ورتا، ۇزاق مەرزىمدىك جوبا ارقىلى ەكونوميكالىق، قوعامدىق دامۋعا جەتەكشىلىك ەتۋ — پارتيامىزدىڭ ەل باسقارۋداعى ٴبىر ماڭىزدى ٴتاسىلى

شينحۋا اگەنتتىگىنىڭ 6 ـ ايدىڭ 15 ـ كۇنى بەيجيڭنەن بەرگەن حابارى. 6 ـ ايدىڭ 16 ـ كۇنى باسپادان شىعاتىن «ىزدەنۋ» جۋرنالىنىڭ 12 ـ سانى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭنىڭ «ورتا، ۇزاق مەرزىمدىك جوبا ارقىلى ەكونوميكالىق، قوعامدىق دامۋعا جەتەكشىلىك ەتۋ پارتيامىزدىڭ ەل باسقارۋداعى ٴبىر ماڭىزدى ٴتاسىلى» اتتى ماڭىزدى ماقالاسىن جاريالايدى. بۇل باس شۋجي شي جينپيڭنىڭ 2015 ـ جىلى 10 ـ ايدان 2025 ـ جىلى 4 ـ ايعا دەيىنگى ارالىقتاعى قاتىستى ماڭىزدى بايىمداۋلارىنىڭ ٴۇزىندىسى.

ماقالادا بىلاي دەپ باسا دارىپتەلدى: 5 جىلدىق جوبانى عىلمي جاساۋ جانە ونى ۇزدىكسىز اتقارۋ — پارتيامىزدىڭ ەل باسقارۋداعى ماڭىزدى تاجىريبەسى ٴارى جۇڭگوشا سوتسياليزمنىڭ ماڭىزدى ساياسي ارتىقشىلىعى. جاڭا جۇڭگو قۇرىلىپ كوپ وتپەي، پارتيامىز سوتسياليستىك وسىزاماندانعان مەملەكەت قۇرۋ نىساناسىن العا قويدى. 1 ـ بەسجىلدىق جوسپاردان 14 ـ بەسجىلدىق جوباعا دەيىن باستان ـ اياق ساباقتاسقان نەگىزگى تاقىرىپ — ەلىمىزدى سوتسياليستىك وسىزاماندانعان مەملەكەت ەتىپ قۇرىپ شىعۋ. وسى بارىستا پارتيامىز سوتسياليستىك وسىزاماندانعان مەملەكەت قۇرۋ جونىندەگى تانىمىن ۇزدىكسىز تەرەڭدەتىپ، ستراتەگيالىق جاقتا ۇزدىكسىز تولىسىپ، اماليات جاعىندا ۇزدىكسىز كەمەلدەنىپ، ەلىمىزدىڭ وسىزاماندانىپ دامۋ اياق الىسىن جەدەلدەتتى.

ماقالادا بىلاي دەپ اتاپ كورسەتىلدى: پارتيا 20 ـ قۇرىلتايىنىڭ بايانداماسىندا جۇڭگو ۇلگىسىندەگى وسىزامانداندىرۋدىڭ جۇڭگوشا ەرەكشەلىگى، ماندىك تالابى جانە كەلەلى پرينسيبى تەرەڭدەي بايىمدالدى، بۇل جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ ەڭ جوعارى دەڭگەيدە جوبالانۋى. جۇڭگو ۇلگىسىندەگى وسىزامانداندىرۋ كەزەڭگە ٴبولىنىپ، سالاعا ٴبولىنىپ ىلگەرىلەتىلەدى، ٴارقايسى كەزەڭدەگى دامۋ نىساناسىن جۇزەگە اسىرۋ، ٴار سالانىڭ دامۋ ستراتەگياسىن تياناقتاندىرۋ بىردەي جوعارى دەڭگەيدە جوبالاۋدى قاجەت ەتەدى. دۇنيە ٴجۇزىنىڭ دامۋ اۋقىمىنا تەرەڭدەي كوز جەتكىزىپ، حالىق بۇقاراسىنىڭ ورتاق تىلەگىن دۇرىس يگەرىپ، ەكونوميكالىق، قوعامدىق دامۋ زاڭدىلىعى جونىندە ىشكەرىلەي ىزدەنىس جاساپ، بەلگىلەنگەن جوبالار مەن ساياسات جۇيەسىندە ٴداۋىر ەرەكشەلىگىن ايگىلەپ، زاڭدىلىقتى يگەرىپ، جاسامپازدىقتى بايىتىپ، الىس پەن جاقىندى ۇشتاستىرۋدى، جوعارى مەن تومەندى تۇتاستىرۋدى، مازمۇندى سايكەستىرۋدى ورىنداۋ كەرەك.

ماقالادا بىلاي دەپ اتاپ كورسەتىلدى: حالىقتىڭ تاماشا تۇرمىس تالپىنىسى — ٴبىزدىڭ كۇرەس نىسانامىز، حالىقتىڭ سەنىمى مەن قولداۋى — مەملەكەتىمىزدىڭ ەكپىندەي ىلگەرىلەۋدەگى كۇشى. تاماشا باعىت ـ ساياساتتىڭ جانە دامۋ جوباسىنىڭ بارلىعى حالىقتىڭ تىلەگىنە سايكەسۋى، حالىقتىڭ ارمان ـ تىلەگىنە باپ كەلۋى، بۇقارادان الىنىپ، بۇقاراعا قايتارىلۋى كەرەك. بەسجىلدىق جوبانى جاساۋ ەكونوميكالىق، قوعامدىق دامۋدىڭ بارلىق جاقتارىنا سايادى، حالىق بۇقاراسىنىڭ وندىرىسىمەن، تۇرمىسىمەن تىعىز بايلانىستى، جوعارى دەڭگەيدە جوبالاۋدى كۇشەيتۋ مەن حالىقتان كەڭەس الۋعا تاباندى بولۋدى بىرلىككە كەلتىرىپ، قوعامنىڭ ارمان ـ تىلەگىن، بۇقارانىڭ اقىل ـ پاراساتىن، مامانداردىڭ پىكىرىن، نەگىزگى ساتىنىڭ تاجىريبەسىن جوبا جاساۋعا تولىق قابىلداۋدى قاجەت ەتەدى.

ماقالادا بىلاي دەپ باسا دارىپتەلدى: ”15 ـ بەسجىلدىق“ كەزىندەگى ەكونوميكالىق، قوعامدىق دامۋدى جوبالاۋدا، ٴسوز جوق، ”15 ـ بەسجىلدىق“ كەزىندەگى كەزەڭدىك تالاپتى دالمە ـ ٴدال يگەرىپ، مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن كوزدەپ، سوتسياليستىك وسىزامانداندىرۋ نىساناسىن نەگىزىنەن جۇزەگە اسىرۋدى مىقتاپ ارقاۋ ەتىپ، سالا ـ سالا بويىنشا نىسانانى، مىندەتتى لايىقتى بەلگىلەپ، وي جەلىسىن، شارالاردى ورتاعا قويۋ كەرەك. ٴار جاقتاعى نىساناعا، مىندەتكە ىشكەرىلەي تالداۋ جاساپ جانە ونى دالەلدەپ، عىلمي، دالمە ـ ٴدال بولۋىنا، دەر كەزىندە جۇزەگە اسۋىنا شىنايى كەپىلدىك ەتۋ كەرەك. ٴبىر تۇتاس جوسپارلاپ، ٴتۇيىندى، شەشۋشى فاكتورلاردى مەڭگەرىپ، ريتىم مەن اياق الىستى ويداعىداي يگەرىپ، باسىمدىقتى بەكەمدەۋگە، كەڭەيتۋگە، كەدەرگىلەردى، بوگەتتى تۇيىندەردى تالقانداۋعا، ولقىلىقتاردى، ٴالسىز تۇستاردى تولىقتاۋعا، كۇشەيتۋگە، ساپانى، ونىمدىلىكتى جوعارىلاتۋعا ٴمان بەرىپ، جالپى تۇلعالىق نىسانا مەن بەتالىستىڭ بىردەيلىگىن ساقتاۋ كەرەك. جەر ـ جەر ٴوز ٴوڭىرىنىڭ جوباسىن جاساعاندا ٴىس جۇزىندىكپەن ۇشتاستىرۋى، شىندىقتى ٴىس جۇزىنەن ىزدەۋى، جوبانىڭ اتقارىلۋ قۋاتى مەن تياناقتاندىرىلۋ قۋاتىن جوعارىلاتۋى كەرەك.