شي جينپيڭ ا ق ش - نىڭ زۇڭتۇڭى ترامپپەن تەلەفوندا سويلەستى

شينحۋا اگەنتتىگى، 11 - ايدىڭ 24 - كۇنى، بەيجيڭ. 11 - ايدىڭ 24 - كۇنى كەشتە مەملەكەت ءتوراعاسى شي جينپيڭ ا ق ش - نىڭ زۇڭتۇڭى ترامپپەن تەلەفوندا سويلەستى.

شي جينپيڭ بىلاي دەپ اتاپ كورسەتتى: وتكەن ايدا ءبىز كورەيانىڭ فۋشانىندا ءساتتى ديدارلاسۋ وتكىزىپ، كوپتەگەن ماڭىزدى ورتاق تانىمعا كەلىپ، جۇڭگو - ا ق ش قارىم - قاتىناسى سىندى الىپ كەمەنىڭ ورنىقتى العا باسۋىنا باعدار بەلگىلەپ، قوزعاۋشى كۇش قوستىق، سونداي - اق دۇنيە جۇزىنە بەلسەندى سيگنال جەتكىزدىك. فۋشان ديدارلاسۋىنان بەرى جۇڭگو - ا ق ش قارىم - قاتىناسى جالپى تۇلعالىق جاقتان ورنىقتى جاقسارىپ، ەكى ەلدىڭ جانە حالىقارالىق قوعامنىڭ جاپپاي قارسى الۋىنا يە بولدى، اماليات جۇڭگو مەن ا ق ش - نىڭ ”سەلبەسۋى ەكى جاققا دا ءتيىمدى بولاتىندىعى، بەلدەسۋى ەكى جاققا دا زيان جەتكىزەتىندىگى“ امالياتتىڭ قايتا - قايتا دالەلدەۋىنەن وتكەن جاي ساۋات ەكەندىگىن، جۇڭگو مەن ا ق ش - نىڭ ”ءوزارا تابىسقا جەتۋى، بىرگە گۇلدەنۋى“ كوزبەن كورىپ، قولمەن ۇستاۋعا بولاتىن ناقتى كورىنىس ەكەندىگىن تاعى ءبىر رەت ءتۇسىندىردى. ەكى جاق وسى بەتالىستى ساقتاپ، دۇرىس بەتالىسقا تاباندى بولىپ، تەڭدىك، قۇرمەت ەتۋ، ءوزارا تيىمدىلىك جاساۋ پوزيتسياسىن ۇستانىپ، سەلبەستىك ءتىزىمىن ۇزارتىپ، ماسەلە ءتىزىمىن قىسقارتىپ، اناعۇرلىم كوپ بەلسەندى ىلگەرىلەۋشىلىككە قول جەتكىزىپ، جۇڭگو - ا ق ش قارى - قاتىناسىنا جاڭا سەلبەستىك ءورىسىن اشىپ، ەكى ەل حالقى مەن دۇنيە ءجۇزى حالقىنا ءتىپتى دە زور باقىت جاراتۋى كەرەك.

شي جينپيڭ جۇڭگونىڭ تايۋان ماسەلەسىندەگى پرينسيپتىك تۇرعىسىن بايىمداپ، بىلاي دەپ باسا دارىپتەدى: تايۋاننىڭ جۇڭگوعا ورالۋى − سوعىستان كەيىنگى حالىقارالىق ءتارتىپتىڭ ماڭىزدى قۇرامداس بولىگى. جۇڭگو مەن ا ق ش كەزىندە فاشيزمگە جانە ميليتاريزمگە تىزە قوسا سوققى بەرگەن بولاتىن، قازىر دۇنيە جۇزىلىك ەكىنشى سوعىستىڭ جەڭىس جەتىستىكتەرىن اناعۇرلىم ويداعىداي قورعاۋى كەرەك.

ترامپ مىنالاردى ءبىلدىردى: ءتوراعا شي جينپيڭ − ۇلى باسشى. ءتوراعا شي جينپيڭ ەكەۋىمىزدىڭ فۋشانداعى ديدارلاسۋىمىز توتەنشە كوڭىلدى بولدى، ءسىزدىڭ ەكى ەل قارىم - قاتىناسى جونىندەگى كوزقاراسىڭىزدى بۇكىلدەي قۇپتايمىن. ەكى جاق فۋشانداعى ديدارلاسۋدا كەلىسكەن ماڭىزدى ورتاق تانىمدى جاپپاي تياناقتاندىرۋدا. جۇڭگو كەزىندە دۇنيە جۇزىلىك ەكىنشى سوعىستىڭ جەڭىسى ءۇشىن ماڭىزدى رول اتقاردى، ا ق ش جاق تايۋان ماسەلەسىنىڭ جۇڭگو جونىنەن ماڭىزدىلىعىن تۇسىنەدى.

ەكى ەل مەملەكەت باسشىلارى ۋكراينا داعدارىسىن دا تىلگە تيەك ەتتى. شي جينپيڭ بىلاي دەپ باسا دارىپتەدى: جۇڭگو بەيبىتشىلىككە كۇش سالاتىن بارلىق قۇلشىنىستى قولدايدى، ءار جاقتىڭ الاۋىزدىقتاردى ۇزدىكسىز ازايتىپ، ءادىل، باياندى، تەجەۋ كۇشىنە يە بەيبىتشىلىك كەلىسىمىن ەرتەرەك جاساسىپ، وسى داعدارىستى تۇبىرىنەن شەشۋىن ءۇمىت ەتەدى.