عارىشقا شىعارىلعان تىشقاندار جەر شارىنا قايتىپ ورالدى

11 – ايدىڭ 14 – كۇنى، جۇڭگو عارىش بەكەتىندەگى 9 – توپتاعى كەڭىستىكتىك عىلىمي تاجىريبەگە پايدالانىلعان ۇلگىلەر شىنجوۋ 21 – ءنومىرلى الەم كەمەسىمەن جەر شارىنا ءساتتى قايتارىلدى، مۇنىڭ ىشىندە تاجىريبە جۇرگىزىلگەن تىشقان قاتارلى تاجىريبەلىك ۇلگىلەردىڭ جالپى سالماعى 46.67 كيلوگرام.

اسىلگى جوسپار بويىنشا 5 – 7 كۇن ”قىسقا مەرزىمدىك ءىسساپارعا“ جىبەرىلگەن 4 ”عارىشكەر تىشقان“ الەم كەمەسىنىڭ جەر شارىنا ورالۋىنىڭ كەشەۋىلدەتىلۋىنە بايلانىستى ەكى اپتالىق ”ۇزاق مەرزىمدىك ۇستەمە جۇمىس“ ىستەدى، بۇل ويلاماعان جاعداي تىشقانداردىڭ كەڭىستىكتەگى ساپارىنىڭ عىلىمي تاجىريبەلىك قۇنىن ەسەلەپ ارتتىردى.

تىشقانداردىڭ قايتىپ ورالعاننان كەيىنگى كۇيى قالاي؟

4 ”عارىشكەر تىشقان“ جەر شارىنا قايتىپ ورالعان سوڭ، قىزمەتكەرلەر ولاردىڭ استىنا جۇمساق توسەنىشتەر سالعان ءارى ولار ۇناتىپ جەيتىن جەمىس ۋىزشاسى مەن ازىقتىقتاردى بەرگەن. تىشقاندار اقىرى ”اۋىلدىڭ ءدامىن“ تاتقان. عىلىمي زەرتتەۋ قىزمەتكەرلەرىنىڭ تانىستىرۋىنشا، تىشقانداردىڭ قالپىنا كەلۋى وتە جاقسى، قازىر ازىقتانا باستاعان.

تىشقانداردىڭ عارىشتاعى تۇرمىسى قالاي بولدى؟

عارىشتاعى ەڭ زور وزگەرىس كۇندىز بەن ءتۇننىڭ بولماۋى، عالىمدار تىشقانداردىڭ ”بولمەسىنە“ ارنايى جارىقتاندىرۋ جۇيەسىن ورناتىپ، تاڭەرتەڭ ساعات 7 دە شامدى جاعىپ، كەشكى ساعات 7 دە ءوشىرىپ وتىرعان، وسى ارقىلى جەر شارىنداعى كۇننىڭ شىعۋى مەن باتۋىنا ەلىكتەپ، ولاردىڭ ”بيولوگيالىق ساعاتىن“ قورعاپ وتىرعان.

عارىشتاعى تازالىق ماسەلەسى دە وتە زور ماسەلە، ويتكەنى، تىشقانداردىڭ ءجۇنى، ازىقتىقتارىنىڭ قالدىعى جانە ناجىستەرى اۋەدە الباتى قالىقتاپ جۇرسە، ولار بايقاماي جۇتىپ قويۋى مۇمكىن، سوندىقتان بۇل قۇرىلعىنىڭ ىشىنە ”جەلدەتكىش“ جۇيەسى ورنالاستىرىلعان، بۇل جۇيە قوقسىقتاردى جيناۋ قورابىنا ۇرلەپ كىرگىزىپ، تىشقاندارعا بارىنشا تازا ورتا جاراتىپ بەرەدى.

جۇڭگو عىلىم اكادەمياسى عارىشتىق قولدانىلىم ينجەنەرياسى جانە تەحنيكالىق ورتالىعىنىڭ زەرتتەرمەنى جاڭ لۋدىڭ ايتۋىنشا، قازىر عىلىمي زەرتتەۋ ۇجىمى حايۋاناتتاردى جەتىلدىرۋدىڭ عارىش پەن جەردى ءبىر تۇلعالاندىرعان جۇيەسىن ورناتىپ، كەلەسى قادامداعى عىلىمي زەرتتەۋگە نەگىز قالاعان، تىشقانعا بيولوگيالىق زەرتتەۋ جۇرگىزۋ ورگانيزمدەردىڭ عارىشتاعى بولىمسىز تارتىلىس كۇشى ورتاسىنداعى وزگەرىستەرىن ءتۇسىنۋدى، وسى ارقىلى عارىشتىڭ ادامزاتتىڭ بۇلشىق ەتى، سۇيەگى قاتارلىلارعا جاسايتىن كومەسكى ىقپالىن بولجاۋدى ماقسات ەتەدى.

كەلۋ قاينارى: حالىق تورابى