شي جينپيڭ قازاقستان زۇڭتۇڭى توقايەۆپەن كەڭەس وتكىزدى

جەرگىلىكتى ۋاقىت 6 - ايدىڭ 16 - كۇنى تۇستەن كەيىن قازاقستان زۇڭتۇڭى توقايەۆ جۇڭگونىڭ مەملەكەت ءتوراعاسى شي جينپيڭمەن استانا زۇڭتۇڭ سارايىندا كەڭەس وتكىزدى.

□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگىنىڭ 6 ـ ايدىڭ 16 ـ كۇنى استانادان بەرگەن حابارى (تىلشىلەر ني سى ـ ي، حۋ شياۋگۋاڭ). جەرگىلىكتى ۋاقىت 6 ـ ايدىڭ 16 ـ كۇنى تۇستەن كەيىن قازاقستان زۇڭتۇڭى توقايەۆ جۇڭگونىڭ مەملەكەت ءتوراعاسى شي جينپيڭمەن استانا زۇڭتۇڭ سارايىندا كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو - قازاقستان قارىم ـ قاتىناسى حالىقارالىق اۋمالى ـ توكپەلى جاعداي وزگەرىسىنىڭ سىنىن باستان وتكەرىپ، باستان ـ اياق جوعارى دەڭگەيدەگى اينالىمدى ساقتاپ كەلەدى، بۇل تاۋ ـ وزەنى تۇتاسقان وڭىرلىك ابزالدىلىقتىڭ جانە داۋىرلىك دوستىقتىڭ تاريحي جالعاسۋىنىڭ ارقاسى ءارى ەكى ەلدىڭ دامۋدى بىرگە كوزدەۋدەگى تابيعي تالعامى. تاياۋ جىلداردان بەرى، ءبىزدىڭ بىرگە جوسپارلاۋىمىزبەن جۇڭگو - قازاقستان تاعدىرلاس ورتاق تۇلعاسىنىڭ ساپاسى اناعۇرلىم جاقسى، مازمۇنى اناعۇرلىم باي بولىپ، ناقتى، حالىق تۇرمىسىنا ءتيىمدى جەتىستىكتەر ۇزدىكسىز جارىققا شىعىپ، ەكى ەل حالقىنىڭ تابىس سەزىمىن پارمەندى جوعارىلاتتى. جۇڭگو جاق جۇڭگو - قازاقستان قارىم ـ قاتىناسىنا باستان ـ اياق ستراتەگيالىق دەڭگەيدەن جانە ۇزاق بولاشاقتىق تۇرعىدان مامىلە جاسايدى جانە ونى دامىتادى، قازاقستان جاقپەن بىرگە جۇڭگو - قازاقستان دوستىعىن بۇلجىماي بەكەمدەپ، جۇڭگو - قازاقستان قارىم ـ قاتىناسىنىڭ ورنىقتىلىعى جانە وڭ ەنەرگياسى ارقىلى ءوڭىردىڭ، اۋەلى، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم كوپ ۇلەس قوسۋدى قالايدى.

شي جينپيڭ بىلاي دەپ باسا دارىپتەدى: جۇڭگو - قازاقستان تۇگەلدەي ءوزىن دامىتۋدىڭ، گۇلدەندىرۋدىڭ شەشۋشى كەزەڭىندە تۇر، ەكى ەل جان ـ جاقتى سەلبەستىكتى تىزە قوسا ىلگەرىلەتۋى كەرەك. ءبىرىنشى، جوعارى دەڭگەيدەگى ستراتەگيالىق ءوزارا سەنىمدىلىك ارقىلى ەكى جاقتى قارىم ـ قاتىناستىڭ دامۋىنا جەتەكشىلىك ەتىپ، ءبىر ـ ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ۇزدىكسىز ءبىر ـ ءبىرىن باتىل قولداپ، دامۋ ستراتەگيالارىن ءتۇيىلىستىرۋدى ىلگەرىلەتىپ، اۋمالى ـ توكپەلى ورتادا ءبىر ـ ءبىرىنىڭ بەرىك تىرەگى بولۋى، دامۋ، گۇلدەنۋ بارىسىندا ءبىر ـ ءبىرىنىڭ پايدالى دەمەۋشىسى بولۋى كەرەك. ەكىنشى، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ ارقىلى ەكى ەل سەلبەستىگى ساپاسىنىڭ جوعارىلاۋىن، دارەجەسىنىڭ ءوسۋىن جەبەپ، ساۋدا، قارجى قوسۋ، ەنەرگيا سياقتى ءداستۇرلى سەلبەستىك ابزالدىلىعىن بەكەمدەپ، شەكارا اتتاعان تەمىر جول نىسانى قۇرىلىسىن جانە شەكارا وتكەلى نەگىزدىك قۇرىلعىلارىن جاڭالاۋدى ىلگەرىلەتىپ، ۇلاستىرۋ، تۇتاستىرۋ دەڭگەيىن جوعارىلاتىپ، جوعارى، جاڭا تەحنولوگيا سەلبەستىگىن كەڭەيتىپ، جاسىل، باياندى دامۋدى ىلگەرىلەتۋ كەرەك. ءۇشىنشى، جان ـ جاقتى حاۋىپسىزدىك سەلبەستىگى ارقىلى ەكى ەلدىڭ بەيبىتشىلىگىن، تىنىشتىعىن قورعاپ، زاڭ اتقارۋ حاۋىپسىزدىگى جانە قورعانىس ىستەرى اۋىس ـ كۇيىسىن كەڭەيتىپ، ”ءۇش ءتۇرلى كۇشكە“ بىرگە سوققى بەرىپ، شۇعىل جاعدايعا توتەپ بەرۋدى باسقارۋ جانە اپاتتان ساقتانۋ، اپات شىعىنىن ازايتۋ سەلبەستىگىن تەرەڭدەتۋ كەرەك. ءتورتىنشى، كوپ نەگىزدەنگەن گۋمانيتارلىق اۋىس ـ كۇيىس ارقىلى جۇڭگو - قازاقستان دوستىعىنىڭ نەگىزىن بەكەمدەپ، قازاقستان ”جۇڭگو ساياحات جىلىن“ ويداعىداي وتكىزىپ، جاستاردى، مەديالاردى، اقىل ـ پاراسات قويماسىن، جەرگىلىكتى ورىنداردى اۋىس ـ كۇيىستى كۇشەيتۋگە شابىتتاندىرۋ كەرەك.

شي جينپيڭ بىلاي دەپ اتاپ كورسەتتى: وزگەرىس پەن بىلىقپالىق قاباتتاسقان حالىقارالىق جاعداي الدىندا جۇڭگو - قازاقستان ەكى جاق بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى جانە حالىقارالىق زاڭدى نەگىز ەتكەن حالىقارالىق ءتارتىپتى باتىل قورعاپ، ناعىز كوپ جاقتىلىقتى امالياتتا ايگىلەپ، قالىڭ وركەندەپ كەلە جاتقان ەلدەردىڭ ورتاق مۇددەسىن تۋى ايقىن تۇردە قورعاۋى كەرەك. جۇڭگو جاق قازاقستاننىڭ 2 ـ كەزەكتى جۇڭگو - ورتا ازيا باسشىلار ءماجىلىسى ءۇشىن ىستەگەن قىرۋار دايىندىق قىزمەتىن جوعارى باعالايدى، وسى رەتكى ءماجىلىستىڭ جۇڭگونىڭ ورتا ازيامەن سەلبەستىگىنىڭ جاڭا تاراۋىن جازاتىندىعىنا سەنەدى. سونىمەن بىرگە شاڭحاي سەلبەستىك ۇيىمىنىڭ كەزەكتى ءتوراعا ەلى رەتىندە، جۇڭگو ءارقايسى مۇشە ەلدەرمەن بىرگە بيىلعى تيانجين باسشىلار ءماجىلىسىن وراي ەتىپ، شاڭحاي سەلبەستىك ۇيىمىن نىعايتىپ، كۇشەيتىپ، جاڭا دامۋدى، جاڭا تابىستى، جاڭا بەينەنى ايگىلەۋدى قالايدى.

توقايەۆ مىنالاردى ءبىلدىردى: جۇڭگو قازاقستاننىڭ دوس كورشىسى، جاقىن دوسى جانە سەنىمدى سەرىگى. قازاقستان مەن جۇڭگونىڭ ماڭگىلىك جالپى بەتتىك ستراتەگيالىق سەرىكتەستىك قارىم ـ قاتىناسى جاڭا التىن داۋىرگە ءوتىپ، ەكى ەل ەكونوميكاسىنىڭ، قوعامىنىڭ باياندى دامۋىنا دەم بەرىپ، ەكى جاق حالقىن باقىتقا كەنەلتۋدە، مۇنى مەملەكەت پەن مەملەكەت قارىم ـ قاتىناسىنىڭ تيپتىك ۇلگىسى دەۋگە بولادى. قازاقستان مەن جۇڭگونىڭ سەلبەستىكتى كۇشەيتەتىن كۇشتى ساياسي تىلەگى بار، يەلىك ۇقىق، حاۋىپسىزدىك سياقتى ءبىر ـ ءبىرىنىڭ وزەكتى مۇددەسىنە ساياتىن ماسەلەلەردە باستان ـ اياق ءوزارا قولداۋ كورسەتەدى، حالىقارالىق جاعداي وزگەرىسىنىڭ ىقپالىنا ۇشىرامايدى. ءتوراعا شي جينپيڭنىڭ كورەگەن باسشىلىعىندا، جاڭا داۋىردەگى جۇڭگوشا سوتسياليزم ىستەرىندە ۇلى تابىستارعا قول جەتكىزىلدى، قازاقستان جاق بۇعان شىن جۇرەكتەن قۋانادى، جۇڭگونىڭ ءتىپتى دە زور دامۋ تابىستارىنا ۇزدىكسىز قول جەتكىزەتىندىگىنە كامىل سەنەدى. قازاقستان جاق جۇڭگو جاقپەن ستراتەگيالىق ءوزارا سەنىمدىلىكتى جانە جان ـ جاقتى ءوزارا پايدا جەتكىزۋ سەلبەستىگىن تەرەڭدەتىپ، ەكى ەل قارىم ـ قاتىناسىن جاڭا دەڭگەيگە كوتەرۋدى قالايدى. ەكى ەل ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، ساۋدا، قارجى قوسۋ، ونەركاسىپ، اۋىل شارۋاشىلىعى، ەنەرگيا، قاتىناس سياقتى سالالارداعى سەلبەستىكتى كەڭەيتىپ، مادەنيەت، وقۋ ـ اعارتۋ، دەنە تاربيە، ساياحات سياقتى سالالارداعى گۋمانيتارلىق اۋىس ـ كۇيىستى جيىلەتۋى كەرەك. قازاقستان جاق جۇڭگونىڭ حالىقارالىق ادىلدىكتى، تۋراشىلدىقتى قورعاۋداعى جاۋاپكەرشىلىك ارقالاۋىن، قۇلشىنىسىن جوعارى باعالايدى ءارى بەلسەندى قولدايدى، جۇڭگو جاقپەن بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس، جۇڭگو - ورتا ازيا مەحانيزمى، ازيا ءوزارا ىستەستىك جانە سەنىمدىلىك شارالارى كەڭەسى سياقتى كوپ جاقتى مەحانيزمدە ۇزدىكسىز تىعىز سەلبەستىك جاساپ، ءوزارا قولداۋ كورسەتىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى ەكى جاقتىڭ 10نان استام ەكى جاقتى سەلبەستىك حۇجاتىن اۋىستىرۋىنا بىرگە كۋا بولدى، بۇل ساۋدا، قارجى قوسۋ، عىلىم ـ تەحنولوگيا، كەدەن، ساياحات، مەديا سياقتى سالالاردى قامتيدى.

ساي چي، ۋاڭ ي قاتارلىلار جوعارىداعى قيمىلدارعا قاتىناستى.