ون بەس جىل ونەر ۇيرەنىپ، اۋىلىنا قايتىپ تىڭ جۇمىس باستاپ، اۋىلداستارىن اۋقاتتانۋ جولىنا باستادى 

شينجياڭ قۇلجا اۋدانى اۋليە اۋىلى بولەكەي قىستاعىنىڭ تۇرعىنى مىقتىبەك ءران ۇلى كوپ جىل بويى سىرت جەردە جۇمىس ىستەۋ بارىسىندا ونەرىن جەتىلدىرىپ تاجىريبە جيناعان سوڭ، اۋىلىنا قايتىپ توسەنىش زاۆودىن اشىپ، قىستاق تۇرعىندارىن جۇمىستانۋعا، كىرىسىن ارتتىرۋعا جەتەلەپ، اۋىل – قىستاقتى گۇلدەندىرۋ جولىندا ۇلگى كورسەتتى.

2007 – جىلى 10 – ايدا مىقتىبەك ءران ۇلى قۇلجا قالاسىنداعى توسەنىش جاسايتىن زاۆودتا جۇمىس ىستەپ، سەحتاعى جۇمىسشىدان وندىرىسكە جاۋاپتى قىزمەتكەرگە اينالىپ، سەرىپپە توقۋ، جىلۋ مەن قىسىمنان پايدالانىپ بۇلتتى نىعىزداۋدان تارتىپ، كەزدەمەلەردى ولشەپ قيۋعا دەيىنگى تۇتاس بارىسقا قاجەتتى ونەردى جۇيەلى يگەردى.

مىقتىبەك ءران ۇلى: ”توسەنىش جاساۋ بارىسىندا سەرىپپەنى تىزبەكتەۋ ماشيناسىنان پايدالانۋ ەڭ ماڭىزدى، سەرىپپە جاسايتىن بولات سىمدى وراۋ ارقىلى سيليندر فورماسىنا كەلتىرگەن سوڭ، سەرىپپە توسەنىشتىڭ استىڭعى جاعىمەن – ۇستىڭگى جاعىن جالعاستىرامىز، وسىلايشا سەرىپپە توسەنىش رەت – رەتىمەن ءتارتىپتى ءتىزىلىپ، ءبىر تۇتاس تۇلعا قالىپتاستىرىپ، سەرپىمدىلىگىنىڭ ويداعىداي بولۋىنا، جايلى بولۋىنا كەپىلدىك ەتۋگە بولادى. العاش رەت ۇيرەنگەن كەزدە قولىمنىڭ ەبى كەلمەي، بىرنەشە كۇن بويى ءساتتى وتكىزە الماي ءجۇردىم، مۇندايدا بولات سىم قولدى وڭاي جارالاپ كەتەدى، بۇل تەحنيكانى ءبىر جىل ۇيرەنگەن سوڭ عانا جەتىك يگەرە باستادىم، ونان سوڭ ءبىر جىل ۋاقىت جۇمساپ، سەرىپپە تىزبەكتەۋ ماشيناسىن قالاي جوندەۋدى ۇيرەندىم، وسىلايشا جالعىز ءوزىم تۇتاس ماشينانى مەڭگەرە الاتىن بولدىم“ دەيدى.

2023 – جىلى مىقتىبەك ءران ۇلى ساياحات بازارىندا توسەنىشكە دەگەن قاجەتسىنۋدىڭ كۇرت ارتقانى سىندى ورايدى مىقتى يگەرىپ، ءوزىم زاۆود اشسام دەگەن ويعا كەلەدى دە، قىستاققا قايتىپ بارىپ، 300 مىڭ يۋان قارجىمەن توسەنىش جاساۋ زاۆودىن قۇرادى، ول ساپالى شيكىزاتتاردى تاڭداۋ جانە وزىق ءوندىرىس ونەرىن قولدانۋ ارقىلى ءاربىر توسەنىشتىڭ ساپالى دا جايلى بولۋىنا كەپىلدىك ەتتى.

توسەنىش جاساۋ زاۆودىنىڭ دامىپ ۇلعايۋىنا بايلانىستى مىقتىبەك ءران ۇلى قىستاقتاعى 6 تۇرعىندى توسەنىش جاساۋ زاۆودىنا جۇمىسقا قابىلدادى، ول كۇنىنە ءجۇز نەشە رەت بەلىن بۇگىپ، جۇمىسشىلارمەن بىرگە اسپاپتاردى رەتتەيدى، الايدا، وسىنداي ارەكەتتى قايتالاۋ بارىسىندا تەحنيكادان حابارسىز قىستاق تۇرعىندارى بىرتىندەپ ماشينانىڭ جاعدايىنا قانىق بولىپ، تەحنيكا ارقىلى تۇراقتى كىرىسكە قول جەتكىزدى.

قىستاق تۇرعىنى مايرا نياز قىزى: ”2024 – جىلى 3 – ايدان باستاپ وسى زاۆودتا جۇمىس ىستەپ كەلەمىن، ءبىر جىلدا تاپقان كىرىسىم 40 مىڭ يۋاننان استام بولىپ، وتباسىمىزدىڭ شارت – جاعدايى جاقساردى، بۇل جۇمىستى وتە ۇناتامىن“ دەيدى.

مىقتىبەك ءران ۇلىنىڭ قۇلشىنۋىندا، ولار وندىرگەن توسەنىشتەر بىرتىندەپ سول جەردەگى بازاردا ءوتىمدى بولىپ، ونىمدەرى شينجياڭ ىلەدەگى سەگىز اۋدان، ءۇش قالاداعى قوناق ۇيلەردە، حالىقتىق تۇسەلحانالاردا، شارۋالار ساياجايىندا ءوتىمدى بولىپ، تۇتىنۋشىلاردىڭ جاقسى باعاسىنا يە بولدى.

مىقتىبەك ءران ۇلى نىق سەنىممەن: ”بىلتىر ءبىز 3700 توسەنىش جاسادىق، قامداپ ۇلگىرە الماي جاتىرمىز، بيىل تاعى دا بىرنەشە ماشينا ساتىپ الىپ، ءوندىرىس كولەمىن كەڭەيتىپ، ون مىڭنان جيىرما مىڭعا دەيىن توسەنىش جاساپ، كوپشىلىكتىڭ كىرىسىن ونان ارى ارتتىرۋعا دايىندىق كورىپ جاتىرمىز“ دەدى. (قۇلجا اۋداندىق توعىسپالى مەديا ورتالىعىنىڭ ءتىلشىسى چىن يۇڭمەي)

كەلۋ قاينارى: حالىق تورابى