حان جىڭ زامبيا حالىقتىق پارلامەنتىنىڭ باستىعى مۋتيمەن، بىرلەسكەن مەملەكەتتەر ۇيىمى 79 - كەزەكتى جينالىسىنىڭ ءتوراعاسى فيلەمونمەن جەكە - جەكە كەزدەستى

شينحۋا اگەنتتىگى، 10 - ايدىڭ 31 - كۇنى، بەيجيڭ. مەملەكەت ءتوراعاسىنىڭ ورىنباسارى حان جىڭ 10 - ايدىڭ 31 - كۇنى بەيجيڭدە زامبيا حالىقتىق پارلامەنتىنىڭ باستىعى مۋتيمەن، بىرلەسكەن مەملەكەتتەر ۇيىمى 79 - كەزەكتى جينالىسىنىڭ ءتوراعاسى فيلەمونمەن جەكە - جەكە كەزدەستى.

مۋتيمەن كەزدەسكەندە حان جىڭ مىنالاردى ءبىلدىردى: تاياۋ جىلداردان بەرى ءتوراعا شي جينپيڭ مەن حيچيلەما زۇڭتۇڭنىڭ ستراتەگيالىق جەتەكشىلىگىندە جۇڭگو مەن زامبيانىڭ ساياسي سەنىمدىلىگى ۇزدىكسىز تەرەڭدەپ، ناقتى سەلبەستىكتە قوماقتى تابىستارعا قول جەتتى. الدىڭعى كۇنى ەكى ەلدىڭ مەملەكەت باسشىلارى ءوزارا قۇتتىقتاۋ تەلەگرامماسىن جولداپ، جۇڭگو مەن زامبيانىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىن قۇتتىقتادى. جۇڭگو جاق زامبيا جاقپەن بىرگە، ەكى ەل مەملەكەت باسشىلارىنىڭ ماڭىزدى ورتاق تانىمىن جەتەكشى ەتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى تاباندىلىقپەن قولداپ، جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار ءماجىلىسىنىڭ جەتىستىكتەرىن ويداعىداي تياناقتاندىرىپ، ساۋدا، قارجى قوسۋ، نەگىزدىك قۇرىلعى قۇرىلىسى، ەمدەۋ - دەنساۋلىق ساقتاۋ سياقتى سالالاردا سەلبەستىك دەڭگەيىن جوعارىلاتىپ، ءوزارا ءتۇسىنىسۋدى، جاقىنداسۋدى كۇشەيتىپ، اناعۇرلىم تىعىز جۇڭگو - زامبيا تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

مۋتي مىنانى ءبىلدىردى: بيىل _ زامبيا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعى، ەكى ەلدىڭ دوستىعى قۋاتتى دا پارمەندى بولۋدا. زامبيا ءبىر جۇڭگو پرينسيبىنە تاباندى بولادى، جۇڭگو جاقتىڭ ۇزاق ۋاقىتتان بەرى زامبيا جاققا كورسەتكەن قاستەرلى قولداۋىنا العىس ايتادى، زامبيا مەن جۇڭگونىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ اناعۇرلىم زور دامۋعا قول جەتكىزۋىن ۇزدىكسىز ىلگەرىلەتۋدى قالايمىز.

فيلەمونمەن كەزدەسكەندە حان جىڭ مىنانى ءبىلدىردى: جۇڭگو _ بىرلەسكەن مەملەكەتتەر ۇيىمى ىستەرىنىڭ تاباندى قولداۋشىسى جانە بەلسەندى ۇلەس قوسۋشىسى. بىرلەسكەن مەملەكەتتەر ۇيىمى _ كوپ جاقتىلىقتىڭ تۋى. ءتوراعا شي جينپيڭ بىرلەسكەن مەملەكەتتەر ۇيىمىنىڭ رولىن السىرەتۋگە بولمايدى، تەك قانا كۇشەيتۋ كەرەك دەپ تالاي رەت باسا دارىپتەدى. كەلەر جىل _ بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو جاق بىرلەسكەن مەملەكەتتەر ۇيىمىنىڭ حالىقارالىق ىستەردەگى ۇيىتقىلىق رولىن قولدايدى، ادىلدىككە، تۋراشىلدىققا تاباندى بولىپ، بەيبىتشىلىكتى، حاۋىپسىزدىكتى قورعاۋدى؛ جالپىعا ءتيىمدى، سيىسىمدى بولۋعا تاباندى بولىپ، بىرگە دامۋدى جەبەۋدى؛ كوپ جاقتىلىققا تاباندى بولىپ، عالامدىق باسقارۋدى كەمەلدەندىرۋدى دارىپتەيدى. جۇڭگو بىرلەسكەن مەملەكەتتەر ۇيىمىنىڭ بەدەلى مەن ورنىن باستان - اياق باتىل قورعاپ، عالامدىق باسقارۋ رەفورماسى مەن قۇرىلىسىنا بەلسەنە ات سالىسىپ، عالامدىق باسقارۋ جۇيەسىنىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتەدى.

فيلەمون مىنانى ءبىلدىردى: جۇڭگو _ بىرلەسكەن مەملەكەتتەر ۇيىمىنىڭ تۋىن بيىك كوتەرگەن نەگىزگى ءىرى ەل. بىرلەسكەن مەملەكەتتەر ۇيىمى بىرلەسكەن مەملەكەتتەر ۇيىمى جينالىسىنىڭ 2758 - ءنومىرلى قاۋلىسىنا بويسۇنىپ، ءبىر جۇڭگو پرينسيبىنە تاباندى بولادى. بىرلەسكەن مەملەكەتتەر ۇيىمى جۇڭگومەن سەلبەستىكتى كۇشەيتىپ، حالىقارا بەيبىتشىلىكتى قورعاۋ، بىرگە دامۋدى ىلگەرىلەتۋ ءۇشىن ءتىپتى دە زور ۇلەس قوسۋدى قالايدى.

كەلۋ قاينارى: حالىق تورابى