زوۋ جياحۋا جولداستىڭ سۇيەگى بەيجيڭدە ورتەلدى

2 – ايدىڭ 20 – كۇنى زوۋ جياحۋا جولداستىڭ سۇيەگى بەيجيڭدەگى باباۋشان توڭكەرىستىك قۇرباندار قابىرستانىندا ورتەلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار باباۋشانعا بارىپ سۇيەكپەن قوشتاستى. سۋرەتتە: شي جينپيڭ زوۋ جياحۋانىڭ تۋىس - تۋعانىمەن قول الىسىپ، ولارعا شىنايى كوڭىل ايتۋدا.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگى، 2 – ايدىڭ 20 – كۇنى، بەيجيڭ. جۇڭگو كوممۋنيستىك پارتياسىنىڭ تاڭداۋلى مۇشەسى، ۇزاق سىننان وتكەن ادال كوممۋنيزم جاۋىنگەرى، پرولەتاريات توڭكەرىسشىسى، ەلىمىزدىڭ ەكونوميكالىق قۇرىلىس شەبىندەگى، مەملەكەت قورعانىسى ونەركاسىپ شەبى جانە سوتسياليستىك زاڭ - ءتۇزىم قۇرىلىسىنداعى كورنەكتى باسشى، جۇڭگو كوممۋنيستىك پارتياسى 14 - كەزەكتى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ بۇرىنعى ورىنباسارى، 9 - كەزەكتى مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارى زوۋ جياحۋا جولداستىڭ سۇيەگى 2 - ايدىڭ 20 - كۇنى بەيجيڭدەگى باباۋشان توڭكەرىستىك قۇرباندار قابىرستانىندا ورتەلدى.

زوۋ جياحۋا جولداس ناۋقاس سەبەبىنەن 2025 - جىلى 2 - ايدىڭ 16 - كۇنى ساعات 23 تەن 42 مينۋت وتكەندە بەيجيڭدە 99 جاسىندا قايتىس بولدى.

زوۋ جياحۋا جولداستىڭ ناۋقاسى اۋىرلاعان كەزدە جانە قايتىس بولعاننان كەيىن شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ءتۇرلى فورمالارمەن زوۋ جياحۋا جولداستىڭ قايتىس بولعاندىعىنا قايعىلى ازا ءبىلدىردى ءارى ونىڭ تۋىس - تۋعاندارىنا شىنايى كوڭىل ايتتى.

2 - ايدىڭ 20 - كۇنى تۇستەن بۇرىن باباۋشان توڭكەرىستىك قۇرباندار قابىرستانىنىڭ زالى قارالى بەينەگە ەنىپ، زالدا قايعىلى مۋزىكا ەستىلىپ تۇردى. ورتالىق زالدىڭ تورىنە ”زوۋ جياحۋا جولداسقا قايعىلى ازا بىلدىرەمىز“ دەگەن اق ءتۇستى جازۋ جازىلعان قارا كەرمە تۋ ىلىنگەن، كەرمە تۋدىڭ استىنا زوۋ جياحۋا جولداستىڭ سۋرەتى قويىلعان. زوۋ جياحۋا جولداستىڭ سۇيەگى گۇل شوقتارىمەن جانە ارشالارمەن قورشالىپ، ۇستىنە جۇڭگو كوممۋنيستىك پارتياسىنىڭ نارت قىزىل پارتيا تۋى جابىلعان.

تۇستەن بۇرىن ساعات 9 دان 30 مينۋت وتكەن مولشەردە شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار ازالى مۋزىكا ءۇنى ىشىندە زوۋ جياحۋا جولداستىڭ سۇيەگىنىڭ الدىنا باياۋ بارىپ، اسا قايعىلى بەينەدە ءۇنسىز ازا ءبىلدىرىپ، زوۋ جياحۋا جولداستىڭ سۇيەگىنە 3 مارتە تاعزىم ەتتى ءارى زوۋ جياحۋا جولداستىڭ تۋىس - تۋعاندارىمەن ءبىر - بىردەن قول الىسىپ، كوڭىل ايتتى.

پارتيا مەن مەملەكەتتىڭ قاتىستى باسشى جولداستارى سۇيەكپەن قوشتاسۋعا باردى نەمەسە ءتۇرلى تاسىلدەرمەن ازا ءبىلدىردى. ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، زوۋ جياحۋا جولداستىڭ كوزى تىرىسىندەگى دوستارى مەن اۋىلداستارىنىڭ ۋاكىلدەرى دە سۇيەكپەن قوشتاستى.

كەلۋ قاينارى: حالىق تورابى