تولىق پىكىر ايتتى، ليۋ ليشيان سوڭعى ءسوزىن سويلەدى ءارى سوت ۇستىندە قىلمىسىن تانىپ، وكىنەتىندىگىن ءبىلدىردى.

ەڭ سوڭىندا سوت سوتتىڭ ءۇزىلىس جاساعاندىعىن، سوت ۇكىمىن ارتىنان جاريالايتىندىعىن جاريالادى.

حالىق قۇرىلتايى ۋاكىلدەرىنەن، ساياسي كەڭەس مۇشەلەرىنەن، اقپارات تىلشىلەرىنەن جانە ءار سالاداعى بۇقارادان 20 نەشە ادام سوت تەرگەۋىن سىرتتاي تىڭدادى.

كەلۋ قاينارى: حالىق تورابى