شي جينپيڭ تايلاند پاتشاسى ۋاجيرالوڭكورنمەن كەزدەستى

11 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن تايلاند پاتشاسى ۋاجيرالوڭكورنمەن كەزدەستى. سۋرەتتە: شي جينپيڭ مەن حانىمى پىڭ لييۋان ۋاجيرالوڭكورنمەن جانە ونىڭ حانىمى سۋتيدامەن سۋرەتكە ءتۇستى.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگىنىڭ 11 ـ ايدىڭ 14 ـ كۇنى بەيجيڭنەن بەرگەن حابارى (تىلشىلەر فىڭ شينران، شاۋ يبو). 11 ـ ايدىڭ 14 ـ كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن تايلاند پاتشاسى ۋاجيرالوڭكورنمەن كەزدەستى.

شي جينپيڭ مىنالاردى ءبىلدىردى: ۋاجيرالوڭكورن پاتشا جۇڭگونى مەملەكەتتىك ساپارىنداعى تۇڭعىش ءىرى ەل ەتىپ جۇڭگو مەن تايلاند ديپلوماتيالىق قارىم ـ قاتىناس ورناتقاننان بەرى جۇڭگوعا تۇڭعىش رەت ساپارلاي كەلگەن تايلاند پاتشاسىنا اينالدى، بۇل جۇڭگو - تايلاند قارىم ـ قاتىناسىنا ايرىقشا ءمان بەرەتىندىگىن جانە ”جۇڭگو مەن تايلاندتىڭ ءبىر ءۇيلى جانداي ەتەنە“ تەرەڭ دوستىق سۇيىسپەنشىلىگىن تولىق ايگىلەدى. شي جينپيڭ شىليجي پاتشا اناسىنىڭ تاياۋدا قايتىس بولعاندىعىنا ازا ءبىلدىرىپ، بىلاي دەپ اتاپ كورسەتتى: تايلاند پاتشا اۋلەتى جۇڭگومەن تەرەڭ بايلانىس ورناتىپ، جۇڭگو مەن تايلاند دوستىعىن جەبەۋگە ماڭىزدى ۇلەس قوسقان، جۇڭگو جاق مۇنى ايرىقشا القايدى. بيىل — جۇڭگو مەن تايلاندتىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعى جانە ”جۇڭگو - تايلاند دوستىعىنىڭ التىن 50 جىلى“. ديپلوماتيالىق قارىم ـ قاتىناس ورناتقان جارتى عاسىردان بەرى، حالىقارالىق اۋمالى ـ توكپەلى جاعداي الدىندا جۇڭگو مەن تايلاند ەكى ەل باستان ـ اياق تىزە قوسا قول ۇستاسىپ، ءبىر ـ بىرىنە قارايلاسىپ، ناعىز جاقسى تۋىس، جاقسى دوس، جاقسى سەرىك بولىپ كەلەدى. جاڭا تاريحي باستامادا مەن ۋاجيرالوڭكورن پاتشامەن بىرگە جۇڭگو - تايلاند تاعدىرلاس ورتاق تۇلعا قۇرىلىسىنا جەتەكشىلىك ەتىپ، كەلەسى 50 جىلدا اناعۇرلىم زور ىلگەرىلەۋشىلىككە قول جەتكىزىپ، جۇڭگو - تايلاند دوستىعىنىڭ تىڭ داستانىن بىرگە جازۋدى قالايمىن.

شي جينپيڭ بىلاي دەپ اتاپ كورسەتتى: جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 ـ بەسجىلدىق“ جوبا ۇسىنىسىن قاراپ ماقۇلداپ، نازاردى جوعارى ساپالى دامۋدى ىلگەرىلەتۋگە، جوعارى دەڭگەيدە ەسىك اشۋدى كەڭەيتۋگە شوعىرلاندىردى. تايلاند تا مەملەكەتتى دامىتۋدىڭ، گۇلدەندىرۋدىڭ شەشۋشى كەزەڭىندە تۇر. جۇڭگو جاق تايلاند جاقپەن ستراتەگيالىق ۇشتاسۋدى كۇشەيتىپ، جۇڭگو - تايلاند تەمىر جولى سياقتى ءىرى نىساندار سەلبەستىگىن ورنىقتى ىلگەرىلەتىپ، تايلاندتىڭ ساپالى اۋىل شارۋاشىلىق ونىمدەرىن يمپورت ەتۋدى كەڭەيتىپ، جاساندى زەردە، سيفرلى ەكونوميكا، اۆياتسيا، عارىش سياقتى جاڭادان گۇلدەنگەن سالالارداعى سەلبەستىكتى كەڭەيتىپ، ەكى ەل حالقىن جۇڭگو - تايلاند سەلبەستىگىنەن اناعۇرلىم كوپ ناقتى پايداعا كەنەلتۋدى قالايدى. ەكى ەل مادەنيەتىنىڭ توعىسۋىن ىلگەرىلەتىپ، گۋمانيتارلىق اۋىس ـ كۇيىستى جەبەپ، ەكى ەل حالىق جۇرتشىلىعىنىڭ بارعان سايىن ەتەنە بولۋىنا مۇمكىندىك جاساۋ كەرەك. جۇڭگو جاق تايلاند پاتشا اۋلەتىنىڭ الەۋمەتتىك يگىلىك نىساندارىن بەلسەنە قولداپ، كەدەيلىكتى ازايتۋ تاجىريبەلەرىن اۋىستىرۋدى كۇشەيتىپ، تايلاندتىڭ حالىق تۇرمىسىن جاقسارتۋىنا دەم بەرۋدى قالايدى.

ۋاجيرالوڭكورن مىنالاردى ءبىلدىردى: جۇڭگودا مەملەكەتتىك ساپاردا بولعانىما توتەنشە قۋانىشتىمىن. كوپ جىل وتكەن سوڭ جۇڭگوعا تاعى كەلدىم، جۇڭگودا وراسان زور وزگەرىستەر تۋىلىپ، وسىزاماندانعان جۇڭگو مەن كورىكتى جۇڭگونىڭ شىت جاڭا بەت ـ بەينەسى ايگىلەنىپتى، جۇڭگونىڭ ەكونوميكالىق، قوعامدىق دامۋدا كەلەلى تابىستارعا قول جەتكىزگەندىگىن قۇتتىقتايمىن. تايلاند پەن جۇڭگو ەكى ەل ەتەنە دوس، حالىقتاردىڭ بارىس ـ كەلىسى قويۋ، ءوزارا پايدا جەتكىزۋ سەلبەستىگى كەڭ دە تەرەڭ. تايلاند - جۇڭگو سەلبەستىگى باۋىرلاستار اراسىنداعى سەلبەستىك. تايلاند جاق جۇڭگونىڭ دامۋ تاجىريبەلەرىن بەلسەنە ۇيرەنىپ جانە ودان ۇلگى الىپ، جۇڭگومەن ءار سالاداعى سەلبەستىكتى كەڭەيتىپ، گۋمانيتارلىق اۋىس ـ كۇيىستى كۇشەيتىپ، تايلاند - جۇڭگو دوستىعىن جۇرت جۇرەگىنە اناعۇرلىم تەرەڭ ۇيالاتۋدى قالايدى.

كەزدەسۋدەن بۇرىن شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسى سىرتىنداعى الاڭدا ۋاجيرالوڭكورن مەن پاتشا حانىمى سۋتيدانى قارسى الۋ سالتىن وتكىزدى.

ۋاجيرالوڭكورن كەلگەندە قۇرمەت قاراۋىلى ساپ تۇزەپ قۇرمەت ءبىلدىردى. شي جينپيڭ ۋاجيرالوڭكورنمەن بىرگە كوزدەن كەشىرۋ مىنبەسىنە شىقتى، اسكەري وركەستر جۇڭگونىڭ مەملەكەت ءانىن جانە تايلاندتىڭ ماداق جىرىن ورىندادى، تيان ـ انمىن الاڭىندا 21 رەت قۇرمەت ساليۋتى اتىلدى. ۋاجيرالوڭكورن شي جينپيڭنىڭ سەرىك بولۋىمەن جۇڭگو حالىق ازاتتىق ارمياسى قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.

سول كۇنى كەشتە شي جينپيڭ مەن پىڭ لييۋان ۋاجيرالوڭكورن مەن ونىڭ زايىبىنا قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.