شينجياڭ كومانداسى مەملەكەتتىك جەڭىل اتلەتيكا جۇلدەلى جارىسىندا تاريحتاعى ەڭ جاقسى ناتيجەگە قول جەتكىزدى

2024 - جىلعى مەملەكەتتىك جەڭىل اتلەتيكا جۇلدەلى جارىسى 9 – ايدىڭ 13 – كۇنىنەن 16 – كۇنىنە دەيىن جىجياڭ ولكەسىنىڭ چۇيجوۋ قالاسىندا وتكىزىلدى. شينجياڭ جەڭىل اتلەتيكا كومانداسى وسى جارىستاعى تاريحتاعى ەڭ تاماشا ناتيجەنى جاراتىپ، ءبىر التىن مەدال، ءبىر كۇمىس مەدال، ءبىر قولا مەدال الۋداي تاماشا ناتيجەگە قول جەتكىزدى.

جىلىنا ءبىر رەت وتكىزىلەتىن مەملەكەتتىك جەڭىل اتلەتيكا جۇلدەلى جارىسى جۇڭگو جەڭىل اتلەتيكا جارىسىنىڭ ەڭ جوعارى دەڭگەيدەگى جارىسى، بۇل جارىسقا ەل ىشىندەگى ەڭ جوعارى دارەجەلى جەڭىل اتلەتيكا سپورتشىلارى جينالعان، بۇلاردىڭ ىشىندە جاڭا عانا پاريج وليمپياداسىنا قاتىناسقان جۇڭگو جەڭىل اتلەتيكا ساڭىلاقتارى دا بار.

ەرلەر دەسكى جارىسىندا ابدۇعاني تۇرعۇن 60.06 مەترلىك ناتيجەمەن التىن مەدالدى قانجىعالادى، ول جۇلدەگەر بولعان شاندۇڭدىق سپورتشى شيڭ جيادۇڭنان 2.5 مەتر الدا بولدى.

ايەلدەر دەسكى جارىسىندا شيە يۇيچىن 59.52 مەترلىك ناتيجەمەن جۇلدەگەر بولدى، ول اعا جۇلدەگەر بولعان شاندۇڭدىق سپورتشى جياڭ جىچاۋمەن تەك 0.83 مەتر پارىقپەن ارتتا قالدى.

ايەلدەردىڭ بيىككە سەكىرۋ جارىسىندا، دينار نۇرلان 1.87 مەترلىك ناتيجەمەن ءوزىنىڭ ەڭ جاقسى ناتيجەسىمەن تەڭەسىپ، وسى رەتكى جارىستا ءۇشىنشى ورىندى يەلەدى. ايتا كەتۋگە تاتيتىنى، الدىڭعى ءۇش سپورتشىنىڭ ناتيجەسى تۇگەلدەي 1.87 مەتر، دينا تابىسقا جەتۋ مولشەرى تومەن بولعاندىقتان، 3 - ورىندى يەلەدى.

بۇدان سىرت، شينجياڭ ەرلەر شويىن دوپ سپورتشىسى چىن جيان 19.03 مەترلىك ناتيجەمەن ءتورتىنشى بولدى. ەرلەردىڭ 3000 مەترلىك كەدەرگىدەن ءوتۋ جارىسىندا شينجياڭدىق سپورتىشى ءىلياس ابدىراحمان 8 مينۋت 47 سەكۋند 45 تاقىلدىق ناتيجەمەن بەسىنشى بولىپ، ءوزىنىڭ ەڭ جاقسى ناتيجەسىن جاراتتى. شينجياڭنىڭ الىسقا سەكىرۋ سپورتشىسى ۋاڭ يۇيفىڭ 7.69 مەترلىك ناتيجەمەن 8 - بولدى، بۇل شينجياڭ ۇزاققا سەكىرۋ سپورتشىلارىنىڭ تۇڭعىش رەت مەملەكەتتىك جەڭىل اتلەتيكا جۇلدەلى جارىسىندا 8 مىقتىنىڭ قاتارىنان ورىن الۋى.

بيىل ازيا جاستار جەڭىل اتلەتيكا لوڭقاسىنا تالاسۋ جارىسى جانە دۇنيە ٴجۇزى جاستار جەڭىل اتلەتيكا جارىسىنان دا مەدالعا يە بولعان ءالي ءاشىر ءومار جارالانعاندىقتان جارىسقا قاتىناسپادى. ول مەملەكەتتىك ەرلەردىڭ 200 مەتر جانە 400 مەترگە جۇگىرۋ جارىسىنان دا مىقتى باسەكە كۇشىنە يە.

كەلۋ قاينارى: حالىق تورابى