جۇڭگو مەن ا ق ش ەسىرتكىگە قاتىستى ءبىر رەتكى شەكارا اتتاعان دەلونى ءساتتى تۇردە بىرلەسىپ انىقتادى 

ءتىلشىنىڭ 9 – ايدىڭ 10 – كۇنى قوعام حاۋىپسىزدىگى مينيسترلىگىنەن ۇعىسۋىنشا، جۋىردا جۇڭگو قوعام حاۋىپسىزدىگى مينيسترلىگى مەن ا ق ش – نىڭ فەدەراتسيالىق تەكسەرۋ مەكەمەسى (FBI) سينتەزدەلگەن كانابينوليد تۇرىندەگى زاتتاردىڭ باستاپقى ءبولىمىن جاساۋ جانە ساتۋعا قاتىستى شەكارا اتتاعان ءبىر رەتكى دەلونى بىرلەسىپ ءساتتى انىقتاعان.

ۇعىسۋعا قاراعاندا، 2026 – جىلى 5 – ايدىڭ باس شەنىندە، ا ق ش جاق جۇڭگو جاققا شيڭ XX، سۇڭ XX اتتى 2 جۇڭگو ازاماتىنىڭ دەلوعا قاتىستى دەرەگىن حابارلاندىرعان. تەكسەرۋ ارقىلى اتالعان دەرەكتىڭ ەلىمىزدە تەكسەرىلىپ جاتقان ءبىر دەلومەن بايلانىستى ەكەندىگى انىقتالىپ، قوعام حاۋىپسىزدىگى مينيسترلىگى دەلولاردى بىرىكتىرىپ تەكسەرۋدى ۇيعارعان. 8 – ايدىڭ ورتا شەنىندە، قوعام حاۋىپسىزدىگى مينيسترلىگى حىبەي قاتارلى جەرلەردەگى ساقشى جاقتاردى ۇيىمداستىرىپ، ءبىرتۇتاس تور جايۋ ارەكەتىن ورىستەتىپ، شيڭ XX، سۇڭ XX قاتارلىلاردى قامتىعان دەلوعا قاتىستى 21 ادامدى قولعا العان ءارى ەسىرتكى جاساۋعا پايدالانىلاتىن تىزىمگە الىنباعان باستاپقى كەزەڭدەگى حيميالىق زاتتاردان ءبىر توبىن قولعا تۇسىرگەن. الدىڭعى كەزەڭدە، ا ق ش جاق ءوز شەكاراسى ىشىندە ەسىرتكىگە قاتىستى قىلمىس كۇماندىلارىنان ا ق ش - نىڭ 2 ازاماتىن قولعا العان، اتالعان 2 ادام تىزىمگە الىنباعان باستاپقى كەزەڭدەگى حيميالىق زاتتاردى ساتىپ العاننان كەيىن، ا ق ش – ندا ەسىرتكى جاساعان ءارى ا ق ش – نداعى بىرنەشە فەدەراتسيالىق جانە شتاتتىق تۇرمەلەردەگى قاماۋدا جاتقان تۇتقىندارعا ساتقان.

اتالعان دەلونىڭ ءساتتى انىقتالۋى، جۇڭگو مەن ا ق ش – نىڭ ەسىرتكىگە تيىم سالۋعا ساياتىن زاڭ اتقارۋ جاعىنداعى سەلبەستىك مەحانيزمىنىڭ جۇمىستى جوعارى ونىمدىلىكپەن اتقارعاندىعىن ايگىلەپ قالماستان، جۇڭگو مەن ا ق ش – نىڭ ەسىرتكىگە تيىم سالۋى جاعىندا زاڭ اتقارۋ تاراۋلارىنىڭ شىنايى سەلبەستىكتى ىشكەرىلەي ورىستەتكەنىنىڭ تاعى ءبىر كوزگە كورىنەرلىك تابىسى سانالادى.

(باس ستانسيا ورتالىق تەلەۆيزياسى ءتىلشىسى چىن يۋي)

كەلۋ قاينارى: حالىق تورابى