شي جينپيڭ حالىقارالىق وليمپيادا كوميتەتىنىڭ ءتوراعاسى كاۆينچۇريمەن جانە ومىرلىك قۇرمەتتى ءتوراعاسى باحپەن كەزدەستى

11 - ايدىڭ 9 - كۇنى تۇستەن كەيىن مەملەكەت ءتوراعاسى شي جينپيڭ گۋاڭجوۋ باييۇن حالىقارالىق ءماجىلىس ورتالىعىندا 15 - كەزەكتى مەملەكەتتىك سپورت جارىسىنىڭ اشىلۋ سالتىنا قاتىناسۋ ءۇشىن جۇڭگوعا كەلگەن حالىقارالىق وليمپيادا كوميتەتىنىڭ ءتوراعاسى كاۆينچۇريمەن جانە ومىرلىك قۇرمەتتى ءتوراعاسى باحپەن كەزدەستى.

سۋرەتتى شينحۋا اگەنتتىگىنىڭ ءتىلشىسى يان بوگۋ تۇسىرگەن

«حالىق گازەتى»، 11 - ايدىڭ 9 - كۇنى، گۋاڭجوۋ. 11 - ايدىڭ 9 - كۇنى تۇستەن كەيىن مەملەكەت ءتوراعاسى شي جينپيڭ گۋاڭجوۋ باييۇن حالىقارالىق ءماجىلىس ورتالىعىندا 15 - كەزەكتى مەملەكەتتىك سپورت جارىسىنىڭ اشىلۋ سالتىنا قاتىناسۋ ءۇشىن جۇڭگوعا كەلگەن حالىقارالىق وليمپيادا كوميتەتىنىڭ ءتوراعاسى كاۆينچۇريمەن جانە ومىرلىك قۇرمەتتى ءتوراعاسى باحپەن كەزدەستى.

شي جينپيڭ بىلاي دەپ اتاپ كورسەتتى: وليمپيادا رۋحى − ادامزات وركەنيەتىنىڭ ماڭىزدى مازمۇنى، ول ءار ەل حالقىنىڭ اناعۇرلىم كوركەم دۇنيە ءجۇزىن قۇرۋ تىلەگىن ارقالاپ وتىر، جۇڭگونىڭ ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ ارمانىمەن بارىنشا قابىسادى. جۇڭگو − باستان - اياق وليمپيادا رۋحىنىڭ باتىل امالياتتا ايگىلەۋشىسى، قورعاۋشىسى، تاراتۋشىسى. تاياۋ جىلداردان بەرى جۇڭگو حالىقارالىق وليمپيادا كوميتەتىمەن دەنە تاربيە ىستەرىن ىلگەرىلەتۋ بارىسىندا ءبىرىن - ءبىرى قولداپ، قول ۇستاسا وتىرىپ كوپتەگەن ءىرى، يگى ءىس ىستەدى. جىل باسىندا ءبىز قارلى دالاداعى حاربيندە قىسقى وليمپيادا سپورت جارىسىن بىرگە وتكىزدىك، بۇگىن تاعى دا كوكتەمدەگىدەي شۋاققا شومعان گۋاڭجوۋدا مەملەكەتتىك سپورت جارىسىنا بىرگە كەلىپ، جۇڭگو مەن حالىقارالىق وليمپيادا كوميتەتى اراسىنداعى دوستىقتىق، تىعىز قارىم - قاتىناستى ايگىلەپ وتىرمىز. جۇڭگو جاق ەكى جاقتىڭ جوعارى دەڭگەيلى سەلبەستىگىن ۇزدىكسىز تەرەڭدەتىپ، دەنە تاربيەدە قۋاتتى ەل قۇرۋ مەن وليمپيادا سپورتىنىڭ دامۋىن ءبىر تۇتاس ىلگەرىلەتىپ، دۇنيە جۇزىلىك دەنە تاربيەنى جونگە سالۋعا اناعۇرلىم كوپ اقىل - پاراسات پەن كۇش -ـ قۋات قوسىپ، ادامزاتتىڭ تاعدىرلاس ورتاق تۇلعاسىن قۇرۋعا اناعۇرلىم زور ۇلەس قوسۋدى قالايدى.

شي جينپيڭ بىلاي دەپ باسا دارىپتەدى: مەملەكەتتىك سپورت جارىسى − جۇڭگوداعى ەڭ كولەمدى، ەڭ جوعارى دەڭگەيدەگى امبەباپ سپورت جارىسى، وسى كەزەكتى مەملەكەتتىك سپورت جارىسىن گۋاڭدۇڭ، شياڭگاڭ، اۋمىن سىندى 3 جەر بىرلەسىپ وتكىزەدى. گۋاڭدۇڭ - شياڭگاڭ - اۋمىن شىعاناق رايونى − جۇڭگوداعى ەسىك اشۋ دەڭگەيى ەڭ جوعارى، ەكونوميكالىق ومىرشەڭدىك كۇشى ەڭ قۋاتتى وڭىرلەردىڭ ءبىرى. گۋاڭدۇڭ - شياڭگاڭ - اۋمىن شىعاناق رايونى قۇرىلىسىن ىلگەرىلەتۋدە جۇڭگونىڭ جاڭا دامۋ جاعدايىنىڭ ستراتەگيالىق تىرەگىن، جوعارى ساپالى دامۋدىڭ ۇلگى ورنىن، جۇڭگو ۇلگىسىندەگى وسىزامانداندىرۋدىڭ جەتەكشى ورنىن قالىپتاستىرۋ كەرەك. وسى كەزەكتى مەملەكەتتىك سپورت جارىسىنىڭ جاڭا داۋىردەگى جۇڭگونىڭ دەنە تاربيە ىستەرى دامۋىنىڭ جاڭا جەتىستىكتەرىنە كۋا بولىپ قانا قالماستان، جۇڭگو ۇلگىسىندەگى وسىزامانداندىرۋدىڭ گۋاڭدۇڭ - شياڭگاڭ - اۋمىن ۇلكەن شىعاناق رايونىنىڭ تىڭ بەينەسىن دە ايگىلەيتىندىگىنە سەنەمىن.

كاۆينچۇري مەن باح مىنالاردى ءبىلدىردى: گۋاڭجوۋعا كەلىپ، گۋاڭدۇڭ - شياڭگاڭ - اۋمىن ۇلكەن شىعاناق رايونى قۇرىلىسىنان جۇڭگونىڭ وسىزامانداندىرۋ قۇرىلىسىنىڭ قارىشتاپ دامۋى مەن وراسان زور تابىستارىن سەزىنگەنىمىزگە توتەنشە قۋانىشتامىز. جۇڭگو وليمپيادا رۋحىن بەلسەنە امالياتتا ايگىلەپ، حالىقارالىق وليمپيادا ىستەرىنىڭ دامۋىنا ماڭىزدى ۇلەس قوستى. حالىقارالىق وليمپيادا كوميتەتى جۇڭگونىڭ ۇزاق ۋاقىتتان بەرى زور كۇشپەن قولداۋ كورسەتكەنىنە العىس ايتادى، جۇڭگومەن سەلبەستىكتى ۇزدىكسىز كۇشەيتىپ، وليمپيادا سپورتىنىڭ قارىشتاپ دامۋىن بىرگە ىلگەرىلەتىپ، وليمپيادا رۋحىن دۇنيە جۇزىنە ونان ارى تاراتىپ، ءار ەل حالقىنىڭ ىنتىماعىن كۇشەيتىپ، دۇنيە ءجۇزىنىڭ بەيبىتشىلىگىن جەبەۋدى ءۇمىت ەتەدى. اشىلۋ الدىندا تۇرعان جۇڭگونىڭ مەملەكەتتىك سپورت جارىسىنىڭ تارتىمدى دا تابىستى سالتاناتتى جينالىس بولاتىندىعىنا، جۇڭگونىڭ دەنە تاربيە ىستەرىنىڭ تىڭ دامۋشىلىقتارعا قول جەتكىزۋىن، ءسوز جوق، ىلگەرىلەتەتىندىگىنە سەنەمىز.

ۋاڭ ي، حۋاڭ كۇنميڭ، چىن ي - چين قاتارلىلار كەزدەسۋدە بىرگە بولدى.