15 - كەزەكتى مەملەكەتتىك سپورت جارىسى گۋاڭدۇڭ گۋاڭجوۋدا سالتاناتپەن باستالدى

11 - ايدىڭ 9 - كۇنى كەشتە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ گۋاڭدۇڭ ولكەسىنىڭ گۋاڭجوۋ قالاسىندا جۇڭحۋا حالىق رەسپۋبليكاسىنىڭ 15 - كەزەكتى سپورت جارىسىنىڭ اشىلۋ سالتىنا قاتىناستى ءارى سپورت جارىسىنىڭ باستالعانىن جاريالادى. سۋرەتتە: شي جينپيڭ ءتوراعالار مىنبەسىندە كوپشىلىككە قول بۇلعاپ قۇرمەت بىلدىرۋدە.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

«حالىق گازەتى»، 11 - ايدىڭ 9 - كۇنى، گۋاڭجوۋ. جۇڭحۋا حالىق رەسپۋبليكاسىنىڭ 15 - كەزەكتى سپورت جارىسى 11 - ايدىڭ 9 - كۇنى كەشتە گۋاڭدۇڭ ولكەسىنىڭ گۋاڭجوۋ قالاسىندا سالتاناتپەن باستالدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ اشىلۋ سالتىنا قاتىناستى ءارى سپورت جارىسىنىڭ باستالعانىن جاريالادى.

11 - ايدىڭ 9 - كۇنى كەشتە گۋاڭدۇڭ وليمپيادا سپورت ورتالىعىندا شىراقتار سامالاداي جارقىراپ، قىزۋ مەرەيگە شومدى. بۇل − گۋاڭدۇڭ، شياڭگاڭ، اۋمىن سىندى 3 جەر تۇڭعىش رەت بىرلەسىپ وتكىزگەن مەملەكەتتىك سپورت جارىسى.

ساعات 19 دان 58 مينۋت وتكەندە، ويناقى مۋزىكا ءۇنى ىشىندە شي جينپيڭ مەن حانىمى پىڭ لييۋان قاتارلىلار ءتوراعالار مىنبەسىنە شىعىپ، كورەرمەندەرگە قول بۇلعاپ قۇرمەت ءبىلدىردى. بۇكىل الاڭنان كوپكە دەيىن دۋ قول شاپالاق ءۇنى كوتەرىلدى.

ساعات 20 دا مەملەكەتتىك 15 - كەزەكتى سپورت جارىسىنىڭ اشىلۋ سالتى رەسمي باستالدى. «وتاندى جىرلايمىز» دەگەن اسقاق اۋەنمەن قۇرمەت قاراۋىلى نارتتاي جايناعان بەس جۇلدىزدى قىزىل تۋدى قورعاپ، دەنە تاربيە الاڭىنا كىردى. اسقاق مۋزىكا ءۇنى ىشىندە مەملەكەتتىك سپورت جارىسىنىڭ تۋى، 15 - كەزەكتى مەملەكەتتىك سپورت جارىسىنىڭ تۋى جانە 16 تۋ ۇستاۋشىدان قۇرالعان تۋ شارشى توبى الاڭعا كىردى. تورەشىلەر ۋاكىلدەرى شارشى قاتارى الاڭعا كىردى. وسىدان كەيىن 37 ۋاكىلدەر ۇيىرمەسىنىڭ سپورتشىلارىنىڭ ۋاكىلدەرى كوتەرىڭكى رۋحپەن الاڭعا كىردى، ولار جەكە - جەكە ولكەلەردەن، اۆتونوميالى رايونداردان، توتە قاراستى قالالاردان، شياڭگاڭ ەرەكشە اكىمشىلىك رايونىنان، اۋمىن ەرەكشە اكىمشىلىك رايونىنان، شينجياڭ ءوندىرىس - قۇرىلىس بيڭتۋانىنان جانە 3 كاسىپتىك دەنە تاربيە قوعامىنان كەلگەن. بۇكىل الاڭداعى كورەرمەندەر قىزۋ شاپالاق ءۇنى مەن شاتتىق ءۇنى ارقىلى سپورتشىلاردىڭ الاڭعا كىرۋىن قارسى الدى.

الاڭعا كىرۋ سالتى اياقتاعاننان كەيىن بۇكىل الاڭداعىلار ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى. ايبىندى مەملەكەت ءانى ىشىندە بەس جۇلدىزدى قىزىل تۋ باياۋ كوتەرىلىپ، اسقاق جەلبىرەدى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، گۋاڭدۇڭ ولكەلىك پارتكومنىڭ شۋجيى حۋاڭ كۇنميڭ، شياڭگاڭ ەرەكشە اكىمشىلىك رايونىنىڭ اكىمى لي جياچاۋ، اۋمىن ەرەكشە اكىمشىلىك رايونىنىڭ اكىمى سىن حاۋحۇي، مەملەكەتتىك دەنە تاربيە باس مەكەمەسىنىڭ باستىعى گاۋ جىدان جەكە - جەكە ارناۋ ءسوز سويلەدى.

ساعات 20 دان 43 مينۋت وتكەندە، شي جينپيڭ: جۇڭحۋا حالىق رەسپۋبليكاسىنىڭ 15 - كەزەكتى سپورت جارىسى باستالدى! دەپ جاريالادى. بۇكىل الاڭ دۋمانعا بولەنىپ، شاپالاق ءۇنى، الاقايلاعان داۋىستار كوپكە دەيىن تولاستامادى.

15 - كەزەكتى مەملەكەتتىك سپورت جارىسى ءانىنىڭ اۋەنىنە ىلەسە، مەملەكەتتىك سپورت جارىسىنىڭ تۋى مەن 15 - كەزەكتى مەملەكەتتىك سپورت جارىسىنىڭ جارىس تۋى باياۋ كوتەرىلدى.

چىن ايسىن، يوۋ جۇنشيان، يۋان شۋانيۇن جەكە - جەكە 15 - كەزەكتى مەملەكەتتىك سپورت جارىسىنا قاتىناسقان سپورتشىلار، جاتتىقتىرۋشىلار، تورەشىلەر اتىنان سەرت بەردى.

«ارمانعا قۇلاش سەرمەۋدى» نەگىزگى تاقىرىپ ەتكەن ادەبيەت - كوركەمونەر كونسەرتى باستالدى. تۇتاس كونسەرت ”تامىرلاس بولۋ“، ”تىلەكتەس بولۋ“، ”ارمانعا بىرگە قانات قاعۋ“ سىندى 3 تاراۋدان قۇرالعان، دەنە تاربيە فاكتورلارىنان، كوركەمونەر تاسىلدەرىنەن جانە الدىڭعى لەكتىك عىلىم - تەحنيكادان جاسامپازدىقپەن پايدالانىپ، وسى كەزەكتى مەملەكەتتىك سپورت جارىسىنىڭ ”اسەرلى مەملەكەتتىك سپورت جارىسى، ومىرشەڭدىك كۇشكە تولى ۇلكەن شىعاناق رايونى“ نەگىزگى تاقىرىبىن جاندى ءتۇسىندىردى.

جان تەبىرەنتەرلىك الاڭداعى الاۋ جەتكىزۋ جانە نەگىزگى الاۋدى تۇتاندىرۋ سالتى باستالدى. 11 - ايدىڭ 2 - كۇنى 15 - كەزەكتى مەملەكەتتىك سپورت جارىسىنىڭ الاۋى گۋاڭدۇڭ، شياڭگاڭ، اۋمىن سىندى 3 جەردە ءبىر ۋاقىتتا جەتكىزىلىپ، ەڭ سوڭىندا گۋاڭدۇڭ وليمپيادا سپورت ورتالىعىندا قوسىلدى. جۇرتتىڭ نازار اۋدارۋىندا ما لين، چىن رولين، حۋاڭ جينباۋ، فاڭ ۋىنحاۋ، گو جيڭجيڭ، ۋاڭ شينيۇي، ۋاڭ ليۋ - ي، ۋاڭ چيان - ي، لياڭ ۋەيكىڭ، لاي شۋانجى، شيان دۇڭمەي، رۇڭ جىشيڭ قاتارلى 12 الاۋشى الاۋدى كۇش جالعاپ جەتكىزدى، ەڭ سوڭىندا سۋ بيڭتيان، جاڭ جيالياڭ، لي ي مەملەكەتتىك سپورت جارىسىنىڭ نەگىزگى الاۋىن بىرگە تۇتاندىردى.

ساعات 21 دەن 27 مينۋت وتكەندە مەملەكەتتىك 15 - كەزەكتى سپورت جارىسىنىڭ اشىلۋ سالتى «تىلەكتەس الەم» تاقىرىبىنداعى ءان اۋەنىنىڭ قىزۋ مەرەيىمەن تابىسپەن اياقتادى.

ۋاڭ ي، لي حۇڭجۇڭ، حى ليفىڭ، جاڭ يوۋشيا، ۋاڭ شياۋحۇڭ، چىن ي - چين، ۋاڭ دۇڭفىڭ اشىلۋ سالتىنا قاتىناستى.

حالىقارالىق وليمپيادا كوميتەتىنىڭ ءتوراعاسى كاۆينچۇري، حالىقارالىق وليمپيادا كوميتەتىنىڭ ومىرلىك قۇرمەتتى ءتوراعاسى باح، سونداي - اق ۇسىنىس بويىنشا 15 - كەزەكتى مەملەكەتتىك سپورت جارىسىن تاماشالاعان شەكارا سىرتىنداعى قوناقتار اشىلۋ سالتىنا قاتىناستى.

15 - كەزەكتى مەملەكەتتىك سپورت جارىسى 11 - ايدىڭ 21 - كۇنى جابىلادى، جالپى 14 مىڭنان استام سپورتشى باسەكەلىك جارىس تۇرىنە قاتىناسادى، شامامەن 11 مىڭ بۇقارا سپورتشى بۇقارالىق جارىس قيمىلىنا قاتىناسادى.