قورعانىس مينيسترلىگىنىڭ مالىمدەمەشىسى جاڭ شياۋگاڭ ا ق ش – نىڭ تايۋانعا اسكەري قارۋ – جاراق ساتىپ بەرمەكشى بولعانى جونىندە تىلشىلەردىڭ سۇراۋىنا جاۋاپ قايتاردى

ءتىلشى: حابارعا قاراعاندا، ا ق ش – نىڭ مەملەكەتتىك كەڭەسى جالپى قۇنى شامامەن 330 ميلليون ا ق ش دوللارى كەلەتىن قارۋ – جاراقتى تايۋانعا ساتىپ بەرۋدى ماقۇلداعان، مۇنىڭ ىشىندە قاتىستى ۇشاق تيپتەرىنىڭ ”ولشەمنەن تىسقارى اۆياتسيا ماتەريالدارىنان جاسالعان ۇساق بولشەكتەرى“ مەن جوندەۋ قىزمەتىن وتەۋ دە قامتىلعان. مالىمدەمەشى، وسى جونىندە قانداي پىكىر بىلدىرەسىز؟

جاڭ شياۋگاڭ: ا ق ش جاقتىڭ جۇڭگونىڭ تايۋان وڭىرىنە قارۋ – جاراق ساتىپ بەرمەكشى بولۋى ءبىر جۇڭگو پرينسيبنە، جۇڭگو مەن ا ق ش اراسىنداعى ءۇش رەتكى بىرلەسكەن مالىمدەمەگە اۋىر دارەجەدە قايشىلىق جاساعاندىق، جۇڭگونىڭ ىشكى ىستەرىنە دورەكىلىكپەن كيلىككەندىك، جۇڭگونىڭ يەلىك ۇقىعى مەن حاۋىپسىزدىك مۇددەسىنە زيان جەتكىزەدى، ”تايۋاندى دەربەستەندىرۋگە ۇرىنعان“ بولشەكتەۋشى كۇشتەرگە اۋىر قاتە سيگنال بەرەدى. ءبىز بۇل ىسكە قاتاڭ نارازىلىق بىلدىرەمىز، باتىل قارسى تۇرامىز، ا ق ش جاقپەن قاتاڭ سويلەستىك.

باسا دارىپتەۋ قاجەتتى ءىس، ”قارۋ – جاراقپەن تايۋاندى دەربەستەندىرۋگە ۇرىنعاندارعا كومەكتەسۋ“ تەك ءوزىن ورتكە تۇسىرگەندىك، ”تايۋان ارقىلى جۇڭگونى تەجەمەك بولعان“ ماقساتى ىسكە اسپايدى. ءبىز ا ق ش جاقتى تايۋاندى قارۋلاندىرۋ سىندى سۇرقيا ارەكەتىن دەرەۋ توقتاتۋعا، مۇنىڭ ەكى ەلدىڭ اسكەري جاقتاعى قارىم – قاتىناسىنىڭ دامۋىنا سوققى بولۋىنان ساقتانۋعا قۋزايمىز؛ دەموكراتيانى ىلگەرىلەتۋ پارتياسىنىڭ بيلىك باسىنداعىلارعا تايۋان جۇرتشىلىعىنىڭ تەر توگىپ تاپقان اقشاسىن شاشىپ قارۋ – جاراق ساتىپ الۋدىڭ ارتىن ويلاماي اعاتتىق ىستەۋ بولاتىنىن، ”شەتەلگە ارقا سۇيەپ، تايۋاندى دەربەستەندىرۋگە ۇرىنۋدىڭ“، ”بىرلىككە كەلۋدەن قارۋلى كۇشپەن باس تارتۋدىڭ“ جەڭىلسكە ۇشىرايتىنى داۋسىز ەكەنىن قاتاڭ ەسكەرتەمىز. ءبىز بارلىق قاجەتتى شارالاردى قولدانىپ، مەملەكەتتىڭ يەلىك ۇقىعى مەن تەرريتوريا تۇتاستىعىن باتىل قورعايمىز.

كەلۋ قاينارى: حالىق تورابى