«ىزدەنۋ» جۋرنالى باس شۋجي شي جينپيڭنىڭ ماڭىزدى ماقالاسىن جاريالايدى

شينحۋا اگەنتتىگى، 10 - ايدىڭ 31 - كۇنى، بەيجيڭ. 11 - ايدىڭ 1 - كۇنى باسپادان شىعاتىن «ىزدەنۋ» جۋرنالىنىڭ 21 - سانىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭنىڭ «جوعارى ساپالى، تولىق جۇمىستانۋدى جەبەيىك» اتتى ماڭىزدى ماقالاسى جاريالانادى.

ماقالادا بىلاي دەپ اتاپ كورسەتىلدى: جۇمىستاندىرۋ − ەڭ نەگىزگى حالىق تۇرمىسى، حالىق بۇقاراسىنىڭ ءتول مۇددەسىنە، ەكونوميكانىڭ، قوعامنىڭ اقاۋسىز دامۋىنا، مەملەكەتتىڭ باياندى تىنىشتىعىنا سايادى، پارتيامىز بۇعان ەجەلدەن بەرى ايرىقشا ءمان بەرىپ كەلەدى. پارتيا 18 - قۇرىلتايىنان بەرى ءبىز جاڭا داۋىردەگى جۇمىستاندىرۋ قىزمەتىنىڭ زاڭدىلىعى جونىندەگى تانىمدى ۇزدىكسىز تەرەڭدەتىپ، كوپتەگەن تاجىريبەلەر توپتادىق، باستىسى، مىنالاردى قامتيدى: پارتيانىڭ جۇمىستاندىرۋ قىزمەتىنە جاپپاي باسشىلىعىنا تاباندى بولۋ، جۇمىستاندىرۋدى حالىق تۇرمىسىنىڭ نەگىزى ەتۋگە تاباندى بولۋ، جۇمىستاندىرۋدى الدىمەن ويلاستىرۋ ستراتەگياسىن اتقارۋعا تاباندى بولۋ، دامۋعا سۇيەنىپ جۇمىستاندىرۋدى جەبەۋگە تاباندى بولۋ، جۇمىستاندىرۋ قامتىمىن كەڭەيتۋ مەن جۇمىستاندىرۋ ساپاسىن جوعارىلاتۋدى ءوزارا ۇشتاستىرۋعا تاباندى بولۋ، ءتۇيىندى قاۋىمنىڭ جۇمىستانۋىن كورنەكتى تۇردە ويداعىداي يگەرۋگە تاباندى بولۋ، يگىلىك جاراتۋ ارقىلى جۇمىستانۋدى جەتەكتەۋگە تاباندى بولۋ، ءادىل جۇمىستانۋ ورتاسىن قالىپتاستىرۋعا تاباندى بولۋ، جاراسىمدى ەڭبەك قاتىناسىن ورناتۋعا تاباندى بولۋ، ت.ب. بۇل تاجىريبەلەر توتەنشە باعالى، وعان ۇزاق ۋاقىت تاباندى بولۋ جانە ونى ۇزدىكسىز بايىتۋ، دامىتۋ كەرەك.

ماقالادا مىنالار باسا دارىپتەلدى: جوعارى ساپالى، تولىق جۇمىستانۋدى جەبەۋ − جاڭا ءداۋىردىڭ جاڭا جورىعىنداعى جۇمىستاندىرۋ قىزمەتىنىڭ جاڭا ورنى، جاڭا بورىشى. حالىقتى وزەك ەتكەن دامۋ يدەياسىنا تاباندى بولىپ، ەڭبەكشىلەر دەربەس جۇمىستانۋ، بازار ارقىلى جۇمىستانۋدى رەتتەۋ، ۇكىمەت جۇمىستانۋدى جەبەۋ جانە يگىلىك جاراتۋعا شابىتتاندىرۋ باعىتىن جاپپاي دايەكتىلەندىرىپ، جۇمىستانۋ ساپاسىنىڭ ءونىمدى جوعارىلاۋى مەن مولشەرىنىڭ ۇيلەسىمدى ارتۋىن ۇزدىكسىز جەبەپ، قالىڭ ەڭبەكشىلەردىڭ تابىس سەزىمىن، باقىت سەزىمىن، حاۋىپسىزدىك سەزىمىن ۇزدىكسىز كۇشەيتىپ، جۇڭگو ۇلگىسىندەگى وسىزامانداندىرۋ ارقىلى قۇدىرەتتى ەل قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋگە پارمەندى تىرەك ازىرلەۋ كەرەك.

ماقالادا بىلاي دەپ اتاپ كورسەتىلدى: جۇمىستانۋدى الدىمەن ويلاسۋعا باستان - اياق تاباندى بولۋ كەرەك. جاڭا دامۋ ۇستانىمىن بۇلجىتپاي دايەكتىلەندىرىپ، جوعارى ساپالى، تولىق جۇمىستانۋدى ەكونوميكالىق، قوعامدىق دامۋدىڭ ماڭداي الدى نىساناسى ەتىپ، جوعارى ساپالى دامۋ بارىسىن جۇمىستانۋدىڭ ساپاسىن جوعارىلاتىپ، سيىمدىلىعىن ارتتىرۋ بارىسىنا اينالدىرىپ، جۇمىستانۋدى دامىتۋدىڭ قوزعاۋشى كۇشىن جوعارىلاتۋ كەرەك. جۇمىستانۋداعى قۇرىلىمدىق قايشىلىقتى كۇش سالا شەشۋ كەرەك. ادام كۇشى بايلىعىمەن قامداۋ مەن قاجەتسىنۋدىڭ سايكەسپەۋى _ قازىر ەلىمىزدىڭ جۇمىستانۋ سالاسى ءدوپ كەلىپ وتىرعان باستى قايشىلىق. بۇل قايشىلىقتى شەشۋدىڭ تەتىگى ساپاسى جاقسى، جالپى مولشەرى مول، قۇرىلىمى ساپالى، ورنالاسۋى ۇيلەسىمدى وسىزاماندانعان ادام كۇشى بايلىعىن جەدەل قالىپتاستىرۋدا. ءتۇيىندى قاۋىمنىڭ جۇمىستانۋىن قولداۋ ساياساتىن كەمەلدەندىرۋ كەرەك. جوعارى مەكتەپ بىتىرگەن وقۋشىلار سياقتى جاستار قاۋىمىن جۇمىستاندىرۋدى ەڭ ماڭىزدى ورىنعا قويۋعا تاباندى بولىپ، كوپ ءتۇرلى شارانى قاتار قولدانىپ، شارۋا جۇمىسكەرلەردىڭ جۇمىستانۋىن جەبەپ، كەدەيلىكتەن ارىلعانداردىڭ جۇمىس كولەمى مەن جۇمىس كىرىسىن ورنىقتىرىپ، جاسى ۇلعايعاندار، مۇگەدەكتەر، ءبىرشاما ۇزاق ۋاقىت جۇمىسسىز قالعاندار قاتارلى جۇمىستانۋى قيىن قاۋىمعا كومەكتەسۋ - سۇيەمەلدەۋدى كۇشەيتىپ، قوسىننان شەگىنگەن اسكەريلەر، ايەلدەر قاتارلى قاۋىمدى جۇمىستاندىرۋ قىزمەتىن ويداعىداي ىستەۋ كەرەك. جۇمىستاندىرۋ ءتۇزىلىس، مەحانيزمى رەفورماسىن تەرەڭدەتۋ كەرەك. بازاردىڭ ادام كۇشى بايلىعىن ورنالاستىرۋداعى شەشۋشى رولىن تولىق ساۋلەلەندىرىپ، ۇكىمەتتىڭ رولىن اناعۇرلىم ويداعىداي ساۋلەلەندىرىپ، جۇمىستانۋ ساپاسىن جوعارىلاتۋعا تۇساۋ بولاتىن، جۇمىستانۋ سيىمدىلىعىن كەڭەيتەتىن، جۇمىستانۋ قۇرىلىمىن ساپالىلاندىرۋداعى بوگەت ماسەلەسىن كۇش سالا شەشۋ كەرەك. ەڭبەكشىلەردىڭ ۇقىق - مۇددەسىن قامتاماسىز ەتۋدى كۇشەيتۋ كەرەك. ەڭبەك زاڭىن، زاڭ - ەرەجەلەرىن اقاۋسىزداندىرىپ، قوعامدىق قامتاماسىزداندىرۋ جۇيەسىن كەمەلدەندىرىپ، ەڭبەكشىلەردىڭ زاڭدى ۇقىق - مۇددەسىن قورعاپ، يكەمدى جۇمىستانۋ مەن جاڭا جۇمىستانۋ فورماتسياسىنداعى ەڭبەكشىلەردىڭ ۇقىق - مۇددەسىن قامتاماسىزداندىرۋدى كۇشەيتىپ، جۇمىستانۋداعى كەمسىتۋ، ەڭبەكاقىعا قارىزدار بولۋ، زاڭعا قايشى ادام قىسقارتۋ سياقتى بىلىقپالىقتاردى ءونىمدى جونگە سالۋ كەرەك.

ماقالادا بىلاي دەپ اتاپ كورسەتىلدى: جۇمىستانۋ _ وتباسى ءىسى، ونان دا ماڭىزدىسى، مەملەكەت ءىسى. ءار دارەجەلى پارتكومدار مەن ۇكىمەتتەر جۇمىستانۋدى حالىق تۇرمىسىنداعى ماڭداي الدى ءىرى ءىس رەتىندە يگەرىپ، ۇيىمدىق باسشىلىقتى كۇشەيتىپ، ءتۇزىم مەحانيزمىن اقاۋسىزداندىرىپ، قىزمەتتىڭ بىرىككەن كۇشىن ارتتىرۋى كەرەك. جۇڭگونىڭ جۇمىستانۋ نازارياسى جۇيەسىن جەدەل ورناتىپ، جۇڭگونىڭ جۇمىستانۋ حيكاياسىن بەلسەنە جاقسى بايانداپ، ەلىمىزدىڭ جۇمىستانۋ سالاسىنداعى حالىقارالىق سويلەۋ ۇقىعى مەن ىقپالىن ءونىمدى جوعارىلاتۋ كەرەك.

كەلۋ قاينارى: حالىق تورابى